ଜଣେ ମହିଳା ମାସକୁ ୪୦ ଲକ୍ଷ ଟଙ୍କା ଦରମା ପାଉଥିଲେ। ମାତ୍ର ଚାକିରି ଛାଡ଼ି ସେ ସଫେଇ କାମ କରିବାରେ ଲାଗିଲେ। ଏହି ମହିଳାଙ୍କ ନାମ କ୍ଲେୟର ବର୍ଟନ। ସେ ବ୍ରିଟେନରେ ରୁହନ୍ତି।
କ୍ଲେୟରଙ୍କ କହିବା ଅନୁଯାୟୀ, ସଫେଇ କରିବା କାମ କର୍ପୋରେଟ ଚାକିରିରେ ସବୁଠୁ ନିଆରା। ଏହି ନିଷ୍ପତ୍ତି ତାଙ୍କ କ୍ୟାରିୟରର ସବୁଠୁ ଭଲ ପଦକ୍ଷେପ।
ଏକ ରିପୋର୍ଟ ଅନୁଯାୟୀ, ମାସକୁ ୪୦ ଲକ୍ଷ ଟଙ୍କା ରୋଜଗାର କରୁଥିବା କ୍ଲେୟର ଚାକିରି ଛାଡ଼ି ଏବେ ୬ ଗ୍ରାହକଙ୍କୁ ସଫେଇ କାମରେ ନିଯୁକ୍ତ କରାଇଛନ୍ତି। ଏହି କାମ ସେ ଇନ୍ଷ୍ଟାଗ୍ରାମରେ ମିଷ୍ଟର ହିଞ୍ଚ ନାମକ ଜଣେ ୟୁଜରଙ୍କୁ ଦେଖି ଆରମ୍ଭ କରିଥିଲେ।
କ୍ଲେୟର ୨୦୦୧ରେ ଏକ ହାଇ ଷ୍ଟ୍ରିଟ୍ ବ୍ୟାଙ୍କ ପାଇଁ ସେବା ପ୍ରତିନିଧି ରୂପରେ କାର୍ଯ୍ୟ କରୁଥିଲେ। ଏହି ସମୟରେ ସେ ଦେଢ଼ ଲକ୍ଷ ଟଙ୍କା ରୋଜଗାର କରୁଥିଲେ। ଏହି ସମୟରେ ସେ ତାଙ୍କ ବୟଫ୍ରେଣ୍ଡ ଡେଭ୍ଙ୍କୁ ୨୦୦୩ରେ ବିବାହ କରିଥିଲେ।
୨୦୧୭ରେ ପ୍ରମୋଶନ ପାଇବା ପରେ କ୍ଲେୟରଙ୍କ ମାସକୁ ଦରମା ୪୦ ଲକ୍ଷ ହୋଇଥିଲା। ମାତ୍ର ଏହି ବର୍ଷ ହିଁ ତାଙ୍କ ପିତା ଲିଭର କ୍ୟାନସରରେ ମୃତ୍ୟୁବରଣ କରିଥିଲେ। ଏହାର ୧ ବର୍ଷ ପରେ ଅର୍ଥାତ୍ ୨୦୧୮ରେ ବିବାହ ବିଚ୍ଛେଦ ହୋଇଥିଲା। ଏହିଦିନଠାରୁ ସେ ବହୁତ ଭାଙ୍ଗି ପଡ଼ିଥିଲେ।
କ୍ଲେୟର କୁହନ୍ତି, ମୁଁ ଏହି ସମୟରେ ଭାବୁଥିଲି ମୋ ଜୀବନ ବୋଧେ ସରିଗଲା। କିଛି ମାସ ଏକୁଟିଆ ରହିଲି। ଏହି ସମୟର ଗୋଟିଏ କଥା ମୋ ମନକୁ ଆସିଲା ସଫେଇ। ସେହିଦିନଠାରୁ ନିଷ୍ପତ୍ତି ନେଲି ସଫେଇ କରିବି। ସପ୍ତାହକୁ ୪ ଘଣ୍ଟା ସଫେଇ କାମ କଲି। ଏଥିରୁ ମୋତେ ବହୁତ ଶାନ୍ତି ମିଳିଲା। ୨୦୧୯ ବେଳକୁ ମୁଁ ନିଜକୁ ସମ୍ଭାଳି ନେଇଥିଲି। ଏବେ ଏହି କାମରେ ମୁଁ ୬ ଜଣଙ୍କୁ ନିଯୁକ୍ତ କରିଛି। ଏଥିରୁ ଏବେ ଦି’ ପଇସା ରୋଜଗାର ବି କରୁଛି। ମୋ ଖର୍ଚ୍ଚ ପାଇଁ ପର୍ଯ୍ୟାପ୍ତ ଅର୍ଥ ମୋ ନିକଟରେ ରହିଛି। ଯାହାକି ମୋ ପାଇଁ ବହୁତ। ମୁଁ ଏବେ ମୋ ସ୍ବପ୍ନରେ ବଞ୍ଚୁଛି।