ମାଲକାନଗିରି,୨୯ା୫: ଦିନ ଥିଲା ମାଓବାଦୀ ସଙ୍ଗଠନର ସେ ନେତୃତ୍ୱ ନେଉଥିଲେ। ତାଙ୍କ ନିର୍ଦ୍ଦେଶରେ ପରିଚାଳିତ ହେଉଥିଲେ ସମସ୍ତେ। ଯେକୌଣସି ସ୍ଥାନରେ ପୋଲିସ ଉପରକୁ ଆକ୍ରମଣ ହେଉ ଅବା ହତ୍ୟା ଘଟଣାର ସେ ପ୍ରସ୍ତୁତ କରୁଥିଲେ ନକ୍ସା। ସେ ଥିଲେ ମହିଳା ମାଓବାଦୀଙ୍କ କମାଣ୍ଡର। ଯେଉଁ ହାତ ଦିନେ ବନ୍ଧୁକ ଧରୁଥିଲା, ସେହି ହାତ ଏବେ ଲୋକଙ୍କୁ ନିଃସ୍ବାର୍ଥପର ସେବା ଯୋଗାଇ ଦେଉଛି। ଅତୀତରେ ମାଓବାଦୀ ଥିବା ଏପରି ଜଣେ ମହିଳା ହେଉଛନ୍ତି ଦାନସୁରି ଅଂଶୁୟା ଓରଫ୍ ସିତକା।
୧୬ ବର୍ଷ ବୟସରୁ ଦାନସୁରି ମାଓବାଦୀ ସଙ୍ଗଠନରେ ଯୋଗ ଦେଇଥିଲେ। ଦୀର୍ଘ ୧୭ ବର୍ଷ କାର୍ଯ୍ୟ କରିଥିଲେ। ସେଠାରେ ୧୦ ବର୍ଷ କମାଣ୍ଡର ରୂପେ କାର୍ଯ୍ୟ କରିଥିଲେ। ତେବେ ଲୋକଙ୍କ ଜୀବନ ନେବା, ସ୍ଥାନୀୟ ଅଞ୍ଚଳର ବିକାଶରେ ବାଧା ସୃଷ୍ଟି କରିବା, ଲୋକଙ୍କୁ ଭୟଭୀତ କରି ରଖିବା ଘଟଣା ତାଙ୍କ ଉପରେ ବେଶ୍ ପ୍ରଭାବ ପକାଇଥିଲା। ଯେଉଁ ଲକ୍ଷ୍ୟ ଆଦର୍ଶ ନେଇ ସେ ମାଓବାଦୀ ସଙ୍ଗଠନରେ ଯୋଗଦେଇଥିଲେ ତାହା ସୁଦୂର ପରାହତ ହୋଇଥିବା ଅନୁଭବ କରି ଶେଷରେ ସେ ମାଓବାଦୀ ସଙ୍ଗଠନ ଛାଡିଲେ। ଲୋକଙ୍କ ସହ ରହି ସେବା କରିବାକୁ ଚିନ୍ତା କରି ଦାନସୁରି କଂଗ୍ରେସରେ ଯୋଗ ଦେଇଥିଲେ। ନିର୍ବାଚନରେ ମାଲକାନଗିରି ଜିଲା ସୀମାନ୍ତ ତେଲଙ୍ଗାନା ରାଜ୍ୟ ମୁଲକୁଲ ନିର୍ବାଚନ ମଣ୍ଡଳୀରୁ ନିର୍ବାଚନ ଲଢି ଏବେ ସେ ବିଧାୟିକା। କରୋନା ମହାମାରୀ ସମୟରେ ଗାଁ ଗାଁ ବୁଲି ଲୋକଙ୍କୁ କରୋନା ସମ୍ପର୍କରେ ସଚେତନ କରୁଛନ୍ତି। ଗରିବ ରୋଗୀଙ୍କୁ ଡାକ୍ତରଖାନା ନେଇ ତାଙ୍କ ଚିକତ୍ସା କରାଉଛନ୍ତି। ଅସହାୟ ଲୋକଙ୍କୁ ଖାଦ୍ୟ ଦେଉଛନ୍ତି। ନିଜ ନିର୍ବାଚନ ମଣ୍ଡଳୀର ଶିକ୍ଷା, ଗମନାଗମନ, ପାନୀୟ ଜଳ ସମସ୍ୟା ଉପରେ ଗୁରୁତ୍ୱ ଦେଇ ଲୋକଙ୍କ ସେବାରେ ଲାଗିଛନ୍ତି ଦାନସୁରି। ଜଣେ ମହିଳା ମାଓବାଦୀ କମାଣ୍ଡରଙ୍କ ଏପରି ପରିବର୍ତ୍ତନ ଅନ୍ୟମାନଙ୍କ ପାଇଁ ଉଦାହରଣ ପାଲଟିଛି।