ଭୁବନେଶ୍ୱର,୨୯ା୪(ବ୍ୟୁରୋ): ରାଜ୍ୟ କଂଗ୍ରେସର ସାଙ୍ଗଠନିକ ପୁନର୍ବିନ୍ୟାସ ଖୁବ୍ଶୀଘ୍ର ହେବ। ପିସିସି ସଭାପତିଠାରୁ ଆରମ୍ଭକରି କାର୍ଯ୍ୟକାରୀ ସଭାପତି, ଛାମୁଆ ସଙ୍ଗଠନର ରୂପରେଖ ବଦଳିବାର ସମ୍ଭାବନା ଅଧିକ ରହିଛି। କଂଗ୍ରେସ ପ୍ରଭାରୀ ଏ. ଚେଲ୍ଲାକୁମାର ୨ଦିନ ଧରି ଓଡ଼ିଶାରେ ରହି ନେତାମାନଙ୍କ ସହ ପର୍ଯ୍ୟାୟକ୍ରମେ ଆଲୋଚନା କରିବା ସତ୍ତ୍ୱେ ତାଙ୍କ ଉପରେ ସବୁ ନେତା ଭରସା କରିପାରିନାହାନ୍ତି। ଏଥିପାଇଁ ଦିଲ୍ଲୀରେ ହାଇକମାଣ୍ଡଙ୍କ ପାଖରେ ଲବି କରିବାକୁ କେତେଜଣ ନେତା ଡେରା ପକାଇଛନ୍ତି। ଚେଲ୍ଲାକୁମାର ଦୁଇଦିନ ଧରି ନେତାମାନଙ୍କ ସହ ମାରାଥନ୍ ଆଲୋଚନା କରି ଯିବା ପରେ କେତେଜଣ ନେତା ହାଇକମାଣ୍ଡଙ୍କ ପାଖରେ ସିଧାସଳଖ ମତାମତ ରଖିବାକୁ ଦିଲ୍ଲୀରେ ପହଞ୍ଚିବା ଘଟଣା ଦଳୀୟ ଅନ୍ତର୍ଦ୍ୱନ୍ଦ୍ୱକୁ ଅଧିକ ଆଲୋଚନା ଭିତରକୁ ଆଣିଛି। ପ୍ରଥମ ଦିନରେ ବରିଷ୍ଠ ନେତା ଓ ବିଧାୟକଙ୍କ ସହ ପ୍ରଭାରୀ ଆଲୋଚନା କରିଥିବା ବେଳେ ୨ୟ ଦିନରେ ଜିଲା ସଭାପତିଙ୍କ ସହ ୱାନ୍ ଟୁ ୱାନ୍ ଆଲୋଚନା କରିଥିଲେ। ସମସ୍ତଙ୍କ ମତାମତ ନେବା ପରେ କଂଗ୍ରେସରେ ଆମୂଳଚୂଳ ପରିବର୍ତ୍ତନ ହେବ ବୋଲି ପ୍ରଭାରୀ କହିଥିଲେ। ତେବେ ପ୍ରଭାରୀଙ୍କ ଉପରେ କେତେଜଣ ନେତା ଭରସା ଜୁଟାଇ ନ ପାରି କିଛି ଗୋଷ୍ଠୀ ହାଇକମାଣ୍ଡଙ୍କ ପାଖରେ ଲବି ଆରମ୍ଭ କରିଦେଇଛନ୍ତି। ପିସିସି ସଭାପତି ରେସ୍ରେ ୩ ଜଣଙ୍କ ନାମକୁ ନେଇ ଚର୍ଚ୍ଚା ହେଉଥିବା ବେଳେ ଏପର୍ଯ୍ୟନ୍ତ ଅଙ୍କ ଛିଡ଼ି ନ ଥିବା କୁହାଯାଉଛି। ଏହାରି ଭିତରେ ବିଭିନ୍ନ ଛାମୁଆ ସଂଗଠନ ଯଥା-ଛାତ୍ର, ଯୁବ ଓ ମହିଳା କଂଗ୍ରେସର ମୁଖିଆ ପଦ ହାତେଇବା ଲାଗି ହାଇକମାଣ୍ଡଙ୍କ ପାଖରେ ନିଜ ନିଜ ଦାବି ରଖିବେ। ଅନ୍ୟପକ୍ଷରେ ବିଧାୟକ ଦଳ ନେତା ପଦରୁ ନରସିଂହ ମିଶ୍ର ଏବଂ ମୁଖ୍ୟ ସଚେତକ ପଦରୁ ତାରାପ୍ରସାଦ ବାହିନୀପତି ଇସ୍ତଫା ଦେଉଥିବା ଚର୍ଚ୍ଚା ହେଉଥିବାବେଳେ ଏ ନେଇ କେହି କିଛି ସ୍ପଷ୍ଟ କରୁନାହାନ୍ତି। ଅନ୍ୟପକ୍ଷରେ ପିସିସି ସଭାପତି ନିରଞ୍ଜନ ପଟ୍ଟନାୟକ ଏ ବିଷୟରେ ଜାଣି ନ ଥିବା କହିଛନ୍ତି। କେବଳ ଯାହା ବିଷୟରେ ଆଲୋଚନା ଚାଲିଛି ସେମାନେ ହି ଁକହିପାରିବେ ବୋଲି ନିରଞ୍ଜନ କହିଛନ୍ତି। ସେ ଆହୁରି କହିଛନ୍ତି, ବ୍ୟକ୍ତିଗତ ଭାବେ ସେ ତାରା ଓ ନରସିଂହଙ୍କ ସହ ଆଲୋଚନା କରିନାହାନ୍ତି। ଦଳ ପାଇଁ ସେମାନେ ଯେଭଳି କାମ କରୁଛନ୍ତି ସେମିତି କାମ କରନ୍ତୁ। ଦଳର ନୀତି, ଆଦର୍ଶ ଯେମିତି ଥିଲା ସେମିତି ରହିଛି, ସେଥିରେ କିଛି ପରିବର୍ତ୍ତନ ହୋଇନାହିଁ। ଦଳ ଭିତରେ ଶୃଙ୍ଖଳା ଓ କଠିନ ପରିଶ୍ରମ ଆବଶ୍ୟକ ବୋଲି ସେ କହିଛନ୍ତି।