ୱେଲିଂଟନ,୧୭।୧୧: ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ଟି-୨୦ ସିରିଜ ଶୁକ୍ରବାରଠାରୁ ଆରମ୍ଭ ହେଉଛି। ୱେଲିଂଟନ ଗ୍ରାଉଣ୍ଡରେ ପ୍ରଥମ ମ୍ୟାଚ ଖେଳାଯିବ। ଏହାପୂର୍ବରୁ ଭାରତୀୟ ଦଳର କାର୍ଯ୍ୟନିର୍ବାହୀ କୋଚ ଭିଭିଏସ ଲକ୍ଷ୍ମଣ ଟି-୨୦ କ୍ରିକେଟରେ ସଫଳତାର ମନ୍ତ୍ର କହିଥିଲେ। ନ୍ୟୁଜିଲାଣ୍ଡ ବିପକ୍ଷ ଟି-୨୦ ସିରିଜ ପୂର୍ବରୁ ଭିଭିଏସ ଲକ୍ଷ୍ମଣ କହିଛନ୍ତି, ଟି-୨୦ ଫର୍ମାଟରେ ସ୍ବାଧୀନ ଏବଂ ନିର୍ଭୟରେ ଖେଳିବାକୁ ପଡିବ, କିନ୍ତୁ ଦଳର ଆବଶ୍ୟକତା ପୂରଣ କରି ଖେଳିବା ମଧ୍ୟ ଜରୁରୀ ଅଟେ। ଟି-୨୦ କ୍ରିକେଟ ପାଇଁ ଏକ ଖୋଲା ମନର ଆବଶ୍ୟକତା ରହିଛି।
ଟି-୨୦ ବିଶ୍ୱକପ ପରେ ଭାରତର ମୁଖ୍ୟ କୋଚ ରାହୁଲ ଦ୍ରାବିଡ ଏବଂ ତାଙ୍କ ସହାୟକ କର୍ମଚାରୀଙ୍କୁ ବିଶ୍ରାମ ଦିଆଯାଇଛି। ଏହି ସିରିଜରେ ଏନସିଏ ମୁଖ୍ୟ ଭିଭିଏସ ଲକ୍ଷ୍ମଣଙ୍କୁ ଭାରତର କୋଚ ଭାବେ ନିଯୁକ୍ତି ଦିଆଯାଇଛି। ଏହି ଗସ୍ତରେ ଭାରତର ଅନେକ ବରିଷ୍ଠ ଖେଳାଳିଙ୍କୁ ମଧ୍ୟ ବିଶ୍ରାମ ଦିଆଯାଇଛି। ହାର୍ଦ୍ଦିକ ପାଣ୍ଡ୍ୟାଙ୍କୁ ଦଳର ଅଧିନାୟକ କରାଯାଇଛି। ରୋହିତ ଶର୍ମା, ବିରାଟ କୋହଲି ଏବଂ ଲୋକେଶ ରାହୁଲଙ୍କୁ ଏହି ସିରିଜରେ ବିଶ୍ରାମ ଦିଆଯାଇଛି। ସମସ୍ତ ବରିଷ୍ଠ ଖେଳାଳି ବାଂଲାଦେଶ ବିପକ୍ଷ ସିରିଜରୁ ଟିମ ଇଣ୍ଡିଆକୁ ଫେରିବେ। ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ତିନି ମ୍ୟାଚ ବିଶିଷ୍ଟ ଟି-୨୦ ସିରିଜ ପରେ ତିନୋଟି ଦିନିକିଆ ମଧ୍ୟ ଖେଳାଯିବ। ଦିନିକିଆ ଦଳର ଅଧିନାୟକ ଶିଖର ଧାୱନଙ୍କ ହାତରେ ରହିଛି।