ବରଗଡ଼,୨୯।୮(ପ୍ରେମାନନ୍ଦ ଖମାରୀ):ସଂକୀର୍ତ୍ତନ ଭାବଭକ୍ତି ଏବଂ ଆଧ୍ୟାତ୍ମିକ ଚେତନାର ବାର୍ତ୍ତାବହ। କିନ୍ତୁ ସଂକୀର୍ତ୍ତନରେ ଅଶ୍ଳୀଳ ଓ ଦ୍ୱିଅର୍ଥ ବୋଧକ ସଙ୍ଗୀତ ପରିବେଷଣ କରାଯାଉଛି। ଏହା ସମାଜ ଉପରେ କୁପ୍ରଭାବ ପକାଉଛି। ଫଳରେ ଏଥିରେ କଟକଣା ଲଗାଯିବା ଦାବିରେ ବୁଧବାର ବରଗଡ଼ ଜିଲା ସଂକୀର୍ତ୍ତନ ପରିଷଦର ଏକ ପ୍ରତିନିଧି ଦଳ ଜିଲାପାଳଙ୍କୁ ଫେରାଦ ହୋଇଥିଲେ। ଜିଲାପାଳ ଆଦିତ୍ୟ ଗୋୟଲଙ୍କୁ ପରିଷଦ ପକ୍ଷରୁ ଏ ନେଇ ଏକ ସ୍ମାରକପତ୍ର ପ୍ରଦାନ କରାଯାଇଛି।
ବରଗଡ଼ ଜିଲାର ସଂକୀର୍ତ୍ତନ ମଣ୍ଡଳୀ ଗୁଡ଼ିକର ପ୍ରତିନିଧିମାନେ ସ୍ଥାନୀୟ ଗାନ୍ଧିଛକରେ ସମବେତ ହୋଇଥିଲେ। ପାରମ୍ପାରିକ ସଂକୀର୍ତ୍ତନ ତାଳରେ ଏକ ଶୋଭାଯାତ୍ରାରେ ସେମାନେ ଜିଲାପାଳଙ୍କ କାର୍ଯ୍ୟାଳୟରେ ପହଞ୍ଚିଥିଲେ। ହରିନାମ ସଂକୀର୍ତ୍ତନ ଧ୍ୱନିରେ ଜିଲାପାଳଙ୍କ କାର୍ଯ୍ୟାଳୟ କମ୍ପି ଉଠିଥିଲା। ପରେ ଜିଲାପାଳ ଗୋୟଲଙ୍କ ପାଖରେ ପହଞ୍ଚତ୍ ସ୍ମାରକପତ୍ର ପ୍ରଦାନ କରିଥିଲେ। ସ୍ମାରକପତ୍ରରେ ସଂକୀର୍ତ୍ତନରେ ଅପସଂସ୍କୃତି ପ୍ରବେଶ ଉପରେ କଟକଣା ଲଗାଇବା ପାଇଁ ଜିଲା ପ୍ରଶାସନକୁ ନିବେଦନ କରାଯାଇଛି।
ସ୍ମାରକପତ୍ରରେ ଉଲ୍ଲେଖ ରହିଛି, ସମ୍ପ୍ରତି କିଛି ସଂକୀର୍ତ୍ତନ ମଣ୍ଡଳୀ ଅସାଧୁ ଉପାୟ ଅବଲମ୍ବନ ପୂର୍ବକ ଶସ୍ତା ଲୋକପ୍ରିୟତା ପାଇଁ ସଂକୀର୍ତ୍ତନକୁ ବ୍ୟବସାୟିକଭାବେ ବ୍ୟବହାର କରୁଛନ୍ତି। କେବଳ ସେତିକି ନୁହେଁ, ସଂକୀର୍ତ୍ତନ ଆଳରେ ଅଶ୍ଳୀଳ ନୃତ୍ୟ, ଦ୍ୱିଅର୍ଥବୋଧକ ଗୀତ, ବାଦ୍ୟ କୀର୍ତ୍ତନ ନାମରେ କାୟାବିସ୍ତାର କରି ଚାଲୁଛନ୍ତି। ଏହା ସମାଜ ଉପରେ ଯଥେଷ୍ଟ କୁପ୍ରଭାବ ପକାଉଛି, ଫଳରେ ଏଭଳି ଅପସଂସ୍କୃତିକୁ ତୁରନ୍ତ ବନ୍ଦ କରିବାକୁ ସଂକୀର୍ତ୍ତନ ପରିଷଦ ଦାବି କରିଛି। ଜିଲା ସଂକୀର୍ତ୍ତନ ପରିଷଦର ସଭାପତି ପ୍ରମୋଦ କୁମାର ଦାଶ, ସମ୍ପାଦକ ଜୟଦେବ ପଣ୍ଡା, ସଫେଦ ସାହୁ, ଶିବରଞ୍ଜନ ଭୋଇ, ଲଲିତ ମୋହନ ପଣ୍ଡା, ରାମଚନ୍ଦ୍ର ସାହୁ, ନିଲ ଦେବତା, ମୀନକେତନ ମେହେର, ଗୌର ସାହୁ, ଗୋରାଚାନ୍ଦ ସାହୁ, ସୌମିତ୍ରୀ ଦାଶ, ଥଣ୍ଡାରାମ ପଟେଲ, ତାରାଚାନ୍ଦ ପଟେଲ, ହେମସାଗର ପଟେଲ, ନାରାୟଣ ବାବା ପ୍ରମୁଖ ଉପସ୍ଥିତ ଥିଲେ।
