ଭୁବନ,୫ା୧୨(ବିପିନ ବିହାରୀ ସେଠୀ): ଢେଙ୍କାନାଳ ଜିଲା ଭୁବନ ଥାନା ଓଡ଼ିଶ ଗ୍ରାମରେ ଥିବା ପ୍ରାଥମିକ ସାସ୍ଥ୍ୟକେନ୍ଦ୍ରରୁ ବୁଧବାର ବିଳମ୍ବିତ ରାତିରେ ଏଲ୍ଇଡି ଟିଭି ଓ ପ୍ରିଣ୍ଟର ଚୋରି ହୋଇଯାଇଛି। ପ୍ରାଥମିକ ସ୍ବାସ୍ଥ୍ୟକେନ୍ଦ୍ରର କର୍ମଚାରୀମାନେ ଘରକୁ ଫେରିବାର ପରେ ଦୁର୍ବୃତ୍ତମାନେ ତାଲା ଭାଙ୍ଗି ଚୋରି କରିନେଇଥିଲେ। ଏହି ସ୍ବାସ୍ଥ୍ୟକେନ୍ଦ୍ର ଉପରେ ଓଡ଼ିଶ ପଞ୍ଚାୟତ ସହିତ ଯାଜପୁର ଜିଲାରେ ବସବାସ କରୁଥିବା ଲୋକମାନେ ମଧ୍ୟ ନିର୍ଭର କରିଥାନ୍ତି। ଉକ୍ତ ସ୍ବାସ୍ଥ୍ୟକେନ୍ଦ୍ରରେ ରାତ୍ର ଜଗୁଆଳ ନ ଥିବାରୁ ଏହାର ସୁଯୋଗ ନେଇ ବାରମ୍ବାର ଚୋରି ହେଉଥିବାବେଳେ ବୁଧବାର ରାତିରେ ତାଲା ଭାଙ୍ଗି ଚୋରି ହୋଇଛି। ଗୁରୁବାର ସକାଳୁ କର୍ମଚାରୀମାନେ ଡାକ୍ତରଖାନାକୁ ଆସି ଦେଖିବା ବେଳକୁ ତାଲା ଭଙ୍ଗାଯାଇଥିବାବେଳେ ଏଲ୍ଇଡି ଟିଭି ଏବଂ ପ୍ରିଣ୍ଟର ନ ଥିବା ଜଣାପଡ଼ିଥିଲା। ସଙ୍ଗେସଙ୍ଗେ ସେଠାରେ କାର୍ଯ୍ୟରତ ଆୟୁଷ ଡାକ୍ତର ଶ୍ରଦ୍ଧାଞ୍ଜଳି ମାରିକଙ୍କୁ ଜଣାଇଥିଲେ। ସେ ସଙ୍ଗେସଙ୍ଗେ ସମସ୍ତ ବିଭାଗୀୟ ଅଧିକାରୀଙ୍କୁ ଜଣାଇବା ସହିତ ଭୁବନ ପୋଲିସକୁ ଖବର ଦେଇଥିଲେ। ଖବର ପାଇ ଭୁବନ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଥିବାବେଳେ ସ୍ବାସ୍ଥ୍ୟକେନ୍ଦ୍ରରେ ଲଗାଯାଇଥିବା ସିସି ଟିଭିକୁ ଯାଞ୍ଚ କରିଥିଲେ। ସିସିଟିଭିରେ ଉତ୍ତୋଳନ ହୋଇଥିବା ଫଟୋଗୁଡ଼ିକ ସ୍ପଷ୍ଟ ଜଣାପଡୁନାହିଁ। ଯଥାଶୀଘ୍ର ତଦନ୍ତ କରାଯାଇ ଅଭିଯୁକ୍ତଙ୍କୁ ଗିରଫ କରାଯିବ ବୋଲି ପୋଲିସ ପକ୍ଷରୁ କୁହାଯାଇଛି।
