ହସି ନେଗେଟିିଭ୍‌, ରିଦ୍ଧିମାନ ପୁଣି ପଜିଟିଭ
8:08 amMay 15, 2021May 15, 2021 / 21

ନୂଆଦିଲ୍ଲୀ, ୧୫ା୫ (ପି.ଟି.)-ସଦ୍ୟ କୋଭିଡ୍‌ ଟେଷ୍ଟରେ ଅଷ୍ଟ୍ରେଲିଆର ପୂର୍ବତନ ଅନ୍ତର୍ଜାତୀୟ ଖେଳାଳି ତଥା ଚେନ୍ନାଇ ସୁପର କିଙ୍ଗ୍ସ (ସିଏସ୍‌କେ) ବ୍ୟାଟିଂ କୋଚ୍‌ ମାଇକେଲ ହସିଙ୍କର ନେଗେଟିଭ ଆସିଛି। ସେ ସମ୍ଭବତଃ ରବିବାର ଚେନ୍ନାଇରୁ ନିଜ ଦେଶକୁ ଫେରିଯାଇ ପାରନ୍ତି। ତେବେ ଭାରତର ଟେଷ୍ଟ ଉଇକେଟ କିପର ରିଦ୍ଧିମାନ ଶାହାଙ୍କ ଫଳାଫଳ ପୁଣି ପଜିଟିଭ ଆସିଛି। ସେ ପୂର୍ବଭଳି ଆଇସୋଲେଶନରେ ରହିବେ। ମେ ୨୫ରେ ସେ ମୁମ୍ବାଇଠାରେ ଦଳର ବାୟୋ-ବବଲରେ ଯୋଗଦେବେ। ବର୍ତ୍ତମାନ ସସ୍‌ପେଣ୍ଡ ଥିବା ଆଇପିଏଲ୍‌ରେ ଉଭୟ ହସି ଓ ଶାହା କରୋନା ସଂକ୍ରମିତ ହୋଇଥିଲେ। ସିଏସ୍‌କେ ସିଇଓ କାଶୀବିଶ୍ୱନାଥ କହିଛନ୍ତି, ଆର୍‌ଟି-ପିସିଆର୍‌ ଟେଷ୍ଟରେ ହସିଙ୍କର ନେଗେଟିଭ୍‌ ଆସିଛି। ସେ ସମ୍ପୂର୍ଣ୍ଣ ଆରୋଗ୍ୟ ଲାଭ କରିଛନ୍ତି। ହସି ମାଳଦ୍ୱୀପ କିମ୍ବା ସିଧାସଳଖ ଅଷ୍ଟ୍ରେଲିଆ ଯିବେ ତାହା ନିଜେ ସ୍ଥିର କରିବେ। ହସିଙ୍କୁ ଛାଡ଼ି ଆଇପିଏଲ୍‌ ସହ ସମ୍ପୃକ୍ତ ଥିବା ଅଷ୍ଟ୍ରେଲୀୟ ଖେଳାଳି, କମେଣ୍ଟେଟର, କୋଚ୍‌ ଓ ସପୋର୍ଟ ଷ୍ଟାଫ୍‌ମାନେ ବର୍ତ୍ତମାନ ଭାରତରୁ ଯାଇ ମାଳଦ୍ୱୀପରେ ଅଟକିଛନ୍ତି। ସେଠାରେ ସେମାନେ କ୍ୱାରାଣ୍ଟାଇନ୍‌ରେ ଅଛନ୍ତି। ରବିବାର ସୁଦ୍ଧା ସେମାନେ ବିମାନ ଯୋଗେ ସ୍ବଦେଶ ଫେରିବେ। ସନରାଇଜର୍ସ ହାଇଦ୍ରାବାଦର ଶାହା ଟୁଇଟରରେ କହିଛନ୍ତି, କିଛିଦିନ ବ୍ୟବଧାନରେ ହୋଇଥିବା ୨ଟି ଟେଷ୍ଟରେ ଗୋଟିକରେ ନେଗେଟିଭ ଓ ଅନ୍ୟଟି ପିଜିଟିଭ୍‌ ଆସିଥିବାରୁ ସେ କ୍ୱାରାଣ୍ଟାଇନ୍‌ରେ ରହିବେ। କହିବାକୁ ଗଲେ ତାଙ୍କ କ୍ୱାରାଣ୍ଟାଇନ୍‌ ପିରିୟଡ ଶେଷ ହୋଇ ନ ଥିଲା। ବର୍ତ୍ତମାନ କିନ୍ତୁ ସେ ସୁସ୍ଥ ଅନୁଭବ କରୁଛନ୍ତି। ତାଙ୍କ ବିରୋଧରେ କେହି ଅପପ୍ରଚାର ନ କରିବାକୁ ସେ ଅନୁରୋଧ କରିଛନ୍ତି।