ଢେଙ୍କାନାଳ ଅଫିସ, ୭।୧୧: ଦୀର୍ଘ ଚାରିଦିନ ପରେ ଶେଷରେ ବୋରାପଦା ସ୍ଥିତ ସରକାରୀ ଆଇଟିଆଇ ପଛପଟ ଏକ ପରିତ୍ୟକ୍ତ କୂଅରୁ ନିଖୋଜ ବ୍ୟବସାୟୀ ପୀତବାସ ଦାସଙ୍କ ଗଳିତ ମୃତଦେହ ଉଦ୍ଧାର କରାଯାଇଛି । ଖବର ପାଇବା ପରେ ସଦର ଥାନା ଅଧିକାରୀ ଅଭିନବ ଡାଳୁଅଙ୍କ ନେତୃତ୍ୱରେ ପୋଲିସ ଓ ସାଇଣ୍ଟିଫିକଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ପରିତ୍ୟକ୍ତ କୂଅରୁ ମୃତଦେହ ଉଦ୍ଧାର ହେବାପରେ ବ୍ୟବଚ୍ଛେଦ ପାଇଁ ମୁଖ୍ୟ ଚିକିତ୍ସାଳୟକୁ ପଠାଯାଇଛି।
ପ୍ରକାଶ ଯେ, ସଦର ଥାନା ଅନ୍ତର୍ଗତ ବୋରାପଦା ସ୍ଥିତ ଖମାର ଅଞ୍ଚଳର ପୀତବାସ (୪୦) ଜଣେ ବ୍ୟବସାୟୀ ଭାବେ ପରିଚିତ ଥିଲେ। ଇଟା ଭାଟି, ବାଲି, ଚିପ୍ସ ଓ ଅନ୍ୟାନ୍ୟ ବ୍ୟବସାୟ କରୁଥିଲେ । ହେଲେ ନିଜ ବ୍ୟବସାୟକୁ କେନ୍ଦ୍ର କରି ତାଙ୍କର ପୂର୍ବ ଶତ୍ରୁତା ରହିଥିଲା। ତେବେ ଚଳିତ ନଭେମ୍ବର ୩ ତାରିଖ ସା ସମୟରେ ପୀତବାସ ନିଜ ଘରୁ ବାହାରି ଆଉ ଫେରିନଥିଲା। ପରିବାର ଲୋକ ଅନେକ ଖୋଜାଖୋଜି ପରେ ପୀତବାସ ଆଉ ମିଳି ନ ଥିଲେ। ପରେ ତାଙ୍କ ପରିବାର ପକ୍ଷରୁ ସଦର ଥାନାରେ ଏକ ନିଖୋଜ ମାମଲା ମଧ୍ୟ ଦାୟର ହୋଇଥିଲା। ପୋଲିସ ମଧ୍ୟ ଏହି ମାମଲାରେ କିଛି ସନ୍ଦିଗ୍ଧ ବ୍ୟକ୍ତିଙ୍କୁ ଥାନାରେ ଅଟକ ରଖି ପଚରାଉଚରା କରିଥିଲା। ରବିବାର ସକାଳେ ମୃତ ପୀତବାସଙ୍କ ଗଳିତ ମୃତଦେହ କୂଅରୁ ଉଦ୍ଧାର ହୋଇଛି। ତାଙ୍କୁ ହତ୍ୟା କରାଯାଇଛି ଓ ପୂର୍ବ ଶତ୍ରୁତା ଯୋଗୁ ଏଭଳି ଘଟିଛି ବୋଲି ସାନଭାଇ ପୂର୍ଣ୍ଣଚନ୍ଦ୍ର କହିଛନ୍ତି । ମୃତଦେହ ବ୍ୟବଚ୍ଛେଦ ପରେ ମୃତ୍ୟର କାରଣ ଜଣାପଡିବ ବୋଲି ପୋଲିସ କହିଛି।
