ଭୁବନେଶ୍ୱର,୧୭।୭(ଅଭୟ ଦାଶ): ଦେଶର ପ୍ରମୁଖ ସାମାଜିକ ଅନୁଷ୍ଠାନ ତଥା ଭାରତୀ ଏଣ୍ଟରପ୍ରାଇଜେସ୍ର ଜନହିତକର ଶାଖା ଭାରତୀ ଏୟାରଟେଲ୍ ଫାଉଣ୍ଡେଶନ(ବିଏଏଫ୍)ର ୨୫ତମ ପୂର୍ତ୍ତି ଉତ୍ସବ ନିକଟରେ ପାଳିତ ହୋଇଯାଇଛି। ଏହି ପରିପ୍ରେକ୍ଷୀରେ ବିଏଏଫ୍ର ବହୁ ପ୍ରତୀକ୍ଷିତ ବୃତ୍ତି ଯୋଜନା ‘ଭାରତୀ ଏୟାରଟେଲ ସ୍କଲାରଶିପ୍ ପ୍ରୋଗ୍ରାମ’ର ଶୁଭାରମ୍ଭ ସମ୍ପର୍କରେ ଘୋଷଣା କରାଯାଇଛି।
ଉଲ୍ଲେଖଯୋଗ୍ୟ, ଇଣ୍ଡିଆନ ଇନ୍ଷ୍ଟିଚ୍ୟୁଟ ଅଫ୍ ଟେକ୍ନୋଲୋଜି (ଆଇଆଇଟି) ସମେତ ଶ୍ରେଷ୍ଠ ୫୦ ନ୍ୟାଶନାଲ ଇନ୍ଷ୍ଟିଚ୍ୟୁଶନାଲ ର଼୍ୟାଙ୍କିଙ୍ଗ୍ ଫ୍ରେମ୍ୱାର୍କ (ଏନ୍ଆଇଆର୍ଏଫ୍) ଇଞ୍ଜିନିୟରିଂ କଲେଜର ଛାତ୍ରୀମାନଙ୍କ ଉପରେ ଧ୍ୟାନଦେବା ସହ ଟେକ୍ନୋଲୋଜିଭିତ୍ତିକ ଇଞ୍ଜିନିୟରିଂ ଅଣ୍ଡର ଗ୍ରାଜୁଏଟ(ୟୁଜି) ଏବଂ ସମନ୍ବିତ କାର୍ଯ୍ୟକ୍ରମ (୫ବର୍ଷ ପର୍ଯ୍ୟନ୍ତ) ଉପରେ ଧ୍ୟାନଦେବା ସହ ବିଭିନ୍ନ ସାମାଜିକ-ଅର୍ଥନୈତିକ ପୃଷ୍ଠଭୂମିରୁ ଯୋଗ୍ୟ ଛାତ୍ରୀଛାତ୍ରମାନଙ୍କୁ ସହାୟତା କରିବା ଏହି ମେରିଟ୍-କମ୍-ମାଧ୍ୟମ ଭିତ୍ତିକ ବୃତ୍ତି କାର୍ଯ୍ୟକ୍ରମର ଲକ୍ଷ୍ୟ ରହିଛି। ୨୦୨୪ ଅଗଷ୍ଟରେ ନାମଲେଖା ପାଇଁ ଯୋଗ୍ୟ ଛାତ୍ରୀଛାତ୍ରଙ୍କ ପାଇଁ ଏହା ଲାଗୁହେବ। ଚଳିତ ବର୍ଷ ୨୫୦ଜଣ ଛାତ୍ରୀଛାତ୍ରଙ୍କୁ ନେଇ ଆରମ୍ଭ ହୋଇଥିବା ଏହି କାର୍ଯ୍ୟକ୍ରମ ପ୍ରତ୍ୟେକ ଗୋଷ୍ଠୀ ମାଧ୍ୟମରେ ଏହାର ସଫଳ ରୂପାୟନ ସହ କ୍ରମଶଃ ବୃଦ୍ଧିକରିବା ପାଇଁ ଡିଜାଇନ କରାଯାଇଛି। ଏହି କାର୍ଯ୍ୟକ୍ରମ ଶୀର୍ଷରେ ପହଞ୍ଚିବା ପରେ ବାର୍ଷିକ ୧୦୦ କୋଟରୁ ଅଧିକ ଟଙ୍କା ବ୍ୟୟବରାଦକରି ୪,୦୦୦ ବିଦ୍ୱାନଙ୍କ ପାଖରେ ପହଞ୍ଚିବାର ଲକ୍ଷ୍ୟ ରଖାଯାଇଛି।
ପଛୁଆବର୍ଗରୁ ଆସିଥିବା ମେଧାବୀ ଛାତ୍ରୀଛାତ୍ରମାନଙ୍କ ପାଇଁ ଗୁଣାତ୍ମକ ଶିକ୍ଷା ପାଇବାରେ ବାଧା ସୃଷ୍ଟି କରୁଥିବା ଆର୍ଥିକ ପ୍ରତିବନ୍ଧକ ଦୂରକରିବା ପାଇଁ ସମ୍ପୂର୍ଣ୍ଣ ଅନୁଦାନପ୍ରାପ୍ତ ଛାତ୍ରବୃତ୍ତି ପରିକଳ୍ପନା କରାଯାଇଛି। ବାର୍ଷିକ ପାରିବାରିକ ଆୟ ୮.୫ ଲକ୍ଷ ଟଙ୍କାରୁ ଅଧିକ ନ ଥିବା ଛାତ୍ରୀଛାତ୍ରଙ୍କୁ ଏହି ସ୍କଲାରଶିପ୍ ପ୍ରଦାନ କରାଯିବ। ଏ ସମ୍ପର୍କରେ ଭାରତୀ ଏଣ୍ଟରପ୍ରାଇଜେସ୍ର ଉପାଧ୍ୟକ୍ଷ ଏବଂ ଭାରତୀ ଏୟାରଟେଲ୍ ଫାଉଣ୍ଡେଶନର କୋ-ଚେୟାରମ୍ୟାନ୍ ରାକେଶ ଭାରତୀ ମିତ୍ତଲ କହିଛନ୍ତି, ଆମେ ଭାରତୀ ଏୟାରଟେଲ ସ୍କଲାରଶିପ୍ ପ୍ରୋଗ୍ରାମର ଶୁଭାରମ୍ଭକରି ବେଶ୍ ଉତ୍ସାହିତ ଅଛୁ। ଏପରିକି ବିଗତ ୨୫ବର୍ଷ ମଧ୍ୟରେ ଭାରତୀ ଏୟାରଟେଲ୍ ଫାଉଣ୍ଡେଶନ ଆମର ଶିକ୍ଷାଗତ ପଦକ୍ଷେପ ମାଧ୍ୟମରେ ୬ ନିୟୁତରୁ ଅଧିକ ଲୋକଙ୍କ ଜୀବନ ଛୁଇଁଥିବାରୁ ଆମେ ଗର୍ବିତ ଅନୁଭବ କରୁଛୁ। ଏହି ଅଗ୍ରଣୀ ସ୍କଲାରଶିପ୍ କାର୍ଯ୍ୟକ୍ରମ ମାଧ୍ୟମରେ ଆମେ ବିଭିନ୍ନ ସାମାଜିକ-ଅର୍ଥନୈତିକ ପୃଷ୍ଠଭୂମିର ଛାତ୍ରୀଛାତ୍ରମାନଙ୍କୁ ଆବଶ୍ୟକ ସହଯୋଗ ପ୍ରଦାନ କରୁଛୁ। ବିଶେଷକରି ଛାତ୍ରୀମାନଙ୍କୁ ଶୈକ୍ଷିକ ଉତ୍କର୍ଷ ହାସଲକରିବା ଏବଂ ସେମାନଙ୍କ ସ୍ବପ୍ନକୁ ସାକାରକରିବା ପାଇଁ ଆମର ପ୍ରତିବଦ୍ଧତାକୁ ବିସ୍ତାର କରୁଛୁ।