ବିଗତ ଦିନର ବଲିଉଡ୍ର ସଫଳ ତଥା ଲୋକପ୍ରିୟ ଅଭିନେତ୍ରୀ ହେଉଛନ୍ତି ଲୀନା ଚନ୍ଦାଭରକର। ୨୯ ଅଗଷ୍ଟ ୧୯୫୦ରେ କର୍ନାଟକରେ ଜନ୍ମଗ୍ରହଣ କରିଥିବା ଲୀନାଙ୍କର ଆଜି ହେଉଛି ଜନ୍ମଦିନ। ଅନେକ ହିଟ୍ ଫିଲ୍ମରେ କାମ କରିସାରିଥିବା ଲୀନା ମାତ୍ର ୨୫ ବର୍ଷ ବୟସରେ ବିଧବା ହୋଇଯାଇଥିଲେ। ସ୍ବାମୀଙ୍କ ଦେହରେ ଭୁଲରେ ଗୁଳି ଲାଗିବାରୁ ବିବାହର ମାତ୍ର ଅଳ୍ପ କିଛି ଦିନ ପରେ ଏହି ଦୁର୍ଘଟଣା ଘଟିଥିଲା।
ଲୀନା ୧୯୬୮ ମସିହାରେ ମାତ୍ର ୧୯ ବର୍ଷ ବୟସରେ ଫିଲ୍ମ ‘ମନ୍ କା ମିତ୍’ ମାଧ୍ୟମାର ବଲିଉଡ୍ରେ ଡେବ୍ୟୁ କରିଥିଲେ। ଏହା ପୂର୍ବରୁ ସେ ବିଜ୍ଞାପନରେ କାମ କରୁଥିଲେ। ପ୍ରଥମ ଫିଲ୍ମର ସଫଳତା ପରେ ତାଙ୍କୁ ଅନେକ ଫିଲ୍ମରେ ଅଫର ମିଳିଲା। ଗୋଟିଏ ପlରେ ଗୋଟିଏ ସଫଳ ଫିଲ୍ମ ସେ କରିଚାଲିଲେ। ଲୀନା ବହୁତ ରକ୍ଷଣଶୀଳ ଥିଲେ। ତେଣୁ ସେ ଅଭିନୟ କ୍ୟାରିୟରରେ କେବେହେଲେ ବିକିନି ପିନ୍ଧି ନ ଥିଲେ କି ଫଟୋସୁଟ୍ ମଧ୍ୟ କରି ନ ଥିଲେ। ତାଙ୍କର ଅଭିନୟ କ୍ୟାରିୟର ବହୁତ ଭଲ ଚାଲିଥିଲା। ଫିଲ୍ମରେ କାମ କରୁଥିବା ବେଳେ ସେ ୧୯୭୫ରେ ରାଜନୈତିକ ପରିବାରର ସିଦ୍ଧାର୍ଥ ବନ୍ଦୋଦକରଙ୍କୁ ବିବାହ କରିଥିଲେ। ମାତ୍ର ଏହି ସମ୍ପର୍କ ବେଶିଦିନ ତିଷ୍ଟି ନ ଥିଲା। ସିଦ୍ଧାର୍ଥଙ୍କ ଦେହରେ ଭୁଲରେ ଗୁଳି ଲାଗିଯିବାରୁ ତାଙ୍କର ମୃତ୍ୟୁ ଘଟିଥିଲା। ଫଳରେ ମାତ୍ର ୨୫ ବର୍ଷ ବୟସରେ ଲୀନା ବିଧବା ହୋଇଯାଇଥିଲେ। କିଛି ଦିନ ଘରେ ରହିବା ପରେ ସେ ପୁଣିଥରେ ନିଜର ଅଭିନୟ କ୍ୟାରିୟର ଆରମ୍ଭ କଲେ। ଏହି ସମୟରେ ନିଜଠାରୁ ୨୧ ବର୍ଷ ବଡ ସିଙ୍ଗର କିଶୋର କୁମାରଙ୍କ ସହ ତାଙ୍କର ପ୍ରେମ ସମ୍ପର୍କ ଗଢ଼ି ଉଠିଲା। ୧୯୮୦ ରେ ସେମାନେ ବିବାହ କଲେ। ମାତ୍ର ଲୀଲାଙ୍କ ପରିବାର ଏହି ବିବାହକୁ ବିରୋଧ କରୁଥିଲେ। କାରଣ କିଶୋର ପୂର୍ବରୁ ୩ ଥର ବିବାହ କରିସାରିଥିଲେ। ବିବାହ ପରେ ତାଙ୍କର ଏକ ପୁତ୍ର ସନ୍ତାନ ଜନ୍ମ ନେଇଥିଲା। ବିବାହର ଅଳ୍ପ କିଛି ବର୍ଷ ପରେ କିଶୋରଙ୍କର ମୃତ୍ୟୁ ଘଟିଲା। ଫଳlରେ ଲୀନା ପୁଣିଥରେ ବିଧବା ହେଲେ। ସେହି ସମୟରେ ତାଙ୍କର ବୟସ ମାତ୍ର ୩୭ ଥିଲା। ଶେଷଥର ପାଇଁ ଲୀନାଙ୍କୁ ୧୯୮୫ରେ ଫିଲ୍ମ ‘ସରଫୋରୋଶ’ ରେ ଦେଖିବାକୁ ମିଳିଥିଲା। ଏବେ ଲୀନା ନିଜ ପୁଅ ସହ ମୁମ୍ବାଇରେ ରହୁଛନ୍ତି।