ଭୁବନେଶ୍ୱର, ୨୮ା୬(ସରୋଜ ଜେନା): ଓଡ଼ିଶା ଫୁଟବଲ୍ କ୍ଲବ୍(ଓଏଫ୍ସି) ପକ୍ଷରୁ ଆସନ୍ତା ସିଜନ ପାଇଁ ମିଡଫିଲ୍ଡର ଲେନି ରୋଡ୍ରିଗ୍ବେଜ ଓ ଡିଫେଣ୍ଡର ଆମେ ରଣାଓ୍ବଡେଙ୍କ ସହ ଚୁକ୍ତି ସ୍ବାକ୍ଷର କରାଯାଇଛି। ମଙ୍ଗଳବାର ଲେନିଙ୍କ ସହିତ ଏକବର୍ଷର ଚୁକ୍ତି ସ୍ବାକ୍ଷର ହୋଇଥିବା ବେଳେ ଏକ ବର୍ଷର ଅପ୍ସନ ରହିଛି। ଅନ୍ୟ ପକ୍ଷରେ ଆମେଙ୍କୁ ଏକ ବର୍ଷ ପାଇଁ ମୁମ୍ବାଇ ସିଟି ଏଫ୍ସିରୁ ଲୋନ୍ରେ ଆଣିଛି ଓଏଫ୍ସି।
ଲେନିଏକାଧିକ କ୍ଲବ ପାଇଁ ଖେଳିଥିବା ବେଳେ ଆଇଏସଏଲ୍ ଟାଇଟଲ ମଧ୍ୟ ଜିତି ସାରିଛନ୍ତି। ଭାରତ ପାଇଁ ଖେଳି ସାରିଥିବା ଲେନି ଚର୍ଚ୍ଚିଲ ବ୍ରଦର୍ସରୁ କ୍ୟାରିୟର ଆରମ୍ଭ କରିଥିବା ବେଳେ ପରବର୍ତ୍ତୀ ସମୟରେ ଡେମ୍ପୋ, ବେଙ୍ଗାଲୁରୁ ଏଫ୍ସି, ଏଟିକେ ମୋହନ ବାଗାନ ଓ ଏଫ୍ସି ଗୋଆ ପାଇଁ ଖେଳିଛନ୍ତି। ଏଫ୍ସି ଗୋଆ ପକ୍ଷରୁ ସେ ସୁପର୍ କପ୍ ଜିତିଥିବାବେଳେ ଦୁଇ ଦୁଇ ଥର ଆଇ ଲିଗ୍, ଥରେ ଲେଖାଏ ଆଇଏସ୍ଏଲ, ଫେଡେରେଶନ କପ୍ ଓ ଡୁରାଣ୍ଡ କପ୍ ବିଜୟୀ ହୋଇଛନ୍ତି। ଲେନିଙ୍କ ଉପସ୍ଥିତିରେ ଦଳର ମିଡଫିଲ୍ଡ ଆକ୍ରମଣ ଅଧିକ ଶକ୍ତିଶାଳୀ ହେବ। ଅନ୍ୟ ପକ୍ଷରେ ମୁମ୍ବାଇ ସିଟି ଏଫ୍ସିର ଆମେ ରଣାଓ୍ବଡେଙ୍କ ଯୋଗଦାନ ଫଳରେ ଦଳର ଡିଫେନ୍ସ ଆହୁରି ଦୃଢ ହେବ ବୋଲି କ୍ଲବ ପକ୍ଷରୁ କୁହାଯାଇଛି। ୨୦୨୦-୨୧ରେ ମୁମ୍ବାଇର ଆଇଏସ୍ଏଲ ବିଜୟରେ ଆମେଙ୍କ ପ୍ରମୁଖ ଯୋଗଦାନ ରହିଥିଲା।