ରସୁଲପୁର,୧୮ା୨(ରଞ୍ଜିତ ରାଉତ):ରସୁଲପୁର ବ୍ଲକ ଅନ୍ତର୍ଗତ ବଡ଼କଇଞ୍ଚତ୍ ପଞ୍ଚାୟତ ଗରୁଆଳ ଗ୍ରାମର ଚାଷୀ ରବୀନ୍ଦ୍ର ପରିଡ଼ା ଫୁଲକୋବି ଫସଲର ଅଭାବୀ ବିକ୍ରିର ଶିକାର ହୋଇଛନ୍ତି। ଫଳରେ ସେ ୨ ସପ୍ତାହ ତଳେ ୫୦ ଡିସିମିଲିରୁ ଊର୍ଦ୍ଧ୍ୱ କୋବି ଫସଲ ଉଜାଡ଼ି ଦେଇଛନ୍ତି। ଫୁଲକୋବି କିଆରିରେ ଟ୍ରାକ୍ଟର ଚଳାଇ ଫସଲ ନଷ୍ଟ କରିଦେଇ ଅନ୍ୟ ଏକ ରବିଚାଷ ପାଇଁ ପ୍ରସ୍ତୁତ ହେଉଛନ୍ତି। ଫସଲ ଉଜାଡିବା ବାବଦରେ ତାଙ୍କୁ ଲକ୍ଷାଧିକ ଟଙ୍କାର କ୍ଷତି ସହିବାକୁ ପଡିଛି। ଏନେଇ ଗଣମାଧ୍ୟମରେ ଖବର ପ୍ରକାଶ ପାଇଥିଲା। ଚାଷୀ ପସଲ ଉଜାଡି ଦେଉଥିବା ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ ହୋଇଥିଲା। ହେଲେ ଏ ସବୁ ପରେ ବି ସମ୍ପୃକ୍ତ ଚାଷୀଙ୍କ ସମସ୍ୟାକୁ ଅଣଦେଖା କରାଯାଇଛି। କ୍ଷତିଗ୍ରସ୍ତ ଚାଷୀଙ୍କ ଦୁଃଖ ବୁଝିବା ପାଇଁ ରାଜନେତା ହୁଅନ୍ତୁ ଅବା ବିଭାଗୀୟ ପଦାଧିକାରୀ କେହି ତାଙ୍କ ନିକଟକୁ ଆସିନାହାନ୍ତି ବୋଲି ପରିଡ଼ା ଅଭିଯୋଗ କରିଛନ୍ତି। ସେ ଫସଲ ନଷ୍ଟ କରିବା ପରେ ମହାଜନି ସୁଧ ଯୁକ୍ତ ଋଣକୁ ନେଇ ମାନସିକ ଚାପଗ୍ରସ୍ତ ହୋଇପଡ଼ିଛନ୍ତି। ତେଣୁ କୃଷିଋଣ ଛାଡ଼ ସହ କ୍ଷତିପୂରଣ ବାବଦକୁ ସରକାରୀ ସହାୟତା ପ୍ରଦାନ ପାଇଁ ଚାଷୀ ଦାବି କରିଛନ୍ତି। ଏହିଭଳି ସମସ୍ୟାରେ କେବଳ ଚାଷୀ ରବୀନ୍ଦ୍ର ସମ୍ମୁଖୀନ ହୋଇଛନ୍ତି ତାହା ନୁହେଁ, ବ୍ଲକ ଅଞ୍ଚଳର ବହୁ ଚାଷୀଙ୍କ କ୍ଷେତ୍ରରେ ସମାନ ପରିସ୍ଥିତି ଉପୁଜିଛି। ଚାଷୀଙ୍କ ଦୁଃଖଦୁର୍ଦ୍ଦଶା ସମୟରେ କୃଷି ଓ ଉଦ୍ୟାନ କୃଷି ଅଧିକାରୀମାନେ ନ ପହଞ୍ଚିବା ଏକ ବିଡ଼ମ୍ବନାର ବିଷୟ ହୋଇଛି।
ଅପରପକ୍ଷରେ ସରକାର ଚାଷୀଙ୍କ ଆୟକୁ ଦ୍ୱିଗୁଣିତ କରିବା ପାଇଁ ବ୍ୟୟବରାଦ କରୁଛନ୍ତି। ହେଲେ ଚାଷୀଙ୍କ ସମସ୍ୟାକୁ ଜାଣି ସେ ଦିଗରେ ଆବଶ୍ୟକୀୟ ପଦକ୍ଷେପ ନିଆ ନ ଗଲେ ଆୟ ଦ୍ୱିଗୁଣିତ ହେବା ବଦଳରେ ଚାଷୀ ଋଣଗ୍ରସ୍ତ ହୋଇପଡିବା ଏକପ୍ରକାର ନିଶ୍ଚିତ ବୋଲି କୁହାଯାଉଛି। ତେଣୁ ଚାଷୀଙ୍କ ବାସ୍ତବ ସ୍ଥିତି, ଆବଶ୍ୟକତା ଓ ସମସ୍ୟାକୁ ଉପଲବ୍ଧ କରିବା ସହ କ୍ଷେତ୍ର ଅନୁଧ୍ୟାନ କରାଯାଇ ପଦକ୍ଷେପ ନିଆଗଲେ ଚାଷୀ ଉପକୃତ ହୋଇପାରିବେ। ନ ହେଲେ ସରକାରୀସ୍ତରରେ ଚାଷୀଙ୍କ ଉନ୍ନତି ଲକ୍ଷ କେବଳ କାଗଜକଲମରେ ସୀମିତ ହୋଇରହିଯିବ ବୋଲି ସାଧାରଣରେ ଆଲୋଚାନ ହେଉଛି।
ବ୍ଲକ ଅଞ୍ଚଳରେ ଶୀତଳଭଣ୍ଡାର ନ ଥିବା, ପରିବା ଫସଲକୁ ବୀମାଭୁକ୍ତ କରାଯାଇପାରୁ ନ ଥିବା, ଋତୁକାଳୀନ ଫସଲରେ କ୍ଷତି ପହଞ୍ଚିଲେ ସେମାନଙ୍କୁ କ୍ଷତିପୂରଣ ନ ମିଳିବା, ହାଟ ବଜାରରେ ମଣ୍ଡି ନ ଖୋଲିବା ଭଳି ଅବ୍ୟବସ୍ଥା ଯୋଗୁ କ୍ଷତିଗ୍ରସ୍ତ ଚାଷୀଙ୍କୁ ସରକାରୀ ସହାୟତା ମିଳି ପାରୁନାହିଁ। ଏସବୁ କାରଣରୁ ଚାଷୀ କୌଳିକ ବୃତ୍ତି ଛାଡ଼ି ଅନ୍ୟ ବେଉଷାକୁ ଆପଣେଇ ନେଉଥିବା ଲକ୍ଷ୍ୟ କରାଯାଉଛି। ଫୁଲକୋବି ଅଭାବୀ ବିକ୍ରି ଯୋଗୁ ବଜାରରେ କୋବି ପିଛା ୨ରୁ୩ ଟଙ୍କାରେ ବିକ୍ରି କରିବାକୁ ପଡ଼ିଥିଲା। ଯାହାର ଉପତ୍ାଦନ ମୂଲ୍ୟ ୫ଟଙ୍କାରୁ ଊର୍ଦ୍ଧ୍ୱ ବୋଲି ଆକଳନ କରାଯାଉଛି। ତେବେ ବେଶୀ ଖର୍ଚ୍ଚକରି କମ୍ ମୂଲ୍ୟରେ ବିକିବା ପାଇଁ ଉପତ୍ାଦିତ ଦ୍ରବ୍ୟକୁ ବାଜାରକୁ ନେଇ ଆହୁରି ଅଧିକ ଖର୍ଚ୍ଚାନ୍ତରୁ ବଞ୍ଚିବା ପାଇଁ ଚାଷୀ କ୍ଷେତକୁ ଉଜାଡି ଦେବାକୁ ନିଷ୍ପତ୍ତି ନେଉଛନ୍ତି ବୋଲି ମତ ରଖିଛନ୍ତି। ତେଣୁ କ୍ଷତିପୂରଣ ପ୍ରଦାନ ପାଇଁ କ୍ଷତିଗ୍ରସ୍ତ ଚାଷୀମାନେ ଦାବି କରିଛନ୍ତି।