ସୁନ୍ଦରଗଡ,୧୫। ୩(ଡି.ଏନ.ଏ.): ୧୧ ଦଫା ଦାବି ନେଇ ଓଡିଶା ଡ୍ରାଇଭର ମହାସଂଘ ସୁନ୍ଦରଗଡ ଜିଲା ଶାଖା ପକ୍ଷରୁ ବିଭିନ୍ନ ସ୍ଥାନରେ ଷ୍ଟିୟରିଂ ଛାଡ ଆନ୍ଦୋଳନ ଚାଲିଛି। ଏଥି ଯୋଗୁ ଗାଡି ଚଳାଚଳ ବ୍ୟାହତ ହୋଇଛି। ବନ୍ଦ ଡାକରା ଯୋଗୁ ଯାତ୍ରାବାହୀ ବସ୍ ସମେତ ଅନ୍ୟାନ୍ୟ ପରିବହନ ସେବା ସମ୍ପୂର୍ଣ୍ଣ ବନ୍ଦ ରହିଛି। ଦୁଇ ଚକିଆ ଗାଡି ବ୍ୟତୀତ କିଛି ଅଟୋ ଓ କାରକୁ ଛାଡି ଦେଲେ ଅନ୍ୟ କୌଣସି ଯାନବାହନ ଚଳାଚଳ କରୁନାହିଁ। ସୁନ୍ଦରଗଡ ଦେଇ ଯାଇଥିବା ରାଉରକେଲା-ସମ୍ବଲପୁର ବିଜୁ ଏକ୍ସପ୍ରେସ ଓ୍ବେର କିରେଇ ଛକରେ ଓଡିଶା ଡ୍ରାଇଭର ମହାସଂଘ ସୁନ୍ଦର ଗଡ ଶାଖା ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଥିଲା। ଜିଲା ସଭାପତି ସନ୍ତୋଷ ଜୁରା, ସୁନ୍ଦରଗଡ ଟାଉନ ସଭାପତି ସରୋଜ ଡୁଙ୍ଗ ଡୁଙ୍ଗ, ସଦର ବ୍ଲକ ସଭାପତି ସୁସ୍ମନ୍ତ କୁମାର ସାହୁ, ଉପସଭାପତି ଲୋଚନ ସେଠ, ସମ୍ପାଦକ ରଞିତ ନାଗ,କର୍ମକର୍ତ୍ତାରୋହିତ ମହାନନ୍ଦ ପ୍ରମୁଖ ଏହି ଆନ୍ଦୋଳନର ନେତୃତ୍ୱ ନେଇଥିଲେ। ଜିଲାର ବଡ ଗାଁ, ସବଡଗା, ହେମଗିରି, ତଳସରା ଛକ, ବାଲିଶଙ୍କରା ସମେତ ବିଭିନ୍ନ ସ୍ଥାନରେ ଡ୍ରାଇଭର ମହାସଂଘ ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଥିଲା। ଏହି ଷ୍ଟିଅରିଂ ଛାଡ ଆନ୍ଦୋଳନ ଯୋଗୁ ଏମସିଏଲ, ଜାମକାନି, ଡୁଲଙ୍ଗା ଆଦି ଖଣିରୁ କୋଇଲା ପରିବହନ ସେବା ମଧ୍ୟ ବାଧାପ୍ରାପ୍ତ ହୋଇଛି। ବିଭିନ୍ନ ରାସ୍ତା ପାର୍ଶରେ ବହୁ ସଖ୍ୟାରେ କୋଇଲା ଟ୍ରକ ସମେତ ଅନ୍ୟାନ୍ୟ ସାମଗ୍ରୀ ପରିବହନ କରୁଥିବା ଗାଡି ଅଟକି ରହିଛି। ଡ୍ରାଇଭରଙ୍କ ଏହିପରି ଷ୍ଟିୟରିଂ ଛାଡ ଆନ୍ଦୋଳନ ଯୋଗୁ ଯାତ୍ରାମାନେ ନାହିଁ ନ ଥିବାର ଅସୁବିଧାର ସମ୍ମୁଖୀନ ହୋଇଛନ୍ତି। ଏପରିକି ବୁଧବାର ସାପ୍ତାହିକ ହାଟ ମଧ୍ୟ ବସି ପାରି ନାହିଁ। ପୋଲିସ ପକ୍ଷରୁ ବିଭିନ୍ନ ସ୍ଥାନରେ ସୁରକ୍ଷା ବ୍ୟବସ୍ଥା କରାଯାଇଥିଲା।