ଭୁବନେଶ୍ୱର,୧୬।୧୦(ଶର୍ମିଷ୍ଠା ପାଣିଗ୍ରାହୀ): ଆଉ ଦିନ କେଇଟା ପରେ ଧରାପୃଷ୍ଠକୁ ଅବତରଣ କରିବେ ମା’ ଦୁର୍ଗା। ରବିବାରଠାରୁ ନବରାତ୍ର ପୂଜା ଆରମ୍ଭ ହୋଇଥିବାବେଳେ ଦୁର୍ଗାପୂଜା ପାଇଁ ଆୟୋଜକମାନେ ସେମାନଙ୍କ ପ୍ରସ୍ତୁତିକୁ ଜୋର୍ଦାର କରିଛନ୍ତି। ରାଜଧାନୀର ଅନ୍ୟତମ ମଣ୍ଡପ ପଳାଶୁଣୀରେ ଏଥର ମଧ୍ୟପ୍ରଦେଶର ଲକ୍ଷ୍ମୀନାରାୟଣ ମନ୍ଦିର ଆକୃତିର ତୋରଣରେ ପୂଜା ପାଇବେ ମା’। ଏହାର ଉଚ୍ଚତା ଏବଂ ଓସାର ୫୦ଫୁଟ ରହିଛି। ମା’ଙ୍କ ମୂର୍ତ୍ତି ଓ ମେଢ଼ର ଉଚ୍ଚତା ୨୦ଫୁଟ ରହିବ। ଏଥିସହ ପାର୍ଶ୍ୱରେ ମଧ୍ୟ ଦେବଦେବୀଙ୍କ ମୂର୍ତ୍ତି ସ୍ଥାନ ପାଇବ। ଅଭିମନ୍ୟୁ ବେହେରା ଓ ୫ ସାଥୀ କାରିଗର ମୂର୍ତ୍ତି କାମରେ ଲାଗିପଡିଛନ୍ତି। ସେହିପରି କୋଲକାତାରୁ ୧୫ଜଣ କାରିଗର ତୋରଣ କାର୍ଯ୍ୟରେ ଲାଗିଛନ୍ତି। ଚଳିତ ବର୍ଷ ୨୫ ଲକ୍ଷର ବଜେଟ୍ ରହିଛି।
ଚିଲିକାର ମା’ ନାରାୟଣୀଙ୍କ ଆଜ୍ଞାମାଳ ଆଣି ଷଷ୍ଠୀ ପୂଜା ଆରମ୍ଭ ହୁଏ। ବିଲ୍ବବରଣ, କଳସ ପୂଜା, ସପ୍ତମୀରେ ଚକ୍ଷୁଦାନ, ପୂଜା, ଅଷ୍ଟମୀରେ ମା’ଙ୍କ ପାଖେ ଖେଚୁଡ଼ି ଭୋଗ କରି ୪ହଜାର ଭକ୍ତଙ୍କୁ ବଣ୍ଟାଯିବ। ବରିଷ୍ଠ ନାଗରିକ, ମହିଳା ଓ ଦିବ୍ୟାଙ୍ଗଙ୍କ ପାଇଁ ସ୍ବତନ୍ତ୍ର ବ୍ୟବସ୍ଥା କରାଯାଇଛି। ଶ୍ରଦ୍ଧାଳୁଙ୍କ ସୁରକ୍ଷା ଓ ଶୃଙ୍ଖଳିତ ଦର୍ଶନର ବ୍ୟବସ୍ଥା ହେବ। ୧୦ଟି ସିସି କ୍ୟାମେରା ଲଗାଯିବ। ସେହିପରି ପୋଲିସ ମିତ୍ର ୩୦ଜଣ ଓ ସ୍ବେଚ୍ଛାସେବୀ ୧୦୦ଜଣ ନିୟୋଜିତ ରହିବେ। ମାଛ ମାର୍କେଟ୍ ପାଖେ ପାର୍କିଂର ବ୍ୟବସ୍ଥା କରାଯାଇଛି। ପ୍ରତ୍ୟେକ ସାରେ ଭଜନ ସମାରୋହ ଓ ମେଲୋଡି କାର୍ଯ୍ୟକ୍ରମ ହେବ। ଦଶମୀରେ ସ୍ଥାନୀୟ ବିଜୁ ପଟ୍ଟନାୟକ ପାର୍କରେ ରାବଣପୋଡ଼ି ହେବ। ଶୃଙ୍ଖଳିତ ଭାବେ ପାରମ୍ପରିକ ବାଦ୍ୟ ସହ ରୂପାଲି ଛକ ପର୍ଯ୍ୟନ୍ତ ଭସାଣି ଯାତ୍ରା ହେବ। ସେଠାରୁ ଫେରି କୁଆଖାଇ ନଦୀସ୍ଥିତ ଅସ୍ଥାୟୀ ପୁଷ୍କରିଣୀରେ ମା’ଙ୍କୁ ବିସର୍ଜନ କରାଯିବ।
ରାଜଧାନୀର ଆବାହନ ମଣ୍ଡପ
୧୯୮୫ରୁ ପଳାଶୁଣୀ ହାଟରେ ୧୪ହଜାର ଟଙ୍କା ଖର୍ଚ୍ଚ କରାଯାଇ ଦୁର୍ଗାପୂଜା ଆରମ୍ଭ ହୋଇଥିଲା। ଇତିମଧ୍ୟରେ ପଳାଶୁଣୀ ଦୁର୍ଗାପୂଜା ୩୯ ବର୍ଷରେ ପାଦ ଥାପିଛି। ରାଜଧାନୀରେ ଏହା ହେଉଛି ଆବାହନ ମଣ୍ଡପ। ଏଠାରୁ ଦର୍ଶନ ସାରି ଭକ୍ତମାନେ ଅନ୍ୟସବୁ ସ୍ଥାନକୁ ଯାଆନ୍ତି। ସବୁଥର ପରି ଏବର୍ଷ ମଧ୍ୟ ଭକ୍ତଙ୍କ ପାଇଁ ବ୍ୟାପକ ବ୍ୟବସ୍ଥା କରାଯାଇଛି।
– ପ୍ରଭାତ କୁମାର ପରିଡ଼ା, ସଭାପତି
ରାବଣ ପୋଡ଼ି ମୁଖ୍ୟ ଆକର୍ଷଣ
ରାବଣପୋଡ଼ି ଏଥର ମୁଖ୍ୟ ଆକର୍ଷଣ ରହିବ। ପାଖାପାଖି ୪୦ ଫୁଟ୍ ଉଚ୍ଚର ରାବଣ ପ୍ରସ୍ତୁତ କରାଯିବ। ଏହି ସମୟରେ କିଭଳି କିଛି ଅସୁବିଧା ନ ହେବ ସେ ନେଇ ଧ୍ୟାନ ଦିଆଯାଇଛି। ଶୃଙ୍ଖଳାର ସହ ଏହି କାର୍ଯ୍ୟ ସମାପନ ହେବା ନେଇ କମିଟି ପକ୍ଷରୁ ପ୍ରୟାସ କରାଯାଉଛି।
-ରମେଶ ସାହୁ, ଉପସଭାପତି
ଶୃଙ୍ଖଳିତ ଦର୍ଶନକୁ ଗୁରୁତ୍ୱ
ସୁରକ୍ଷା ବ୍ୟବସ୍ଥା ନେଇ କମିଟି ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି। ଏବେ ଖରା ମଧ୍ୟ ରହୁଛି। ତେଣୁ ଲୋକମାନେ କିଭଳି ସୁରୁଖୁରୁରେ ଦର୍ଶନ କରିବେ ତାହାକୁ ଆମେ ପ୍ରାଧାନ୍ୟ ଦେଉଛୁ। ଧାଡ଼ିରେ ଆସି ଲୋକମାନେ ମା’ଙ୍କ ପୂଜା କରିବେ। ବରିଷ୍ଠ ନାଗରିକ, ମହିଳା, ଦିବ୍ୟାଙ୍ଗଙ୍କ ପାଇଁ ବିଶେଷ ଦୃଷ୍ଟି ରହିବ।
-ଅଶୋକ କୁମାର ସାହୁ, ସମ୍ପାଦକ