ନୂଆଦିଲ୍ଲୀ, ୧୨।୯ : ଦୁନିଆର ଦ୍ରୁତତମ ଦୌଡ଼ୁଥିବା ପ୍ରାଣୀ ଚିତା ବିଲୁପ୍ତ ହେବାର ପ୍ରାୟ ୫୦ ବର୍ଷ ପରେ ସେପ୍ଟେମ୍ବର୧୭ ରେ ଭାରତକୁ ପୁଣି ଆସିିବାକୁ ଯାଉଛି। କେନ୍ଦ୍ର ପରିବେଶ, ଜଙ୍ଗଲ ଏବଂ ଜଳବାୟୁ ପରିବର୍ତ୍ତନ ମନ୍ତ୍ରୀ ଭୁପେନ୍ଦ୍ର ଯାଦବ କହିଛନ୍ତି ଯେ ନାମ୍ବିଆ ଏବଂ ଦକ୍ଷିଣ ଆଫ୍ରିକାରୁ ୨୫ ରୁ ଅଧିକ ଚିତାଙ୍କୁ ମଧ୍ୟପ୍ରଦେଶର କୁନୋ-ପାଲପୁର ଜାତୀୟ ଉଦ୍ୟାନ (କେଏନପି) କୁ ପର୍ଯ୍ୟାୟକ୍ରମେ ଅଣାଯିବ। ମନ୍ତ୍ରୀ କହିଛନ୍ତି ଯେ ପ୍ରାରମ୍ଭରେ ସେପ୍ଟେମ୍ବର ୧୭ ରେ ଆଠଟି ଚିତାବାଘ କେଏନପିରେ ପହଞ୍ଚିବ। ଯାଦବ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହ୍ବାନ ଏବଂ କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂ ତୋମାରଙ୍କ ସହ ସେପ୍ଟେମ୍ବର ୧୭ ରେ ହେବାକୁ ଥିବା ଏହି କାର୍ଯ୍ୟକ୍ରମର ପ୍ରସ୍ତୁତି ବିଷୟରେ ସୂଚନା ଦେଇଛନ୍ତି।
ଶୋପୁର ଜିଲାର କେଏନପିରେ ସ୍ବତନ୍ତ୍ର ଭାବେ ନିର୍ମିତ ଏନକ୍ଲୋଜରରେ ଚିତାବାଘଙ୍କୁ ରଖାଯିବ। ଯାଦବ ଗ୍ବାଲିଅରରେ ଗଣମାଧ୍ୟମ ପ୍ରତିନିଧିମାନଙ୍କୁ କହିଛନ୍ତି ଯେ ଭବିଷ୍ୟତରେ ଚିତା ପ୍ରଜନନ ପ୍ରକଳ୍ପ ଅନ୍ତର୍ଗତ ନାମ୍ବିଆ ଏବଂ ଦକ୍ଷିଣ ଆଫ୍ରିକାରୁ ଚିତାବାଘ ଆସିବେ। ଏହି ଅବସରରେ, ଚୌହ୍ବାନ ଘୋଷଣା କରିଛନ୍ତି ଯେ କେଏନପିରେ ଥିବା ଗ୍ରାମଗୁଡିକରୁ ଯେଉଁଠାରୁ ଲୋକଙ୍କୁ ସ୍ଥାନାନ୍ତର କରାଯାଇଛି, ସେଗୁଡ଼ିକୁ ରାଜସ୍ବ ଗ୍ରାମ ମାନ୍ୟତା ଦିଆଯିବ। ଚୌହ୍ବାନ କହିଛନ୍ତି ଯେ ପୁନଃଉତ୍ପାଦନ ପ୍ରକଳ୍ପ ଅଧୀନରେ ଅନ୍ୟ ମହାଦେଶରୁ ଚିତା ଆଣିବା ଚଳିତ ଶତାବ୍ଦୀର ବନ୍ୟପ୍ରାଣୀ ଇତିହାସରେ ସବୁଠାରୁ ବଡ ଘଟଣା।
ସେ କହିଛନ୍ତି ଯେ କେବଳ ଭାରତ ନୁହେଁ ଏସିଆରୁ ବିଲୁପ୍ତ ହୋଇଯାଇଥିବା ଚିତା ଏବେ ଆସିବାକୁ ଯାଉଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜନ୍ମଦିନରେ ଚିତାଙ୍କୁ ଦୁଇଟି ଏନକ୍ଲୋଜରରେ ଛାଡିବେ। ଯେଉଁଠାରେ କିଛି ସମୟ ପାଇଁ ସେମାନଙ୍କୁ କ୍ୱାରାଣ୍ଟାଇନରେ ରଖାଯିବ। ପରେ ବଡ଼ ଏନକ୍ଲୋଜରରେ ସେମାନଙ୍କୁ ଛାଡ଼ି ଦିଆଯିବ।
