ଭୁବନେଶ୍ୱର,୧୧।୮ (ବ୍ୟୁରୋ): ଗତ ମାସରେ ରାଜ୍ୟ ସରକାରଙ୍କ କୃଷି ବିଭାଗ କାଳିଆ ଟଙ୍କା ହାତେଇଥିବା ଅଯୋଗ୍ୟ ହିତାଧିକାରୀମାନଙ୍କଠାରୁ ଅର୍ଥ ଆଦାୟ ସକାଶେ ଜିଲା କୃଷି ଅଧିକାରୀମାନଙ୍କୁ ଚିଠି କରିଥିଲା। ଏହା ମିଳିବାପରେ ରାଜ୍ୟର ଲକ୍ଷେ ଚାଷୀଙ୍କଠାରୁ ଟଙ୍କା ଆଦାୟ ଲାଗି ନିଷ୍ପତ୍ତି ସରିଥିଲା। ହେଲେ ରାଜ୍ୟ ସରକାର କୋଭିଡ୍-୧୯ ସ୍ଥିତି ଏବଂ ଖରିଫ ଚାଷକୁ ଦୃଷ୍ଟିରେ ରଖି ସାମୟିକଭାବେ ଏହାକୁ ସ୍ଥଗିତ ରଖିଛନ୍ତି। କିନ୍ତୁ ଭାଜପା ଏହାକୁ ବିରୋଧ କରିଛି। କାଳିଆ ଟଙ୍କା ଆଦାୟ ସାମୟିକଭାବେ ନୁହେଁ ବରଂ ସମ୍ପୂର୍ଣ୍ଣ ବନ୍ଦ କରାଯାଉ ବୋଲି ବିରୋଧୀ ଦଳ ନେତା ପ୍ରଦୀପ୍ତ କୁମାର ନାଏକ କହିଛନ୍ତି। ପ୍ରଦୀପ୍ତ କହିଛନ୍ତି, ଶାସକ ବିଜେଡି ନିର୍ବାଚନ ଜିତିବା ଏବଂ କ୍ଷମତା ହାତେଇବା ପାଇଁ ତରବରିଆ ଭାବେ କାଳିଆ ଯୋଜନା ଆରମ୍ଭ କରି ଦଳୀୟ କର୍ମୀଙ୍କୁ ହିତାଧିକାରୀ ଚିହ୍ନଟକରି ଟଙ୍କା ବାଣ୍ଟିଲା। ୨୦୧୯ ନିର୍ବାଚନ ଫଳ ଘୋଷଣା ହେବା ପରେ ୨ୟ କିସ୍ତି ଦେବେ ବୋଲି କହିଥିଲେ। ମାତ୍ର ନିର୍ବାଚନ ସରିବାର ବର୍ଷକ ପରେ ହିତାଧିକାରୀଙ୍କୁ ଅଯୋଗ୍ୟ କହି ୫ ହଜାର ଟଙ୍କା ଲେଖାଏ ଆଦାୟ କରିବା ପାଇଁ ନିର୍ଦ୍ଦେଶ ଦେଇଛି। ମାତ୍ର ଏବେ ସରକାର ମୁଣ୍ଡ ନୁଆଁଇଛନ୍ତି। ମୁଖ୍ୟ ବିରୋଧୀ ଦଳ ଭାବେ ଭାଜପା ବାରମ୍ବାର ଏହି ନିର୍ଦ୍ଦେଶନାମାକୁ ବିରୋଧ କରିବା ଏବଂ ଚାଷୀମାନଙ୍କ ଆକ୍ରୋଶ ପରେ ଏହାକୁ ସ୍ଥଗିତ ରଖିଛନ୍ତି ବୋଲି ପ୍ରଦୀପ୍ତ କହିଛନ୍ତି।
