ସୋନପୁର,୨୪।୧୨(ନି.ପ୍ର.): ଆସନ୍ତା ଜାନୁୟାରୀ ୧୩ ତାରିଖରୁ ଭୁବନେଶ୍ୱର ଓ ରାଉରକେଲାରେ ପୁରୁଷ ହକି ବିଶ୍ୱକପ ଆରମ୍ଭ ହେବ। ବିଶ୍ୱକପ ହକିର ଆୟୋଜନରେ କେବଳ ଓଡିଶା ନୁହେଁ, ସାରା ଦେଶର ସମ୍ମାନ ଜଡିତ। ବିଶ୍ୱକପ୍ ହକିକୁ ସ୍ମରଣୀୟ କରିବା ପାଇଁ ସୁବର୍ଣ୍ଣପୁର ଜିଲା ପ୍ରଶାସନ ବ୍ୟାପକ ପ୍ରସ୍ତୁତି କରିଛି । ଜାତୀୟ ଖେଳ ହକିର ପ୍ରଚାର ପ୍ରସାର ପାଇଁ ଜିଲାରେ ହକିର ଏନ୍ତୁଡିଶାଳ ଭାବେ ପରିଚିତ ଉଲୁଣ୍ଡା ବ୍ଲକର ଦକ୍ଷିଣୀପାଲିରୁ ହକି ମହୋତ୍ସବର ଶୁକ୍ରବାର ଶୁଭାରମ୍ଭ ହୋଇଛି। ଜିଲାପାଳ ଅବୋଲି ସୁନିଲ ନରଓ୍ବଣେ ମୁଖ୍ୟଅତିଥି ଭାବେ ଯୋଗଦେଇ ମହୋତ୍ସବର ଶୁଭାରମ୍ଭ କରିଛନ୍ତି। ଏହି ଅବସରରେ ହକି ସଚେତନତା ରଥର ଶୁଭାରମ୍ଭ ହୋଇଛି। ସୁସଜ୍ଜିତ ରଥ ୨୦ ଦିନ ଧରି ଜିଲାର ସମସ୍ତ ୧୦୯ ପଞ୍ଚାୟତ ପରିକ୍ରମା କରିବ। ପ୍ରତି ପଞ୍ଚାୟତ ଓ ବିଦ୍ୟାଳୟ ସ୍ତରରେ ବିଭିନ୍ନ ସଚେତନତାମୂଳକ କାର୍ଯ୍ୟକ୍ରମ ଗ୍ରହଣ କରାଯିବାର କାର୍ଯ୍ୟସୂଚୀ ରହିଛି। ଜିଲା କ୍ରୀଡା ବିଭାଗ ପକ୍ଷରୁ ଆୟୋଜିତ ମହୋତ୍ସବର ଉଦ୍ଘାଟନୀ ସଭାରେ ଜିଲାପାଳଙ୍କ ସମେତ ଏସ୍ପି ଅମରେଶ କୁମାର ପଣ୍ଡା, ଅତିରିକ୍ତ ଜିଲାପାଳ ସୂର୍ଯ୍ୟ ନାରାୟଣ ଦାଶ, ବୀରମହାରାଜପୁର ଉପଜିଲାପାଳ ଅଶୋକ କୁମାର ଭୋଇ, ଉଲୁଣ୍ଡା ବ୍ଲକ ଅଧ୍ୟକ୍ଷା ଶାନ୍ତିଲତା ମିଶ୍ର, ବିଡିଓ ହେମସାଗର ଭୋଇ, ଜିଲା କ୍ରୀଡା ଅଧିକାରୀ ଅଭିଳାଷ ପୁରୋହିତ, ଜିଲାର ବରିଷ୍ଠ ଅଧିକାରୀ ବୃନ୍ଦ ଓ ମହିଳା ସ୍ବୟଂ ସହାୟକ ଗୋଷ୍ଠୀର କର୍ମକର୍ତ୍ତା ଉପସ୍ଥିତ ଥିଲେ। ପରେ ଦକ୍ଷିଣୀପାଲି ପଡିଆରେ ଦକ୍ଷିଣୀପାଲି ଓ ଏସ୍ ପତ୍ରାପାଲି ମଧ୍ୟରେ ଏକ ହକି ମ୍ୟାଚ୍ ଅନୁଷ୍ଠିତ ହୋଇଥିଲା। ଶତାଧିକ ହକିପ୍ରେମୀ ମ୍ୟାଚ୍କୁ ଉପଭୋଗ କରିଥିଲେ। କାର୍ଯ୍ୟକ୍ରମରେ ପଞ୍ଚାୟତସ୍ତରୀୟ ଲୋକ ପ୍ରତିନିଧି, ଜନସାଧାରଣ ଓ ହକିପ୍ରେମୀ ସାମିଲ ହୋଇଥିଲେ। ଉତ୍ସବରେ ସାଂସ୍କୃତିକ ଦଳ, ଅଞ୍ଚଳବାସୀଙ୍କ ପାରମ୍ପରିକ ସଙ୍ଗୀତ ଓ ନୃତ୍ୟର ଝଲକ ଦେଖିବାକୁ ମିଳିଥିଲା। ଜିଲାପାଳ ନରଓ୍ବଣେ ସ୍ଥାନୀୟ ଆଦିବାସୀ ଯୁବତୀଙ୍କ ସହିତ ପାରମ୍ପରିକ ନୃତ୍ୟର ତାଳେ ତାଳେ ଝୁମିଥିଲେ। ଏହା ଲୋକଙ୍କୁ ବେଶ ଆକର୍ଷିତ କରିଥିଲା।
