ଇସଲାମାବାଦ,୯।୩ : ଅନ୍ତର୍ଜାତୀୟ ମହିଳା ଦିବସରେ ପାକିସ୍ତାନରେ ଆୟୋଜିତ ଏକ ରାଲି ବୁଧବାର ଦିନ ହିଂସାତ୍ମକ ରୂପ ନେଇଥିଲା। ଏହି ସମୟରେ ପୋଲିସ ଓ ବିକ୍ଷୋଭକାରୀଙ୍କ ମଧ୍ୟରେ ସଂଘର୍ଷ ହୋଇଥିଲା। ବିଭିନ୍ନ ବର୍ଗର ମହିଳା ଏବଂ କିନ୍ନରମାନେ ପ୍ରେସ କ୍ଲବ ବାହାରେ ଏକାଠି ହେବାପରେ ହିଂସାତ୍ମକ ପ୍ରଦର୍ଶନ ଆରମ୍ଭ ହୋଇଥିଲା। ପୋଲିସ ଉପସ୍ଥିତ ମହିଳାଙ୍କ ଉପରେ ଲାଠିଚାର୍ଜ କର ିରାଲିକୁ ବନ୍ଦ କରିବାକୁ ଚେଷ୍ଟା କରିଥିଲା।
ରାଲିରେ ଅଂଶଗ୍ରହଣକାରୀମାନେ ମହିଳା ଅଧିକାର ପାଇଁ ସ୍ଲୋଗାନ ଦେଇଥିଲେ। ସ୍ଥାନୀୟ ଖବର ଚ୍ୟାନେଲର ଜଣେ ମହିଳା ସାମ୍ବାଦିକ ତଥା କ୍ୟାମେରାମ୍ୟାନ ମଧ୍ୟ ଆହତ ହୋଇଛନ୍ତି। ଗଣମାଧ୍ୟମ ରିପୋର୍ଟ ଅନୁଯାୟୀ, ଫେଡେରାଲ ଜଳବାୟୁ ପରିବର୍ତ୍ତନ ମନ୍ତ୍ରୀ ଶେରି ରହମାନ ମଧ୍ୟ ଏହି ରାଲିରେ ଅଂଶଗ୍ରହଣ କରିଥିଲେ ଏବଂ ଆରମ୍ଭ ହୋଇଥିବା ହିଂସାକୁ ତୀବ୍ର ନିନ୍ଦା କରିଥିଲେ। ଏକ ଛୋଟ ଶାନ୍ତିପୂର୍ଣ୍ଣ ଶୋଭାଯାତ୍ରାରେ ଲାଠିଚାର୍ଜ କରିବା ଇସଲାମାବାଦ ପୋଲିସର କୌଣସି ଆବଶ୍ୟକତା ନ ଥିଲା ବୋଲି ସେ ଟୁଇଟ କରି କହିଛନ୍ତି।
ପାକିସ୍ତାନର ମାନବାଧିକାର କମିଶନ (ଏଚଆରସିପି) ଏକ ଟୁଇଟ କରି ଇସଲାମାବାଦ ପୋଲିସର ମହିଳା ଏବଂ ଅନ୍ୟମାନଙ୍କ ଉପରେ ହୋଇଥିବା ଲାଠିଚାର୍ଜକୁ ନିନ୍ଦା କରିଛନ୍ତି। ଏହାକୁ ନେଇ ଶାହବାଜ ସରିଫଙ୍କ ସରକାର ଅଡୁଆରେ ପଡ଼ିଛନ୍ତି।
