ନୂଆଦିଲ୍ଲୀ, ୨୪।୧୧: କେନ୍ଦ୍ର ସରକାରଙ୍କ ୩ କୃଷି ଆଇନ ଉପରେ ସୁପ୍ରିମକୋର୍ଟ ଦ୍ୱାରା ନିଯୁକ୍ତ କମିଟି ଦେଇଥିବା ରିପୋର୍ଟକୁ ତୁରନ୍ତ ସାର୍ବଜନୀନ କରାଯାଉ କିମ୍ବା ଏହାକୁ ପ୍ରକାଶ କ୍ଷମତା କମିଟିକୁ ଦିଆଯାଉ। କମିଟି ସଦସ୍ୟ ଅନିଲ ଘନଓ୍ବତ୍ ଭାରତର ପ୍ରଧାନ ବିଚାରପତି (ସିଜେଆଇ) ଏନ୍.ଭି. ରମନାଙ୍କୁ ପତ୍ର ଲେଖି ଏହା ଜଣାଇଛନ୍ତି। ୩ କୃଷି ଆଇନ ପ୍ରତ୍ୟାହାର ହେବା ପରେ ମଧ୍ୟ କୃଷି କ୍ଷେତ୍ରରେ ସଂସ୍କାର ଜରୁରୀ ବୋଲି ଶେତ୍କରି ସଂଗଠନର ନେତା ଘନଓ୍ବତ୍ ଗଣମାଧ୍ୟମକୁ କହିଛନ୍ତି। ଏଥିପାଇଁ ସେ ଆଗାମୀ ଦୁଇମାସ ମଧ୍ୟରେ ଦିଲ୍ଲୀରେ ଲକ୍ଷେ ଚାଷୀଙ୍କୁ ନେଇ ସମାବେଶ କରିବେ ବୋଲି ସୂଚନା ଦେଇଛନ୍ତି। ସମସ୍ତ ଫସଲ କ୍ରୟ ସର୍ବନିମ୍ନ ସହାୟକ ମୂଲ୍ୟ (ଏମ୍ଏସ୍ପି)ରେ କ୍ରୟ କରିବା ଏବଂ ଏହା ଉପରେ ଆଇନଗତ ଗ୍ୟାରେଣ୍ଟି ଦେବା ଲାଗି ଆନ୍ଦୋଳନରତ ଚାଷୀ ଦାବି କରୁଛନ୍ତି। ତେବେ ଏହା ସମ୍ଭବ ନୁହେଁ ଏବଂ କାର୍ଯ୍ୟକାରୀ ଯୋଗ୍ୟ ନୁହେଁ ବୋଲି ଘନଓ୍ବତ୍ କହିଛନ୍ତି।
ସିଜେଆଇଙ୍କୁ ଲେଖିଥିବା ପତ୍ରରେ ଘନଓ୍ବତ୍ କହିଛନ୍ତି, କୃଷି ଆଇନର ଅନୁଧ୍ୟାନ କରି ରିପୋର୍ଟ ଦେବା ନିମନ୍ତେ ସୁପ୍ରିମକୋର୍ଟ ବିଶେଷଜ୍ଞମାନଙ୍କର ଏକ କମିଟି ଗଠନ କରିଥିଲେ। କମିଟିର ସୁପାରିସ ଜନସ୍ବାର୍ଥ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ହୋଇଥିବାରୁ ଉକ୍ତ ରିପୋର୍ଟକୁ ଅଧିକ ଦିନ ଅଟକାଇ ରଖିବା ଠିକ୍ ନୁହେଁ ବୋଲି ସେ ମତ ଦେଇଛନ୍ତି।