ବଡ଼ବିଲ,୧୪ା୧୨(ସ୍ବ.ପ୍ର.): କେନ୍ଦୁଝର ଜିଲା ଖଣି ଅଞ୍ଚଳ ବଡ଼ବିଲ ଓ ରୁଗୁଡ଼ିରେ ଥିବା ୪ଟି କାରଖାନାକୁ ବୁଧବାର ଗସ୍ତ କରି ଫେରିଛନ୍ତି ବିଧାନ ସଭା ଗୃହ କମିଟିର ସବ୍ କମିଟି-୩। ଜଳ, ଶବ୍ଦ ଓ ବାୟୁ ପ୍ରଦୂଷଣ ରୋକିବା ଦିଗରେ ଶିଳ୍ପ ସଂସ୍ଥାଗୁଡ଼ିକ କିଭଳି ବ୍ୟବସ୍ଥା କରିଛନ୍ତି ତା’ର ତଦାରଖ କରିଛନ୍ତି ଏହି ବିଧାନସଭା ଗୃହ କମିଟିର ସବ୍ କମିଟି।
ସୂଚନା ଅନୁଯାୟୀ, ରାଜ୍ୟରେ ପ୍ରଦୂଷଣ ରୋକିବା ଦିଗରେ ଶିଳ୍ପ ସଂସ୍ଥାଗୁଡ଼ିକ କେଉଁ ସବୁ ପଦକ୍ଷେପ ଗ୍ରହଣ କରିଛନ୍ତି ତା’ର ସମୀକ୍ଷା କରିବାକୁ ରାଜ୍ୟର ବିଭିନ୍ନ ଜିଲାର ଖଣି, ଶିଳ୍ପାନୁଷ୍ଠାନର କ୍ଷେତ୍ର ପରିଦର୍ଶନ କରୁଛନ୍ତି ବିଧାନ ସଭା ଗୃହ କମିଟି। ଏହି ପରିପ୍ରେକ୍ଷୀରେ ବୁଧବାର ପୂର୍ବାହ୍ନରେ କେନ୍ଦୁଝର ଜିଲାର ଖଣି ଅଞ୍ଚଳ ବଡ଼ବିଲ ଓ ରୁଗୁଡିରେ ଥିବା ବିଭିନ୍ନ କାରଖାନାଗୁଡିକୁ ଗସ୍ତ କରି ଜଳ, ଶବ୍ଦ ଓ ବାୟୁ ପ୍ରଦୂଷଣ ରୋକିବା ଦିଗରେ ଶିଳ୍ପ ସଂସ୍ଥାମାନେ କିଭଳି ବ୍ୟବସ୍ଥା କରିଛନ୍ତି ତା’ର ତଦାରଖ କରିଛନ୍ତି । କମିଟିର ଅଧ୍ୟକ୍ଷ ବଦ୍ରିନାରାୟଣ ପାତ୍ରଙ୍କ ନେତୃତ୍ୱରେ ସରକାରୀ ଚିଫ୍ ହ୍ବିପ୍ ତଥା ଜଗତସିଂହପୁର ବିଧାୟକ ପ୍ରଶାନ୍ତ କୁମାର ମୁଦୁଲି ଓ ଚମ୍ପୁଆ ବିଧାୟିକା ମିନାକ୍ଷୀ ମହାନ୍ତ ପ୍ରମୁଖ ବିଭିନ୍ନ ଶିଳ୍ପାନୁଷ୍ଠାନ ପରିଦର୍ଶନ କରି ସ୍ଥିତି ଅନୁଧ୍ୟାନ କରିଛନ୍ତି। ବଡ଼ବିଲଠାରେ ଥିବା ଶ୍ରୀ ଜଗନ୍ନାଥ ଷ୍ଟିଲ ଆଣ୍ଡ୍ ପାଓ୍ବାର ଲିମିଟେଡ୍ କାରଖାନାକୁ ପରିଦର୍ଶନ କରି ପ୍ରଦୂଷଣ ସମ୍ବନ୍ଧୀୟ ସ୍ଥିତି ପରଖିବା ପରେ ଆରିୟା ଆଇରନ ଆଣ୍ଡ୍ ଷ୍ଟିଲ, ରୁଗୁଡ଼ିଠାରେ ଥିବା ଶ୍ରୀ ମେଟାଲିକ୍ସ ଏବଂ କେଜେ ଏସ୍ ଆଲୁଓ୍ବାଲିଆ କାରଖାନାକୁ ଯାଇ ପ୍ରଦୂଷଣ ଓ ପରିବେଶ ସଂକ୍ରାନ୍ତୀୟ ସମସ୍ୟା ଉପରେ ତଦାରଖ କରିଥିଲେ। କମ୍ପାନୀ ପକ୍ଷରୁ ବର୍ଜ୍ୟଜଳ ପରିଚାଳନା, ଓ୍ବାଟର ଟ୍ରିଟମେଣ୍ଟ ପ୍ଲାଣ୍ଟ, ଗ୍ରୀନ କରିଡର ଓ ଧୂଳି ଧୁଆଁ ନିୟନ୍ତ୍ରଣ ବ୍ୟବସ୍ଥାକୁ ନେଇ ଅସନ୍ତୋଷ ଜାହିର କରି ବିରକ୍ତି ଭାବ ପ୍ରକାଶ କରିଥିଲେ କମିଟି ସଦସ୍ୟ। ପ୍ରଦୂଷଣ ନିୟନ୍ତ୍ରଣ ନେଇ କମ୍ପାନୀ କର୍ତ୍ତୃପକ୍ଷଙ୍କୁ ତାଗିଦ କରିବା ସହ ସୁସ୍ଥ ପରିବେଶ ନିମନ୍ତେ ଆବଶ୍ୟକ ବ୍ୟବସ୍ଥା ଗ୍ରହଣ କରିବାକୁ ପରାମର୍ଶ ଦେଇଥିଲେ କମିଟି। ଏହି ଗସ୍ତ ସମୟରେ ପ୍ରଦୂଷଣ ନିୟନ୍ତ୍ରଣ ବୋର୍ଡର ଆଞ୍ଚଳିକ ଅଧିକାରୀ, କେନ୍ଦୁଝରଙ୍କ ସମେତ ସ୍ଥାନୀୟ ପ୍ରାଶାସନିକ ଅଧିକାରୀମାନେ ଉପସ୍ଥିତ ଥିଲେ। ଏହି ୪ଟି କାରଖାନା ଗସ୍ତ ପରେ କମିଟି କେନ୍ଦୁଝରରେ ଏକ ରିଭ୍ୟୁ ମିଟିଂ ପାଇଁ ଗସ୍ତ କରିଥିବା ଜଣାପଡ଼ିଛି।