ସିଡନୀ,୯।୧୨: ଭାରତୀୟ ଦଳର ଏକ ଭୁଲ ନିଷ୍ପତି ଯୋଗୁ ତୃତୀୟ ଟି-୨୦ରେ ଭାରତ ପରାସ୍ତ ହୋଇଛି। ଡିଆରଏସ୍ ନେବାରେ ବିଳମ୍ବ ହେତୁ ଅଷ୍ଟ୍ରେଲୀୟ ଉଇକେଟ କିପର ବ୍ୟାଟ୍ସମ୍ୟାନ ମାଥ୍ୟୁ ୱେଡ ଗୁରୁତ୍ୱପୂର୍ଣ୍ଣ ୩୦ ରନ ସ୍କୋର କରିଥିଲେ, ଯାହା ଶେଷରେ ନିର୍ଣ୍ଣାୟକ ହୋଇଥିଲା। ମ୍ୟାଚ୍ ପରେ ଅଧିନାୟକ ବିରାଟ କୋହଲି ଏହି ପ୍ରକାର ଭୁଲ ଗ୍ରହଣୀୟ ନୁହେଁ ବୋଲି କହିଥିଲେ। ଅଷ୍ଟ୍ରେଲିୟ ଇନିଂସର ୧୧ତମ ଓଭରରେ ଟି. ନଟରାଜନଙ୍କ ବଲ ୱେଡଙ୍କ ପ୍ୟାଡରେ ବାଜିଥିଲା। ଅମ୍ପାୟାର ଏହାକୁ ଏକ ନଟଆଉଟ ବୋଲି କହିଥିଲେ। କିଛି ସମୟ ଆଲୋଚନା ପରେ ଭାରତୀୟ ଦଳ ଅପିଲ କରିବାକୁ ନିଷ୍ପତ୍ତି ନେଇଥିଲେ ଏବଂ ଅମ୍ପାୟର ଡିଆରଏସକୁ ସୂଚିତ କରିଥିଲେ। ମାଥ୍ୟୁ ୱେଡ କିନ୍ତୁ ତୁରନ୍ତ ଏହାକୁ ବିରୋଧ କଲେ କାରଣ ଡିଆରଏସ ନେବାକୁ ୧୫ ସେକେଣ୍ଡ ସମୟ ଅବଧି ଶେଷ ହୋଇଯାଇଥିଲା।ଏହା ପରେ, ଡିଆରଏସ୍ ନେବାକୁ ନିଷ୍ପତ୍ତି ରଦ୍ଦ ହୋଇ ଯାଇଥିଲା। କୋହଲି ମ୍ୟାଚ ପରେ ଖବରଦାତା ସମ୍ମିଳନୀରେ କହିଛନ୍ତି ଯେ ଏହା ଏକ ସିଧା ବଲ ଥିଲା, କିନ୍ତୁ ବଲ ଗୋଡ ପାର୍ଶ୍ୱକୁ ଯାଉଛି କି ନାହିଁ ଆମେ ଆଲୋଚନା କରିଥିଲୁ। ଏହା ପରେ ଆମେ ପୁନର୍ବାର ସମୀକ୍ଷା କରିବାକୁ ସ୍ଥିର କଲୁ, କିନ୍ତୁ ସେତେବେଳକୁ ସମୟ ସରିଯାଇଥିଲା। ଏଭଳି ଭୁଲ ଗ୍ରହଣୀୟ ନୁହେଁ ବୋଲି ସେ କହିଛନ୍ତି।