ଚମ୍ପୁଆ, ୨୨।୬(ଡି.ଏନ.ଏ.) – ବର୍ଷା ଜଳକୁ ସଂରକ୍ଷଣ କରିବା ଓ ଭୂତଳ ଜଳସ୍ତରକୁ ବୃଦ୍ଧି କରିବା ଲକ୍ଷ୍ୟ ନେଇ ମୁଖ୍ୟମନ୍ତ୍ରୀ କର୍ମ ତତ୍ପର ଅଭିଯାନ ଯୋଜନା ତଥା ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ଓଡିଶା ସରକାରଙ୍କ ପକ୍ଷରୁ ଚମ୍ପୁଆ ଏନ୍ଏସିରେ ୧୦୦ ରୁ ଉର୍ଦ୍ଧ୍ୱ ବର୍ଷା ଜଳ ଅମଳ ପ୍ରକଳ୍ପ ନିର୍ମାଣ କରାଯାଇଛି। ମାତ୍ର ନିର୍ମାଣର ମାସେ ନ ପୁରୁଣୁ ଅନେକ ପ୍ରକଳ୍ପ ଭାଙ୍ଗି ଯାଇଥିବା ଦେଖିବାକୁ ମିଳିଛ। ପ୍ରକଳ୍ପ ନିର୍ମାଣ ସମୟରେ ବିଭାଗୀୟ ଯନ୍ତ୍ରୀ ଉପସ୍ଥିତ ରହୁ ନଥିବାରୁ ଏପରି ପରିସ୍ଥିତି ଉପୁଜିଥିବା ସାଧାରଣରେ ଚର୍ଚ୍ଚା ହେଉଛି। ସୂଚନା ଯୋଗ୍ୟ, ଚମ୍ପୁଆ ଏନଏସିରେ ଆର୍ଥତ୍କ ବର୍ଷ ୨୦୨୨-୨୩ ନିମନ୍ତେ ୩୦ ହଜାର ଅଟକଳ ବ୍ୟୟରେ ୧୦୦ରୁ ଉର୍ଦ୍ଧ୍ୱ ବର୍ଷା ଜଳ ଅମଳ ପ୍ରକଳ୍ପ ନିର୍ମାଣ କରାଯାଇଛି। ଏହି ନର୍ମାଣ କାର୍ଯ୍ୟ ସ୍ବୟଂ ସହାୟକ ଗୋଷ୍ଠୀମାନଙ୍କୁ ସ୍ବାବଲମ୍ବୀ କରିବା ଲକ୍ଷ୍ୟ ନେଇ ପ୍ରଦାନ କରାଯାଇଥିବା ବେଳେ ବିଧାୟିକା ମିନାକ୍ଷୀ ମହାନ୍ତ ଓ ଏନ୍ଏସି ଚେୟାରମ୍ୟାନ୍ ଗିରିଜା ଶଙ୍କର ସାହୁ ୧୩ ଗୋଟି ୱାର୍ଡରେ ସ୍ବୟଂ ସହାୟକ ଗୋଷ୍ଠୀଙ୍କୁ କାର୍ଯ୍ୟାଦେଶ ବଣ୍ଟନ କରିଥିଲେ। ମାତ୍ର ଅନେକ ସ୍ଥାନରେ ବର୍ଷା ନ ହେଉଣୁ ଏହା ଭାଙ୍ଗିଗଲାଣି। ଫଳରେ ପ୍ରକଳ୍ପର ସ୍ଥାୟୀତ୍ୱ ଏବଂ ବର୍ଷା ଜଳ ଅମଳ କେତେ ସଫଳ ହେବ ତାହା ଏବେ ପ୍ରଶ୍ନବାଚୀ ସୃଷ୍ଟି କରିଛି। ଏ ନେଇ ବିଭାଗୀୟ ଯନ୍ତ୍ରୀ ରଞ୍ଜନ ମହାକୁଡ଼ କହିଛନ୍ତି, ଯେଉଁ ଗୁଡିକ ଭାଙ୍ଗି ଯାଇଛି ତାହା ବିଲ୍ ହୋଇନାହିଁ ଏବଂ ସଂପୃକ୍ତ ଗୋଷ୍ଠୀଙ୍କୁ ତାହା ତୁରନ୍ତ ମରାମତି ପାଇଁ ନିର୍ଦ୍ଦେଶ ଦିଆଯାଇଛି।