ମଥୁରାନଗରୀ,୪।୧(ପ୍ରେମାନନ୍ଦ ଖମାରୀ)-ବୃହତ୍ ମୁକ୍ତାକାଶ ରଙ୍ଗମଞ୍ଚ ବରଗଡ଼ ଧନୁଯାତ୍ରା ମହୋତ୍ସବର ଦ୍ୱିତୀୟ ଦିବସ ଶନିବାର ରାଜ ଦରବାରରେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ରାଜ୍ୟ ଶିକ୍ଷା, ସଂସ୍କୃତି, କ୍ରୀଡ଼ା ମନ୍ତ୍ରୀ ସୁରଜ ସୂର୍ଯ୍ୟବଂଶୀ ଏବଂ ଗ୍ରାମ୍ୟ ଉନ୍ନୟନ, ପାନୀୟଜଳ, ପଞ୍ଚାୟତିରାଜ ମନ୍ତ୍ରୀ ରବି ନାରାୟଣ ନାୟକ ରାଜ ଅତିଥିଭାବେ ଯୋଗଦାନ କରିଥିଲେ। ରାଜ ଦରବାରରେ କେନ୍ଦ୍ରମନ୍ତ୍ରୀ ପ୍ରଧାନ ଧନୁଯାତ୍ରା ସମାଜକୁ ନୈତିକ ମୂଲ୍ୟବୋଧର ବାର୍ତ୍ତା ଦେଉଛି ଏବଂ ଏହି ମହୋତ୍ସବକୁ ଆନ୍ତର୍ଜାତୀକ ସ୍ତରକୁ ନେବା ପାଇଁ ସରକାର ଉଦ୍ୟମ କରୁଛନ୍ତି ବୋଲି କଂସ ମହାରାଜଙ୍କ ସମ୍ମୁଖରେ କହିଥିଲେ। ମହାରାଜ କଂସ ସେଥିରେ ଖୁସିବ୍ୟକ୍ତ କରିଥିଲେ ଏବଂ ବରଗଡ଼ ଧନୁଯାତ୍ରାକୁ ସାରାଦେଶର ପାଠ୍ୟପୁସ୍ତକରେ ସ୍ଥାନିତ କରିବା ପାଇଁ କେନ୍ଦ୍ରମନ୍ତ୍ରୀ ପ୍ରଧାନଙ୍କୁ ଆଦେଶ ଦେଇଥିଲେ।
ସେହିପରି ମନ୍ତ୍ରୀ ସୂର୍ଯ୍ୟବଂଶୀ କହିଥିଲେ, ନ୍ୟାଶନାଲ ସ୍କୁଲ ଅଫ ଡ୍ରାମାର ଏକ ଟିମ୍ ମଥୁରାନଗରୀରେ ଉପସ୍ଥିତ ରହି ଧନୁଯାତ୍ରାର ପ୍ରାମାଣିକ ଚଳଚ୍ଚିତ୍ର ପ୍ରସ୍ତୁତି କାର୍ଯ୍ୟ କରୁଛନ୍ତି। ରାଜ୍ୟର ସବୁଜିଲାରେ ଧନୁଯାତ୍ରା ମହୋତ୍ସବର ଲାଇଭ୍ ଟେଲିକାଷ୍ଟ ହେଉଛି। ଅନ୍ୟପଟେ ମହାରାଜ କଂସ ମଥୁରାନଗରୀର ଆହୁରି ୧ଲକ୍ଷ କଳାକାରଙ୍କୁ ଭତ୍ତା ପ୍ରଦାନ ପାଇଁ ମନ୍ତ୍ରୀ ସୂର୍ଯ୍ୟବଂଶୀଙ୍କୁ ଆଦେଶ କରିଥିଲେ। ସେହିପରି କାହିଁକି ଏପର୍ଯ୍ୟନ୍ତ ମଥୁରା ରାଜ୍ୟର ଲୋକେ ପାନୀୟ ଜଳାଭାବର ସମ୍ମୁଖୀନ ହେଉଛନ୍ତି ବୋଲି କଂସ ମହାରାଜ ମନ୍ତ୍ରୀ ନାଏକଙ୍କୁ ପ୍ରଶ୍ନ କରିଥିଲେ।
ପରୋକ୍ଷରେ ପୂର୍ବ ସରକାର ଉପରେ ମନ୍ତ୍ରୀ ନାଏକ ଏହାର ଦୋଷ ଲଦି ଥିବାବେଳେ ଆଗାମୀ ଦିନରେ ସବୁତଥ୍ୟ ମହାରାଜଙ୍କ ପାଖରେ ଉପସ୍ଥାପନ କରିବେ ବୋଲି କହିଥିଲେ। ସେହିପରି ଆସନ୍ତା ୨୦୨୬ ମସିହା ମାର୍ଚ୍ଚ ସୁଦ୍ଧା ପ୍ରତ୍ୟେକ ଘରକୁ ପାଣି ପହଞ୍ଚିବ ବୋଲି ମନ୍ତ୍ରୀ ନାଏକ ଉତ୍ତର ରଖିଥିଲେ। ଅନ୍ୟମାନଙ୍କ ମଧ୍ୟରେ ଝାରସୁଗୁଡ଼ା ବିଧାୟକ ଟଙ୍କଧର ତ୍ରିପାଠୀ, ବରଗଡ଼ ବିଧାୟକ ଅଶ୍ୱିନୀ ଷଡ଼ଙ୍ଗୀ, ଅତାବିରା ବିଧାୟକ ନିହାର ରଞ୍ଜନ ମହାନନ୍ଦ, ଭଟଲି ବିଧାୟକ ଇରାସିସ୍ ଆଚାର୍ଯ୍ୟ, ବିଜେପୁର ବିଧାୟକ ସନତ କୁମାର ଗଡ଼ତିଆ ପ୍ରମୁଖ ଦରବାରରେ ଉପସ୍ଥିତ ଥିଲେ।