ପାଟଣା,୩।୮( ସ୍ବ.ପ୍ର.)-କେନ୍ଦୁଝର ଜିଲାର ୮୦ ପ୍ରତିଶତ ଅଧିବାସୀ ମୁଖ୍ୟତଃ କୃଷି ଉପରେ ନିର୍ଭର କରି ନିଜର ଗୁଜୁରାଣ ମେଣ୍ଟାଇଥାନ୍ତି। ଚଳିତ ବର୍ଷ କରୋନା ଯୋଗୁ ସବୁ କାମଧନ୍ଦା ମାନ୍ଦା ପଡ଼ିଥିବା ବେଳେ ଲୋକଙ୍କର ଅର୍ଥନୀତିର ମେରୁଦଣ୍ଡ ଭାଙ୍ଗି ପଡ଼ିଛି। ଏଭଳି ପରିସ୍ଥିତିରେ ଶେଷ ଆଶ୍ରା କରିଥିବା ଚାଷ ବି ଦାଉ ସାଧିବାକୁ ବସିଲାଣି। ଲୋକେ ଚାଷ ଉପରେ ଭରସା କରି ଯାହା କିଛି ସଞ୍ଚୟ କରିଥିଲେ ହଳ, ରୁଆ, ପୋତା ଓ ସାର ବେଉଷଣରେ ଖର୍ଚ୍ଚ କରିଥିଲେ। ହେଲେ ଧାରା ଶ୍ରାବଣ ମାସରେ ବି ବର୍ଷା ଚାଷୀଙ୍କୁ ଧୋକା ଦେଲା। ସ୍ବଳ୍ପ ବୃଷ୍ଟିପାତ ଓ ଅନାବୃଷ୍ଟି ଯୋଗୁ କୋଉଠି ଜମି ଫାଟି ଫାଳ ଫାଳ ହେଲାଣି ତ କୋଉଠି ଧାନ ଗଛରେ ଉଈ ଲାଗି କାଣ୍ଡ କାଟିଦେଲେଣି। ସେଥିପାଇଁ ଚାଷୀମାନେ ଚିନ୍ତାରେ ପଡ଼ିଯାଇଛନ୍ତି। ଲୋକେ ବର୍ଷା ଆଶାରେ ଗାଁ ଗାଁରେ ଇନ୍ଦ୍ରଦେବଙ୍କୁ ସନ୍ତୁଷ୍ଟ କରିବାକୁ କିଏ ଜଳାଭିଷେକ କରୁଛନ୍ତି ତ କିଏ ବେଙ୍ଗ ବେଙ୍ଗୁଲି ବାହାଘର କଲେଣି। ହେଲେ ଇନ୍ଦ୍ରଙ୍କ ଶୁଭ ଦୃଷ୍ଟି ଜିଲା ଉପରେ ପଡୁନି। ଜୁଲାଇ ମାସ ଶେଷ ସୁଦ୍ଧା ସାଭାବିକ ଠାରୁ ୬୧ ପ୍ରତିଶତ କମ୍ ବୃଷ୍ଟିପାତ ହୋଇଥିବା ରେକର୍ଡ ହୋଇଛି ବୋଲି ଜିଲା କୃଷି ଅଧିକାରୀ ଶରତ ଚନ୍ଦ୍ର ଦାସ ସୂଚନା ଦେଇଛନ୍ତି। ଜିଲାର ଝୁମ୍ପୁରା, ଚମ୍ପୁଆ ଓ ତେଲକୋଇ ବ୍ଲକରେ ସ୍ବାଭାବିକ ବର୍ଷା ହୋଇଥିବା ବେଳେ ପାଟଣା, ସାହାରପଡ଼ା, ଘଟଗାଁ, ଆନନ୍ଦପୁର ଓ ଘଷିପୁରା ବ୍ଲକରେ ସ୍ବଳ୍ପ ବୃଷ୍ଟିପାତ ହୋଇଥିବା ଜିଲା କୃଷି ଅଧିକାରୀ କହିଛନ୍ତି। ଆଗାମୀ ଏକ ସପ୍ତାହ ମଧ୍ୟରେ ଭଲ ବର୍ଷା ନ ହେଲେ ଚାଷ ସବୁ ଉଜୁଡ଼ି ଯିବା ଆଶଙ୍କା ଉପୁଜିଲାଣି। ଜିଲାରେ ଥିବା କ୍ଷୁଦ୍ର, ମଧ୍ୟମ ଓ ବୃହତ୍ ଇରିଗେଶନ ପ୍ରୋଜେକ୍ଟରୁ କ୍ଷେତକୁ ଖୁବ୍ଶୀଘ୍ର ପାଣି ଛାଡ଼ିବାକୁ ଚାଷୀମାନେ ଦାବି କରିଛନ୍ତି।