ନୂଆଦିଲ୍ଲୀ,୪।୧: ଦେଶର ପ୍ରମୁଖ ଘରୋଇ ସଂସ୍ଥା ଆର୍ସଲର ମିତ୍ତଲ ଇଣ୍ଡିଆ ପ୍ରାଇଭେଟ ଲିମିଟେଡ୍ (ଏଏମ୍ଆଇପିଏଲ୍) ଏବଂ ଇଣ୍ଡିଆନ ବ୍ୟୁରୋ ଅଫ୍ ମାଇନ୍ସ (ଆଇବିଏମ୍) ର ଭୁବନେଶ୍ୱର କାର୍ଯ୍ୟାଳୟ ସହଯୋଗରେ ୨୪ତମ ଖଣି ପରିବେଶ ଏବଂ ଖଣିଜ ସଂରକ୍ଷଣ (ଏମ୍ଇଏମ୍ସି) ସପ୍ତାହ ନିକଟରେ ପାଳିତ ହୋଇଯାଇଛି। ଏହି ପରିପ୍ରେକ୍ଷୀରେ ଠାକୁରାଣୀ ଖଣି କର୍ମଚାରୀ ଓ ଶ୍ରମିକଙ୍କ ଉପସ୍ଥିତିରେ ଖଣି ପରିଚାଳକ ପ୍ରମୋଦ କୁମାର ମିଶ୍ର ପତାକା ଉତ୍ତୋଳନ କରିଥିଲେ। ଏପରିକି ଏକ ଇନ୍ସ୍ପେକ୍ସନ୍ ଦଳର ନେତୃତ୍ୱରେ ଠାକୁରାଣୀ ଆଇରନ୍ ଖଣିଠାରେ ଏମ୍ଇଏମ୍ସି ଇନ୍ସ୍ପେକ୍ସନ୍ ସପ୍ତାହର ଶୁଭାରମ୍ଭ କରାଯାଇଥିଲା।
ଏ ସମ୍ପର୍କରେ ସିନିୟର ଲିଡ୍ ଜିଓଲୋଜି ଏବଂ କ୍ୱାଲିଟି କଣ୍ଟ୍ରୋଲ ଅଧିକାରୀ ସୁଶାନ୍ତ କୁମାର ମହନ୍ତ ଏଏମ୍ଆଇପିଏଲ୍ ଦ୍ୱାରା ମାଇନ୍ସ ପରିବେଶ ଏବଂ ଖଣିଜ ସଂରକ୍ଷଣ ଏବଂ ସ୍ଥାୟୀ ଖଣି ପାଇଁ ନିଆଯାଇଥିବା ବିଶେଷ କାର୍ଯ୍ୟକଳାପ ଉପରେ ବିସ୍ତୃତ ଆଲୋକପାତ କରିଥିଲେ। ଏପରିକି ଏଏମ୍ଆଇପିଏଲ୍ ଅଧୀନରେ କାର୍ଯ୍ୟ କରୁଥିବା ବିଭିନ୍ନ ସଙ୍ଗଠନ ଏବଂ ସହଯୋଗୀମାନେ ଖଣି ଅଞ୍ଚଳରେ ସେମାନଙ୍କର କାର୍ଯ୍ୟ ପ୍ରଦର୍ଶନ କରିବା ପାଇଁ ଚିତ୍ତାକର୍ଷକ ଷ୍ଟଲ୍ ସ୍ଥାପନ କରିଥିଲେ। ବିଶେଷକରି ଏଏମ୍ଆଇପିଏଲ୍ ଦ୍ୱାରା ଖଣି ଅଞ୍ଚଳରେ ସମାଜର ସାମୂହିକ ବିକାଶ ଏବଂ ପରିବେଶ ପରିଚାଳନା ଯୋଜନା ପାଇଁ ସିଏସ୍ଆର୍ କାର୍ଯ୍ୟକଳାପ ମଧ୍ୟ ଷ୍ଟଲ୍ରେ ପ୍ରଦର୍ଶିତ ହୋଇଥିଲା। ଅପରପକ୍ଷରେ ଏମ୍ଇଏମ୍ସି ସପ୍ତାହ ଉପଲକ୍ଷେ ସ୍ଲୋଗାନ, ପୋଷ୍ଟର, ବିତର୍କ ଏବଂ ପ୍ରବନ୍ଧ ପ୍ରତିଯୋଗିତା ଭଳି ବିଭିନ୍ନ ପରିବେଶ ସଚେତନତା କାର୍ଯ୍ୟକ୍ରମର ମଧ୍ୟ ଆୟୋଜନ କରାଯାଇଥିଲା।