ପାଟଣା,୧୧ା୭(ସ୍ବ.ପ୍ର.): କେନ୍ଦୁଝର ଜିଲା ପାଟଣା ଥାନା କୁଣ୍ଡଳା କାଜୁ ବଗିଚାରୁ ସୋମବାର ସକାଳୁ ଜଣେ ନବଜାତକକୁ ଉଦ୍ଧାର କରାଯାଇଛି। କେହି କାଜୁ ଗଛମୂଳେ ଏକ ଜରି ବ୍ୟାଗ୍ ଉପରେ ଶିଶୁକନ୍ୟାକୁ ଛାଡ଼ି ଚାଲି ଯାଇଥିବା ଜଣାପଡ଼ିଛି। ଶିଶୁକନ୍ୟା ନାଭି କଟା ଯାଇ ନ ଥିବା ବେଳେ ଶିଶୁଟି ୨/୩ ଦିନର ହେବ ବୋଲି ଜଣାପଡ଼ିଛି। ସୋମବାର ସକାଳୁ କେତେକ ଲୋକେ ଶିଶୁଟିର କୁଆଁକୁଆଁ ରାବ ଶୁଣି ସ୍ଥାନୀୟ ସରପଞ୍ଚ ଶତ୍ରୁଘ୍ନ ନାଏକ ଓ ଆଶାକର୍ମୀ ଡାଳିମ୍ବ ମହାନ୍ତଙ୍କୁ ଖବର ଦେବା ପରେ ସରପଞ୍ଚ ସ୍ଥାନୀୟ ପୋଲିସକୁ ଖବର ଦେଇଥିଲେ। ପାଟଣା ପୋଲିସ ପକ୍ଷରୁ ଏଏସ୍ଆଇ ପଦ୍ମାବତୀ ବିଶ୍ୱାଳ ପହଞ୍ଚି ଶିଶୁକନ୍ୟାକୁ ଉଦ୍ଧାର କରି ପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଛନ୍ତି। ଶିଶୁକନ୍ୟାଟି ସୁସ୍ଥ ଥିବା ସୂଚନା ମିଳିଛି। ନବଜାତକକୁ କାଜୁ ବଗିଚାରେ ଛାଡ଼ି ଯିବା ନେଇ ନାନା କଥା ଶୁଣିବାକୁ ମିଳୁଛି।