ସିମୁଳିଆ,୨୮ା୧୦(ସନ୍ତୋଷ ନାୟକ): ବାଲେଶ୍ୱର ଜିଲା ସିମୁଳିଆ ଥାନା ଖଇରା ବ୍ଲକ ଅଞ୍ଚଳର ଜଣେ ବିଧବା ମହିଳାଙ୍କ ଅଶ୍ଳୀଳ ଭିଡିଓ ଭାଇରାଲ କରିବା ଘଟଣାରେ ସିମୁଳିଆ ପୋଲିସ ଭଦ୍ରକ ଅଞ୍ଚଳର ଅନନ୍ତ ନାରାୟଣ ପଣ୍ଡା ନାମକ ଜଣେ ଆଇନଜୀବୀଙ୍କୁ ଗିରଫ କରିଛି। ଏନେଇ କେସ୍ ନଂ ୩୩୦/୨୩ରେ ଏକ ମାମଲା ରୁଜୁ କରାଯାଇ ଶନିବାର କୋର୍ଟଚାଲାଣ କରାଯାଇଛି।
ଉକ୍ତ ମହିଳାଙ୍କ ସ୍ବାମୀଙ୍କ ଦେହାନ୍ତ ପରେ ଜମିଜମା ମାମଲାରେ ଅନନ୍ତ ତାଙ୍କ ସମ୍ପର୍କରେ ଆସିଥିଲେ। ତେବେ ପରେ ତାଙ୍କ ଭିଡିଓ ଉତ୍ତୋଳନ କରି ଭାଇରାଲ କରିବା ଯୋଗୁ ମହିଳାଙ୍କ ସାମାଜିକ ସ୍ଥିତି ବିଗିଡୁଥିବା ସେ ଅଭିଯୋଗ କରିଥିଲେ। ଏପରିକି ଆଇନଜୀବୀଙ୍କ ମୋବାଇଲ, କମ୍ପ୍ୟୁଟର ଜବତ କରିବା ପାଇଁ ମହିଳାଜଣଙ୍କ ପୋଲିସ ନିକଟରେ ଦାବି କରିଛନ୍ତି। ଟଙ୍କା ନେଣଦେଣ ଘଟଣାକୁ କେନ୍ଦ୍ରକରି ମହିଳାଜଣଙ୍କ ତାଙ୍କ ନାମରେ ଅଭିଯୋଗ କରିଥିବା ଆଇନଜୀବୀ ପାଲଟା ଅଭିଯୋଗ କରିଛନ୍ତି। ପୋଲିସ ଶୁକ୍ରବାର ରାତିରେ ତାଙ୍କୁ ଭଦ୍ରକରୁ ଗିରଫ କରିଥିଲା। ଅପରପକ୍ଷେ ମହିଳା ଜଣଙ୍କ ଅଶ୍ଳୀଳ ଭିଡିଓ ସମ୍ପର୍କରେ ଅଭିଯୋଗ କରିବା ସହିତ ଆଇନଜୀବୀ ଓ ମହିଳା ପରସ୍ପର ବିରୋଧରେ ଟଙ୍କା ନେଣଦେଣ ଅଭିଯୋଗ କରୁଥିବା ସିମୁଳିଆ ଥାନା ଅଧିକାରଣୀ ସ୍ବର୍ଣ୍ଣଲତା ମିଞ୍ଜ ସୂଚନା ଦେଇଛନ୍ତି।