ମୁମ୍ବାଇ: ବଲିଉଡ୍ରେ ଟ୍ରାଜେଡି କିଙ୍ଗ୍ ଭାବେ ନିଜର ପରିଚୟ ସୃଷ୍ଟି କରିଥିବା ଦିଲ୍ଲୀପ କୁମାରଙ୍କ ୯୮ବର୍ଷ ବୟସରେ ପରଲୋକ ଘଟିଛି। ତାଙ୍କ ବିୟୋଗ ପରେ ହିନ୍ଦୀ ସିନେମାର ଏକ ଯୁଗର ଅବସାନ ଘଟିଛି। ବୁଧବାର ସକାଳ ସାଢ଼େ ୭ଟାରେ ମୁମ୍ବାଇର ହିନ୍ଦୁଜା ହସ୍ପିଟାଲରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି।
ତାଙ୍କ ବିୟୋଗରେ ଫିଲ୍ମ ଇଣ୍ଡଷ୍ଟ୍ରିରେ ଶୋକର ଛାୟା ଖେଳିଯାଇଛି। ଅନେକ ସେଲିବ୍ରିଟି ସୋସିଆଲ ମିଡିଆରେ ଟୁଇଟ କରି ଶୋକ ବ୍ୟକ୍ତ କରିଛନ୍ତି। ଇତିମଧ୍ୟରେ ସୁର ସାମ୍ରାଜ୍ଞୀ ଲତା ମଙ୍ଗେସକର ମଧ୍ୟ ତାଙ୍କ ନିଧନରେ ଟୁଇଟ କରି ଶୋକ ପ୍ରକାଶ କରିଛନ୍ତି। ଦିଲ୍ଲୀପଙ୍କ ସହ ଲତା ନିଜର କେତେକ ପୁରୁଣା ଫଟୋକୁ ଶେୟାର କରିଛନ୍ତି। ଏଥିସହ ସେ ଟୁଇଟ କରି ଲେଖିଛନ୍ତି, ଆଜି ୟୁସୁଫ ଭାଇ ନିଜ ସାନ ଭଉଣୀଙ୍କୁ ଛାଡ଼ି ଚାଲିଯାଇଛନ୍ତି। ୟୁସୁଫ ଭାଇଙ୍କ ବିୟୋଗରେ ସେ ବହୁ ମର୍ମାହତ, ତାଙ୍କ ପାଖରେ କହିବାକୁ କିଛି ଶବ୍ଦ ନାହିଁ। ଅଭିନେତା ଦିଲ୍ଲୀପଙ୍କ ମୃତ୍ୟୁ ପରେ ଏକ ଯୁଗର ଅନ୍ତ ଘଟିଛି, ଭଗବାନ ତାଙ୍କ ଆତ୍ମାକୁ ଶାନ୍ତି ପ୍ରଦାନ କରନ୍ତୁ ବୋଲି ଲତା କହିଛନ୍ତି। ଏଥିସହ ସେ କହିଛନ୍ତି, ସାଏରା ଭାଉଜଙ୍କ ସେବା ମଧ୍ୟ ଅତୁଳନୀୟ। ଫିଲ୍ମ ଜଗତରେ ଦିଲ୍ଲୀପ କୁମାରଙ୍କ ଅତୁଳନୀୟ ଅବଦାନ ରହିଛି। ସିନେମାର ମହାନ କଳାକାରଙ୍କ ମଧ୍ୟରୁ ସେ ମଧ୍ୟ ଜଣେ। ଏଥିପାଇଁ ମହାରାଷ୍ଟ୍ର ସରକାର ଏକ ବଡ଼ ନିଷ୍ପତ୍ତି ନେଇଛନ୍ତି। ଦିଲ୍ଲୀପ କୁମାରଙ୍କୁ ରାଜକୀୟ ସମ୍ମାନ ସହିତ ଅନ୍ତିମ ବିଦାୟ ଦିଆଯିବ ବୋଲି ମହାରାଷ୍ଟ୍ର ସରକାର ଘୋଷଣା କରିଛନ୍ତି।
