କେନ୍ଦୁଝର,୩।୧(ସ୍ବ.ପ୍ର.) କେନ୍ଦୁଝରଗଡ଼ ପୌରପାଳିକାର ମାଧପୁରଠାରେ ଥିବା କୃଷି ବିଭାଗର ଫାର୍ମ ପୋଖରୀରେ ପ୍ରଥମ ଥର ପାଇଁ ବିଦେଶୀ ପକ୍ଷୀ ଦେଖିବାକୁ ମିଳିଛି। ଲେସର ହୁଇଷ୍ଟଲିଙ୍ଗ ଡକ୍ ନାମକ ଏହି ପକ୍ଷୀ ପ୍ରଥମ ଥର ପାଇଁ କେନ୍ଦୁଝରକୁ ଏତେ ସଂଖ୍ୟାରେ ଆସିଥିବା କୁହାଯାଉଛି। ଏହି ପକ୍ଷୀ ଗୋଆ ଏବଂ ପଶ୍ଚିମବଙ୍ଗର କେତେକ ହ୍ରଦରେ ଶୀତ ଋତୁରେ ପ୍ରାୟତଃ ଦେଖିବାକୁ ମିଳିଥାଏ। କୌଣସି କାରଣରୁ ବାସହରା ହୋଇ ସୁରକ୍ଷିତ ସ୍ଥାନ ଖୋଜି ଏଠାକୁ ଆସିଥିବା କୁହାଯାଉଛି। ରାସ୍ତା ପାର୍ଶ୍ୱରେ ଏହି ପୋଖରୀ ଥିଲେ ମଧ୍ୟ ପୋଖରୀ ଚର୍ତୃପାର୍ଶ୍ୱରେ ଗଛ ଏବଂ ବୁଦାଥିବାରୁ ପକ୍ଷୀଙ୍କ ପାଇଁ ସୁରକ୍ଷିତ ସ୍ଥାନ ହୋଇଛି।
ସୋମବାର ସକାଳୁ ବିଦେଶୀ ପକ୍ଷୀଙ୍କ ପୋଖରୀରେ ଜଳକ୍ରୀଡ଼ା ଦେଖିକୁ ଲୋକଙ୍କ ଭିଡ଼ ଜମିଥିଲା। ଏହାକୁ ଦେଖିବାକୁ ଆସିଥିବା ଡିଏଫଓ ଏଚ.ଡି.ଧନରାଜ ଚଳିତ ବର୍ଷ ପକ୍ଷୀ ଗଣନାରେ ଏହି ପୋଖରୀକୁ ସାମିଲ କରିବେ ବୋଲି କହିଛନ୍ତି। ଆଖପାଖ ଅଞ୍ଚଳର ପରିବେଶ ତଥା ପକ୍ଷୀପ୍ରେମୀ ମଧ୍ୟ ଆସି ପକ୍ଷୀଙ୍କୁ ଦେଖି ଖୁସି ବ୍ୟକ୍ତ କରିଛନ୍ତି। କେନ୍ଦୁଝର ସହରର ଅନେକ ପୁରାତନ ପୋଖରୀକୁ ପୁନରୁଦ୍ଧାର ଓ ସୌନ୍ଦର୍ଯ୍ୟକରଣ ନାମରେ କଂକ୍ରିଟ କରଣ ହେଉଥିବାରୁ ପରିବେଶବିତ୍ମାନେ ଚିନ୍ତାବ୍ୟକ୍ତ କରିଛନ୍ତି। ପୋଖରୀ ହୁଡ଼ାରେ ଅଧିକ ସଂଖ୍ୟାରେ ବୃକ୍ଷ ଲଗାଇବା ସହ ପୋଖରୀକୁ ସ୍ବଚ୍ଛ ରଖିବା ପାଇଁ ପଦକ୍ଷେପ ନିଆଯିବ ବୋଲି ଡିଏଫଓ ପ୍ରତିଶ୍ରୁତି ଦେଇଛନ୍ତି। ପକ୍ଷୀ ପ୍ରେମୀ ସୋମନାଥ ଦାସ କହିଛନ୍ତି, ପକ୍ଷୀର ପେଟ ପାଖ ଧଳା। ସେମାନେ ସାଧାରଣତଃ ପାଣିରେ ଥିବା ଦଳ, ମାଛ, ପୋକ ଯୋକ ଖାଇଥାନ୍ତି। କୌଣସି କାରଣରୁ ବାସହରା ହୋଇ ଯିବା ପରେ ଦଳଦଳ ହୋଇ ସୁରକ୍ଷିତ ସ୍ଥାନ ଖୋଜି ଏଠାକୁ ଚାଲିଆସିଥିବା ସେ କହିଛନ୍ତି।
