ଚେନ୍ନାଇ,୨୫।୭(ପି.ଟି.): ଦେଢଲକ୍ଷ ଆମେରିକୀୟ ଡଲାର ପୁରସ୍କାର ରାଶି ବିଶିଷ୍ଟ ଲିଜେଣ୍ଡ୍ସ ଅଫ୍ ଚେସ୍ ଅନ୍ଲାଇନ୍ ଟୁର୍ନାମେଣ୍ଟରେ ପୂର୍ବତନ ବିଶ୍ୱ ଚାମ୍ପିୟନ ତଥା ଭାରତୀୟ ଗ୍ରାଣ୍ଡ ମାଷ୍ଟର ବିଶ୍ୱନାଥନ୍ ଆନନ୍ଦ କ୍ରମାଗତ ଚତୁର୍ଥ ପରାଜୟ ବରଣ କରିଛନ୍ତି। ଚତୁର୍ଥ ରାଉଣ୍ଡ ମୁକାବିଲାରେ ସେ ନେଦରଲାଣ୍ଡ୍ସର ଆନିଶ୍ ଗିରିଙ୍କଠାରୁ ପରାସ୍ତ ହୋଇଛନ୍ତି।
ଚତୁର୍ଥ ରାଉଣ୍ଡ ମୁକାବିଲାରେ ଦୁଇ ତାରକା ୪ଟି ଡ୍ରରେ ମୁହଁାମୁହିଁ ହୋଇଥିଲେ। ତେବେ ଶେଷରେ ଅର୍ମାଗେଡ୍ଡନ ଗେମ୍ ଟାଇ-ବ୍ରେକରରେ ଗିରି ବାଜି ମାରିଥିଲେ। ପରାସ୍ତ ହୋଇଥିଲେ ମଧ୍ୟ ଆନନ୍ଦ ପ୍ରଥମ ପଏଣ୍ଟ ହାସଲ କରିଛନ୍ତି ଓ ତାଲିକାର ସର୍ବନିମ୍ନ ସ୍ଥାନରେ ରହିଛନ୍ତି। ଏହାପୂର୍ବରୁ ସେ ପିଟର ସ୍ବିଡଲର, ମାଗ୍ନସ କାର୍ଲସେନ ଓ ଭ୍ଲାଡମିର କ୍ରାମନିକଙ୍କଠାରୁ ପରାସ୍ତ ହୋଇଥିଲେ। ଆନନ୍ଦ ମାଗ୍ନସ କାର୍ଲସେନ ଟୁରରେ ପ୍ରଥମଥର ପାଇଁ ଖେଳିବାର ସୁଯୋଗ ହାସଲ କରିଛନ୍ତି। ଆନନ୍ଦ ପଞ୍ଚମ ରାଉଣ୍ଡରେ ଏବେ ପିଟର ଲେକୋଙ୍କୁ ଭେଟିବେ। ପୂର୍ବରୁ ମାଗ୍ନସ କାର୍ଲସେନଙ୍କ ସହ ଯୁଗ୍ମ ଅଗ୍ରଣୀ ହାସଲ କରିଥିବା ରୁଷିଆର ସ୍ବୀଡଲର ୧.୫- ୨.୫ରେ ଚାଇନାର ଡିଙ୍ଗ ଲିରେନଙ୍କଠାରୁ ପରାସ୍ତ ହୋଇଥିଲେ। ଫଳରେ ବିଶ୍ୱର ଏକ ନମ୍ବର ଖେଳାଳି କାର୍ଲସେନ ୧୨ ପଏଣ୍ଟ ହାସଲ କରି ଏକକ ଅଗ୍ରଣୀ ହୋଇଛନ୍ତି। ଏଥିସହିତ ଲିରେନ ଟୁର୍ନାମେଣ୍ଟର ପ୍ରଥମ ବିଜୟ ହାସଲ କରିଛନ୍ତି। ଅନ୍ୟଏକ ଚତୁର୍ଥ ରାଉଣ୍ଡ ମୁକାବିଲାରେ କାର୍ଲସେନ ଅତି ସହଜରେ ଅଭିଜ୍ଞ ଇସ୍ରାଏଲ ଖେଳାଳି ବୋରିସ ଜେଲଫାଣ୍ଡଙ୍କୁ ୩-୦ରେ ପରାସ୍ତ କରିଛନ୍ତି। ସେହିପରି ଅନ୍ୟଏକ ମୁକାବିଲାରେ ଭ୍ଲାଡମିର କ୍ରାମନିକ ୨.୫- ୧.୫ରେ ପିଟର ଲେକୋଙ୍କୁ ପରାସ୍ତ କରିଥିଲେ। ଇଆନ ନେପୋମିନିମଚି ୨.୫- ୧.୫ରେ ଭାସିଲ ଇଭାନଚୁକଙ୍କୁ ପରାସ୍ତ କରିଛନ୍ତି। ସବୁ ରାଉଣ୍ଡ ରବିନ୍ ମ୍ୟାଚ୍ ବେଷ୍ଟ ଅଫ୍ ଗେମ୍ ନିୟମରେ ଖେଳାଯାଉଛି। ଏହି ଟୁର୍ନାମେଣ୍ଟ ମାଗ୍ନସ କାର୍ଲସେନ ଚେସ୍ ଟୁରର ଅଂଶବିଶେଷ। ଏହି ଟୁର୍ନାମେଣ୍ଟ ବିଜେତା ଖେଳାଳି ୩ ଲକ୍ଷ ଆମେରିକୀୟ ଡଲାର ପୁରସ୍କାର ରାଶିବିଶିଷ୍ଟ ଗ୍ରାଣ୍ଡ ଫାଇନାଲ ଖେଳିବାକୁ ଯୋଗ୍ୟତା ହାସଲ କରିବେ। ଏହି ଗ୍ରାଣ୍ଡ ଫାଇନାଲ ଅଗଷ୍ଟ ୨ରୁ ୨୦ ତାରିଖ ମଧ୍ୟରେ ଖେଳାଯିବ।
