ନବରଙ୍ଗପୁର,୬।୬(ବି.ପ୍ର.): କଂଗ୍ରେସ, ଭାଜପା ଓ ବିଜେଡି ପ୍ରମୁଖ ରାଜନୈତିକ ଦଳ ନବରଙ୍ଗପୁର ଜିଲାକୁ କେବେ ମଧ୍ୟ ନିରାଶ କରି ନ ଥିଲେ। ଏହି ଜିଲାରୁ ବିଭିନ୍ନ ସମୟରେ ସଦାଶିବ ତ୍ରିପାଠୀ, ପରମା ପୂଜାରୀ, ଡମ୍ବରୁ ମାଝି, ରବିସିଂ ମାଝି, ଯାଦବ ମାଝି, ହାବିବୁଲ୍ଲା ଖାଁ ଓ ରମେଶ ଚନ୍ଦ୍ର ମାଝି ମନ୍ତ୍ରୀ ରହିଥିଲେ। ତେବେ ରବିବାର କେତେଜଣ ପୁରୁଣାଙ୍କ ସହ ନୂଆ ମନ୍ତ୍ରୀଙ୍କୁ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ମନ୍ତ୍ରିମଣ୍ଡଳର ସମ୍ପ୍ରସାରଣ ହେଲା। ହେଲେ ମୁଖ୍ୟମନ୍ତ୍ରୀ ଏଥର ଜିଲାର ୩ଜଣ ବିଧାୟକ ମଧ୍ୟରୁ କାହାରିକୁ ବି ସ୍ଥାନ ଦେଲେ ନାହିଁ। ନବରଙ୍ଗପୁର ଭଳି ଜିଲାରୁ କାହାରିକୁ ମନ୍ତ୍ରିମଣ୍ଡଳରେ ସ୍ଥାନ ନ ମିଳିବା ଜିଲାର ନେତାଙ୍କ ଦୁର୍ବଳତାକୁ ବୁଝାଉଛି ବୋଲି ସ୍ଥାନୀୟ କଂଗ୍ରେସ ଭବନରେ ଆୟୋଜିତ ଖବରଦାତା ସମ୍ମିଳନୀରେ ଜିଲା ସଭାପତି ମୁନା ତ୍ରିପାଠୀ କହିଛନ୍ତି।
ସେହିଭଳି ଚଳିତ ମାସରେ ଜିଲାରେ ବଡ଼ ଧାରଣର ଏକ ମିଶ୍ରଣ ପର୍ବ ହେବ। ରାଜସ୍ଥାନ ଉଦୟପୁର ଢାଞ୍ଚାରେ ଚିନ୍ତନ ପର୍ବ ଓ ନୂତନ ମଣ୍ଡଳ କଂଗ୍ରେସ ଗଠନ ଚାଲିଛି ବୋଲି ସୂଚନା ମିଳିଛି। ସରକାର ୫-ଟି ମାଧ୍ୟମରେ ହାଇସ୍କୁଲଗୁଡିକର ରୂପାନ୍ତରଣ କରୁଛନ୍ତି। ସରକାରଙ୍କ ଉଦ୍ଦେଶ୍ୟ ଠିକ୍ ଥିଲେ ମଧ୍ୟ ଯେଉଁସବୁ କାମ କରାଯାଉଛି ତାହା ଅତି ନିମ୍ନମାନର ହେଉଛି। ପୁରୁଣା ଟିଣରେ ରଙ୍ଗ ଦେବା, ପାଚେରିରେ ନିମ୍ନମାନର ରଙ୍ଗରେ ଚିତ୍ର ଆଙ୍କିବା ଓ ବଗିଚା କାମରେ ଯେଉଁସବୁ ସିମେଣ୍ଟ ବ୍ୟବହାର କରାଯାଉଛି ତାହା ଛୁଇଁଲା ମାତ୍ରେ ଝଡି ପଡୁଛି ବୋଲି ଅଭିଯୋଗ ହୋଇଛି। ବିନା ଠିକାରେ ବିଭାଗ ନିଜ ହାତରେ କାମ ରଖି ଅତି ନିମ୍ନମାନରେ କାମ କରି ଚାଲିଛି। ଏ ନେଇ କଂଗ୍ରେସ ପ୍ରତିବାଦ କରିବ ବୋଲି ଜିଲା ସଭାପତି ତ୍ରିପାଠୀ କହିଛନ୍ତି। ଖବରଦାତା ସମ୍ମିଳନୀରେ ସମ୍ପାଦକ ପ୍ରଦୀପ ସାହୁ, ପିସିସି ସଭ୍ୟ ଦିଲୀପ ବେହେରା, ସୁବାସ ସୁର ପ୍ରମୁଖ ଉପସ୍ଥିତ ଥିଲେ।