ସାଧାରଣତଃ ଛୋଟ ପିଲାମାନେ ଖେଳୁଥିବା ସମୟରେ କିଛିନା କିଛି ଜିନିଷ ପାଟି କିମ୍ବା ନାକରେ ପୂରାଇ ଥାନ୍ତି। ଏପରି ଏକ ଘଟଣା ନ୍ୟୁଜିଲାଣ୍ଡରେ ଘଟିଥିଲା। ଏଠାରେ ଏକ ଶିଶୁ ଖେଳୁଥିବା ସମୟରେ ନାକରେ ଏକ ଲେଗୋ ଖଣ୍ଡ ପୂରାଇ ଦେଇଥିଲେ। ଘଟଣାର ଦୁଇ ବର୍ଷ ପରେ ଏବେ ତାଙ୍କ ନାକରୁ ବାହାରି ଆସିଛି। ଆଶ୍ଚର୍ଯ୍ୟର କଥା, ସେତେବେଳେ ଡାକ୍ତରମାନେ ନାକ ଭିତରେ ସେହି ଲେଗୋ ପାଇ ନଥିଲେ।
ସାତ ବର୍ଷର ସମୀର ଅନୱାର ତାଙ୍କ ପିତାମାତାଙ୍କ ସହ ନ୍ୟୁଜିଲ୍ୟାଣ୍ଡର ଦକ୍ଷିଣରେ ଥିବା ଡ୍ୟୁନିଡେନରେ ରୁହନ୍ତି। ୨୦୧୮ରେ ସମୀରଙ୍କୁ ପାଞ୍ଚ ବର୍ଷ ହୋଇଥିବାବେଳେ ତାଙ୍କ ନାକରେ ଏକ ଲେଗୋ ଖଣ୍ଡ ପୂରାଇଦେଇଥିଲେ। ସମୀରଙ୍କ ପିତା ମୁଦସିର ତାଙ୍କ ନାକରୁ ବାହାର କରିବାକୁ ଚେଷ୍ଟା କରିଥିଲେ କିନ୍ତୁ ଲେଗୋ ଖଣ୍ଡ ପାଇଲେ ନାହିଁ। ସେ ସଙ୍ଗେ ସଙ୍ଗେ ପିଲାଟି ସହିତ ଡାକ୍ତରଙ୍କ ନିକଟକୁ ଯାଇଥିଲେ। ଏପରିକି ଡାକ୍ତରମାନେ ଲେଗୋ ଖଣ୍ଡ ପାଇଲେ ନାହିଁ। ଶିଶୁର ଖାଦ୍ୟ ପାଇପରୁ ସେ ବାହାରକୁ ଆସିବ ବୋଲି ଡାକ୍ତର କହିଥିଲେ। ତାଙ୍କ ନାକରେ କୌଣସି ଯନ୍ତ୍ରଣା ହୋଇ ନ ଥିଲା କିମ୍ବା ଶ୍ୱାସ ନେବାରେ ତାଙ୍କର କୌଣସି ଅସୁବିଧା ନ ଥିଲା। ତେଣୁ ତାଙ୍କ ମାତାପିତା ମଧ୍ୟ ଏହି କଥା ଭୁଲିଗଲେ।
ଅଗଷ୍ଟ ୧୬ ରାତିରେ ସମୀର ଗୋଲାପୀ କପକେକ ଖାଇବାକୁ ତଳକୁ ନଇଁ ପ୍ରଥମେ ତାକୁ ଶୁଂଘିଥିଲେ। ତା’ପରେ ନାକରେ ପ୍ରବଳ ଯନ୍ତ୍ରଣା ହେଲା। ସମୀର ଏବଂ ତାଙ୍କ ମାତାପିତା ଭାବିଲେ ଯେ ବୋଧହୁଏ କେକର କିଛି ଅଂଶ ତାଙ୍କ ନାକ ଭିତରେ ପଶିଯାଇଛି। ମାତାପିତା ତାଙ୍କୁ ଜୋରରେ ଚାପ ଦେଇ ନାକରୁ ନିଶ୍ୱାସ ନେବାକୁ କହିଥିଲେ। ଏହାପରେ ସମୀର ଛିଙ୍କିଲେ, ନାକ ଭିତରୁ କଳା ରଙ୍ଗର ଲେଗୋ ଖଣ୍ଡଟି ବାହାରିଥିଲା।
