ଚେନ୍ନାଇ,୨୪।୭(ପି.ଟି.): ଦେଢଲକ୍ଷ ଆମେରିକୀୟ ଡଲାର ପୁରସ୍କାର ରାଶି ବିଶିଷ୍ଟ ଲିଜେଣ୍ଡ୍ସ ଅଫ୍ ଚେସ୍ ଅନ୍ଲାଇନ୍ ଟୁର୍ନାମେଣ୍ଟରେ ପୂର୍ବତନ ବିଶ୍ୱଚାମ୍ପିୟନ ତଥା ଭାରତୀୟ ଗ୍ରାଣ୍ଡ ମାଷ୍ଟର ବିଶ୍ୱନାଥନ୍ ଆନନ୍ଦଙ୍କ ଖରାପ ପ୍ରଦର୍ଶନ ଜାରି ରହିଛି। ସେ କ୍ରମାଗତ ତୃତୀୟ ପରାଜୟ ବରଣ କରିଛନ୍ତି। ଗୁରୁବାର ତୃତୀୟ ରାଉଣ୍ଡ ମ୍ୟଚ୍ରେ ସେ ରୁଷିଆ ଭ୍ଳାଡିମୀର କ୍ରାମ୍ନିକଙ୍କଠାରୁ ପରାସ୍ତ ହୋଇଛନ୍ତି। ସେ କ୍ରାମନିକ୍ଙ୍କଠାରୁ ୦.୫-୨.୫ ବ୍ୟବଧାନରେ ପରାସ୍ତ ହୋଇଛନ୍ତି।
ସେ ପୂର୍ବରୁ ପ୍ରଥମ ଦୁଇଟି ରାଉଣ୍ଡରେ ଯଥାକ୍ରମେ ପିଟର ସ୍ବୀଡଲର ଓ ମାଗ୍ନସ କାର୍ଲସେନଙ୍କଠାରୁ ପରାସ୍ତ ହୋଇଥିଲେ। ତୃତୀୟ ରାଉଣ୍ଡରେ ମଧ୍ୟ ସେ ପ୍ରତ୍ୟାବର୍ତ୍ତନ କରି ନ ପାରି ପରାସ୍ତ ହୋଇଛନ୍ତି। ଆରମ୍ଭରୁ ଲଢୁଆ ଖେଳ ପ୍ରଦର୍ଶନ କରିଥିଲେ ମଧ୍ୟ କ୍ରାମନିକ ଦୃଢ ପ୍ରତ୍ୟାବର୍ତ୍ତନ କରି ବାଜି ମାରିଥିଲେ। ଏହି ପରାଜୟ ସହ ଆନନ୍ଦଙ୍କ ଟାଇଟଲ ଆଶା ଶେଷ ହୋଇଛି। ବିଶ୍ୱର ଏକ ନମ୍ବର ଖେଳାଳି କାର୍ଲସେନ ଓ ସ୍ବୀଡଲର ୩ଟି ବିଜୟ ସହ ୯ ପଏଣ୍ଟ ହାସଲ କରି ଯୁଗ୍ମ ଭାବେ ଶୀର୍ଷ ସ୍ଥାନରେ ରହିଛନ୍ତି। ଚତୁର୍ଥ ରାଉଣ୍ଡରେ ଆନନ୍ଦ ନେଦରଲାଣ୍ଡର ଅନିଶ୍ ଗିରିଙ୍କୁ ଭେଟିବେ। ବିଶ୍ୱର ୩ ନମ୍ବର ଖେଳାଳି ଡିଙ୍ଗ୍ ଲିରେନଙ୍କ ସଂଘର୍ଷ ଜାରି ରହିଛି। ଅଗ୍ରଣୀ ହାସଲ କରିଥିଲେ ମଧ୍ୟ ଶେଷରେ ସେ ୟୁକ୍ରେନର ଅଭିଜ୍ଞ ଖେଳାଳି ଭାସିଲ ଇଭାନ୍ଚୁକ୍ଙ୍କଠାରୁ ୧.୫- ୦.୫ରେ ପରାସ୍ତ ହୋଇଥିଲେ। ଏବେ ଆନନ୍ଦ ଓ ଲିରେନ୍ ବିନା ବିଜୟ ସହ ପଏଣ୍ଟ ତାଲକାର ନିମ୍ନରେ ରହିଛନ୍ତି। ସବୁ ରାଉଣ୍ଡ ରବିନ୍ ଗେମ୍ ବେଷ୍ଟ ଅଫ୍ ଫୋର ଗେମ୍ କଣ୍ଟେଷ୍ଟ ପଦ୍ଧତିରେ ଖେଳାଯାଉଛି। ଏହି ଟୁର୍ନାମେଣ୍ଟରେ ବିଶ୍ୱରେ ଶ୍ରେଷ୍ଠ ୬ ଜଣ କିମ୍ବଦନ୍ତୀ ଖେଳାଳି ଅଂଶଗ୍ରହଣ କରୁଛନ୍ତି। ଏହି ଟୁର୍ନାମେଣ୍ଟ ମାଗ୍ନସ କାର୍ଲାସେନ ଚେସ୍ ଟୁରର ଏକ ଅଂଶବିଶେଷ ଓ ଆନନ୍ଦ ପ୍ରଥମଥର ପାଇଁ ଏହି ଟୁର୍ନାମେଣ୍ଟ ଖେଳୁଛନ୍ତି। ଏହି ଟୁର୍ନାମେଣ୍ଟର ବିଜେତା ୩ ଲକ୍ଷ ଆମେରିକୀୟ ଡଲାର ପୁରସ୍କାର ରାଶି ବିଶିଷ୍ଟ ଗ୍ରାଣ୍ଡ ଫାଇନାଲ ଖେଳିବାକୁ ଯୋଗ୍ୟତା ହାସଲ କରିବେ ଓ ଏହା ଅଗଷ୍ଟ ୯ରୁ ୨୦ ତାରିଖ ମଧ୍ୟରେ ଆୟୋଜନ ହେବ।
