ଦେବଗଡ଼,୪ା୧: ଦେବଗଡ଼ ଜିଲା ବାରକୋଟ ବ୍ଲକ ଅଧୀନ ଚକଡିହୀ(ନୂଆଁ ବାରକୋଟ) ଗ୍ରାମରେ ଶନିବାର ରାତିରେ ବନ୍ୟଜନ୍ତୁ ଆକ୍ରମଣରେ ୧୫ଟି ଛେଳି ଓ ୨ଗୋରୁର ମୃତ୍ୟୁ ଘଟିଛି। ଏହାସହ ୪ଟି ଛେଳି ଗୁରୁତର ଆହତ ହୋଇଛନ୍ତି। ସେହିପରି ଉକ୍ତ ଗ୍ରାମର ୨୨ରୁ ଊର୍ଦ୍ଧ୍ୱ ଛେଳି ନିଖୋଜ ଥିବା ବେଳେ ଏନେଇ ଗ୍ରାମବାସୀ ଆତଙ୍କିତ ହୋଇପଡିଛନ୍ତି। ଆକ୍ରମଣକାରୀ ବନ୍ୟଜନ୍ତୁକୁ ଚିହ୍ନଟ କରିବା ନିମନ୍ତେ ବନବିଭାଗ ପକ୍ଷରୁ ନିକଟସ୍ଥ ଜଙ୍ଗଲରେ ସିସି ଟିଭି କ୍ୟାମେରା ଖଞ୍ଜାଯାଇଥିଲା । ସୋମବାର ଉକ୍ତ ସିସି ଟିଭି କ୍ୟାମେରାଗୁଡିକ ଯାଞ୍ଚ କରାଯାଇଥିଲେ ମଧ୍ୟ ଉତ୍ତୋଳିତ ଫୁଟେଜରେ କୌଣସି ବନ୍ୟଜନ୍ତୁଙ୍କର ଚିତ୍ର ଆସି ନ ଥିଲା। ସୋମବାର ଜଙ୍ଗଲର ଭିନ୍ନଭିନ୍ନ ସ୍ଥାନରେ ପୁଣି ୩ଟି ସିସି ଟିଭି କ୍ୟାମେରା ଖଞ୍ଜାଯାଇଥିବା ଜଣାପଡିଛି । ଦେବଗଡ ବନଖଣ୍ଡ ଅଧିକାରୀ କ୍ଷମା ଷଡଙ୍ଗୀ ନିଜେ ସଦଳବଳେ ପାହାଡ ଉପରକୁ ଚଢି ପରିସ୍ଥିତି ଅନୁଧ୍ୟାନ କରିବା ସହ ସେଠାରେ ପଡିଥିବା ଏକ ଗୋରୁର କ୍ଷତାକ୍ତ ମୃତଦେହ ଦେଖି ଫେରି ଆସିଥିଲେ । ସେହିପରି ଆହତ ଗୋରୁ ଓ ଛେଳି ଶରୀରରେ ରହିଥିବା ବନ୍ୟଜନ୍ତୁଙ୍କର ରାମ୍ପୁଡା ଚିହ୍ନ ପରଖିବା ସହ କ୍ଷତଚିହ୍ନ ଓ ପାରିପାର୍ଶ୍ୱିକ ପରିସ୍ଥିତି ଅନୁଧ୍ୟାନ କରିବା ପରେ ସମ୍ଭବତଃ ଚିତାବାଘ ଆକ୍ରମଣରେ ସେମାନେ ମୃତାହତ ହୋଇଥିବା ଅନୁମାନ କରାଯାଉଛି। ଶନିବାର ଅପରାହ୍ନରେ ଚକଡିହୀ ଗ୍ରାମର ଛେଳିଚରାଳିମାନେ ଜଙ୍ଗଲରୁ ଛେଳି ଚରାଇ ଫେରୁଥିବା ବେଳେ ଜଙ୍ଗଲ ମଧ୍ୟରେ କେତେକ ଛେଳି ହଠାତ ଏଣେତେଣେ ଜଙ୍ଗଲ ମଧ୍ୟକୁ ଧାଇଥିଲେ। ମାତ୍ର ସନ୍ଧ୍ୟାରେ ଉକ୍ତ ଛେଳି କେଉଁ ଆଡେ ଗଲେ ତାହା ଜଣାପଡି ନ ଥିଲା। ରବିବାର ସକାଳେ ଛେଳି ଚରାଳି ଜଙ୍ଗଲ ମଧ୍ୟକୁ ଯାଇ ନିଖୋଜ ଛେଳିସବୁ ଖୋଜିବାରୁ ସେଠାରେ ୧୨ଟି ଛେଳି ମରି ପଡିଥିବା ଓ ଅନ୍ୟ ୪ଟି ଛେଳି ଆହତ ହୋଇଥିବା ଦେଖିଥିଲେ। ଏ ସମ୍ପର୍କରେ ସୂଚନା ପାଇ ବାରକୋଟ ବନାଞ୍ଚଳ ଅଧିକାରୀ ଜୟଶ୍ରୀ ମୁର୍ମୁ, ବାରକୋଟ ସେକ୍ସନ ଫରେଷ୍ଟର କୁବେର ପ୍ରଧାନ ସଦଳବଳେ ଚକଡିହୀ ଗ୍ରାମକୁ ଯାଇ ପରିସ୍ଥିତି ଅନୁଧ୍ୟାନ କରିଥିଲେ ହେଁ ଛେଳିମାନେ କେଉଁ ବନ୍ୟଜନ୍ତୁଙ୍କ ଦ୍ୱାରା ମୃତାହତ ହୋଇଛନ୍ତି ତାହା ସ୍ପଷ୍ଟ ଭାବେ ଜାଣିପାରି ନ ଥିଲେ।