ଭୁବନେଶ୍ୱର,୩୧।୧: ରିଲାଏନ୍ସ ଗ୍ରୁପ୍ର ଅଗ୍ରଣୀ କମ୍ପାନୀ ଜିଓ ପ୍ଲାଟ୍ଫର୍ମସ୍ର ଏକ ନୂତନ ୫ଜି ସମନ୍ବିତ ମେଶିନ୍ ଲର୍ନିଂ ଏବଂ କୃତ୍ରିମ ଇଣ୍ଟେଲିଜେନ୍ସ (ଏଆଇ) ପ୍ଲାଟ୍ଫର୍ମ ‘ଜିଓ ବ୍ରେନ୍’ର ଶୁଭାରମ୍ଭ ସମ୍ପର୍କରେ ଘୋଷଣା କରାଯାଇଛି। ଏପରିକି ଜିଓ ବ୍ରେନ୍ ସମସ୍ତ ପ୍ରକାର ଶିଳ୍ପ ଏବଂ ବ୍ୟବସାୟ ପାଇଁ ଏକ ସମନ୍ବିତ ମେଶିନ୍ ଲର୍ଣ୍ଣିଂ ପ୍ଲାଟ୍ଫର୍ମ ପ୍ରଦାନ କରିଥାଏ। ସେହିଭଳି ଜିଓ ବ୍ରେନ୍ ପ୍ଲାଟ୍ଫର୍ମ କମ୍ପାନୀ ବର୍ତ୍ତମାନର ନେଟ୍ୱର୍କ ସହିତ ସହଜରେ ଏକାଠି କାର୍ଯ୍ୟ କରିବାର କ୍ଷମତା ରଖିଛି। ଏହାକୁ ବ୍ୟବହାର କରିବାକୁ କମ୍ପାନୀଗୁଡିକ ସେମାନଙ୍କର ବର୍ତ୍ତମାନର ନେଟ୍ୱର୍କକୁ ପରିବର୍ତ୍ତନ କରିବା ଆବଶ୍ୟକ ପଡ଼ିବ ନାହିଁ। ଅପରପକ୍ଷରେ ଟେଲିକମ୍ ନେଟ୍ୱର୍କ ହେଉ ବା ଏଣ୍ଟରପ୍ରାଇଜ୍ ନେଟ୍ୱର୍କ କିମ୍ବା ଯେକୌଣସି ପ୍ରକାର ଆଇଟି ନେଟ୍ୱର୍କ, ଜିଓ-ବ୍ରେନ୍ ସମସ୍ତ ପ୍ରକାର ନେଟ୍ୱର୍କ ସହିତ ସଂଯୁକ୍ତ ଭାବେ କାର୍ଯ୍ୟ କରିପାରିବ। ଏପରିକି ଆର୍ଟିଫିସିଆଲ୍ ଇଣ୍ଟେଲିଜେନ୍ସ ସହ ସଜ୍ଜିତ ଏହି ଅଭିନବ ପ୍ଲାଟ୍ଫର୍ମ ଶହ ଶହ ଇଞ୍ଜିନିୟରଙ୍କ ଉଦ୍ୟମ ଏବଂ ଦୀର୍ଘ ୨ବର୍ଷର ଗବେଷଣା ପରେ ବିକଶିତ ହୋଇଥିବା କମ୍ପାନୀ ପକ୍ଷରୁ ସୂଚନା ଦିଆଯାଇଛି। ବିଶେଷ କରି ମେଶିନ୍ ଲର୍ନିଂକୁ ସହଜ କରିବାକୁ ଜିଓ ବ୍ରେନ୍ ପ୍ଲାଟ୍ଫର୍ମ ୫୦୦ରୁ ଅଧିକ ପ୍ରୟୋଗ ବା ଆପ୍ଲିକେଶନ ସହିତ ସଜ୍ଜିତ ରହିଛି। ଉଲ୍ଲେଖଯୋଗ୍ୟ, ଜିଓ ପ୍ଲାଟ୍ଫର୍ମସ୍ ଏହାକୁ ୫ଜି ଏବଂ ଭବିଷ୍ୟତର ଟେକ୍ନୋଲୋଜି ୬ଜି ପାଇଁ ଉତ୍ପାଦ ଶୃଙ୍ଖଳ ବିକାଶ ଦିଗରେ ଏକ ମାଇଲଖୁଣ୍ଟ ଭାବେ ବିଚାର କରୁଛି। ଜିଓ ବ୍ରେନ୍ ଉଦ୍ୟୋଗଗୁଡ଼ିକୁ ପରିବର୍ତ୍ତନ ଏବଂ ନେଟ୍ୱର୍କ ଅପ୍ଟିମାଇଜେଶନ୍ କରିବା ଦିଗରେ ସହାୟତା କରିବା ସହ ୬ଜି ବିକାଶ ପାଇଁ ମଧ୍ୟ ମଞ୍ଚ ପ୍ରସ୍ତୁତ କରିବ, ଯେଉଁଥିରେ ମେଶିନ୍ ଲର୍ନିଂକୁ ଏକ ପ୍ରମୁଖ ସାମର୍ଥ୍ୟ ଭାବେ ବିବେଚନା କରାଯାଉଛି।