ନୂଆଦିଲ୍ଲୀ, ୧୭ା୮ (ପି.ଟି.)- ଭାରତୀୟ ଟେନିସ୍ ଆଇକନ୍ ଲିଆଣ୍ଡର ପେସ୍ ଶନିବାର ଦେଶର ୭୪ତମ ସ୍ବାଧୀନତା ଦିବସ ଅବସରରେ ନିଜସ୍ବ ଓ୍ବେବ୍ ସାଇଟ୍ ଲଞ୍ଚ୍ କରିଛନ୍ତି। ଟେନିସ୍ରେ ଅଲିମ୍ପିକ ପଦକ ହାସଲ କରିବାରେ ପେସ୍ ହେଉଛନ୍ତି ଦେଶର ଏକମାତ୍ର ଖେଳାଳି। ୧୯୯୬ ଆଟଲାଣ୍ଟା ଗେମ୍ସ ପ୍ଲେ-ଅଫ୍ରେ ସେ ଆର୍ଜେଣ୍ଟିନାର ଫର୍ନାଣ୍ଡୋ ମେଲିଜେନିଙ୍କୁ ପରାସ୍ତ କରି ଐତିହାସିକ ବ୍ରୋଞ୍ଜ ହାସଲ କରିଥିଲେ। ୧୮ଥର ଗ୍ରାଣ୍ଡସ୍ଲାମ ବିଜେତା ଲଞ୍ଚ୍ କରିଥିବା ଓ୍ବେବ୍ସାଇଟ୍ ହେଲା ‘ଡବ୍ଲ୍ୟୁଡବ୍ଲ୍ୟୁଡବ୍ଲ୍ୟୁ.ଲିଆଣ୍ଡରପେସ୍ ଡଟ୍ଅନ୍ଡଟ୍’। ଏହି ଖେଳରତ୍ନ ବିଜେତା ୪୬ ବିଜୟ ସହ ଡେଭିସ୍ କପ୍ର ସବୁଠାରୁ ସଫଳ ଡବଲ୍ସ ଖେଳାଳି। ଶେଷ ଥର ସେ ଗତ ମାର୍ଚ୍ଚ ପ୍ରଥମ ସପ୍ତାହରେ ଭାରତର କ୍ରୋଏସିଆ ବିପକ୍ଷ ଡେଭିସ୍ କପ୍ କ୍ୱାଲିଫାୟର ଖେଳିଥିଲେ। ପ୍ରୋ-ସର୍କିଟରେ ୨୦୨୦ ତାଙ୍କର ଫେୟାରଓ୍ବେଲ ସିଜନ ହେବ ବୋଲି ୪୭ ବର୍ଷୀୟ ଟେନିସ୍ ଷ୍ଟାର ଘୋଷଣା କରିଥିଲେ। କ୍ରୀଡ଼ା ଇତିହାସରେ କ୍ରମାଗତ ୮ଅଲିମ୍ପିକ୍ସରେ ଭାଗ ନେବାରେ ଏକମାତ୍ର ଟେନିସ ଖେଳାଳି ହେବାର ଗୌରବ ଅର୍ଜନ କରିବା ଲକ୍ଷ୍ୟରେ ରହିଛନ୍ତି ପେସ୍। କରୋନା ଭାଇରସ୍ ମହାମାରୀ ଯୋଗୁ ଟୋକିଓ ଅଲିମ୍ପିକ୍ସ ଆସନ୍ତାବର୍ଷକୁ ଘୁଞ୍ଚାଇଛି।