ପୁରୀ ଅଫିସ,୨୨।୯: ଶ୍ରୀମନ୍ଦିର ପ୍ରଶାସନିକ କୋଠାର ଉଚ୍ଚତା ବଢ଼ାଇବା ପାଇଁ ପ୍ରସ୍ତାବ ରଖିଛି ଶ୍ରୀମନ୍ଦିର ପ୍ରଶାସନ। ଏ ନେଇ ରାଜ୍ୟ ସରକାରଙ୍କ ସଂସ୍କୃତି ବିଭାଗ ମାଧ୍ୟମରେ ଜାତୀୟ କୀର୍ତ୍ତିରାଜି କର୍ତ୍ତୃପକ୍ଷ(ଏନ୍ଏମ୍ଏ)ଙ୍କୁ ବୁଧବାର ଏକ ଚିଠି ଲେଖାଯାଇଛି। ଶ୍ରୀମନ୍ଦିରର ନିୟନ୍ତ୍ରଣାଧୀନ ଅଞ୍ଚଳରେ ନିର୍ମାଣ ହେବାକୁ ଥିବା ନୂଆ ପ୍ରଶାସନିକ କୋଠାର ଉଚ୍ଚତାକୁ ସର୍ବାଧିକ ୭.୫୦ ମିଟରରେ ସୀମିତ ରଖିବା ପାଇଁ ଏନ୍ଏମ୍ଏ ପରାମର୍ଶ ଦେଇଥିଲେ। ତେବେ ସମ୍ପୃକ୍ତ ଉଚ୍ଚତା ସୀମା ମଧ୍ୟରେ କୋଠା ନିର୍ମାଣ କରାଯାଇପାରିବ ନାହିଁ ବୋଲି ଶ୍ରୀମନ୍ଦିର ପ୍ରଶାସନ ଚିଠି ଲେଖି ସ୍ପଷ୍ଟ କରିଛି। ପୂର୍ବରୁ ଥିବା ପ୍ରଶାସନିକ କୋଠାର ଉଚ୍ଚତା ୧୧.୧୯୨ ମିଟର ରହିଥିଲା। ଏହି କୋଠାକୁ ଭଙ୍ଗାଯାଇ ସମ୍ପୃକ୍ତ ସ୍ଥାନରେ ନୂଆ ପ୍ରଶାସନିକ କୋଠା ନିର୍ମାଣ ଚାଲିଛି। ତେବେ ନିର୍ମାଣ ହେଉଥିବା କୋଠାର ମୂଳଦୁଆ କାର୍ଯ୍ୟ ଅନେକାଂଶରେ ଶେଷ ହେଲାଣି। ପୂର୍ବଭଳି ଏହାକୁ ଏକ ତିନି ମହଲା ବିଶିଷ୍ଟ କୋଠା କରିବାକୁ ନିର୍ମାଣ ଚାଲିଛି। ଗ୍ରାଉଣ୍ଡ ଫ୍ଲୋର୍, ପ୍ରଥମ ଓ ୨ୟ ମହଲାକୁ ମିଶାଇ କୋଠାର ଉଚ୍ଚତାକୁ ୭.୫୦ ମିଟରରେ ସୀମିତ ରଖିବା ସମ୍ଭବପର ନୁହେଁ। ଏଣୁ ପ୍ରସ୍ତାବିତ ଉଚ୍ଚତା ଉପରେ ବିଚାର କରିବା ପାଇଁ ଏନ୍ଏମ୍ଏକୁ ଚିଠି ଲେଖାଯାଇଥିବା ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ମିଳିଛି। ଅନ୍ୟପକ୍ଷରେ ଏନ୍ଏମ୍ଏ ରାଜ୍ୟ ସରକାରଙ୍କୁ ଶ୍ରୀମନ୍ଦିର ପ୍ରଶାସନିକ କୋଠା ସମ୍ପର୍କିତ ସାନି ରିପୋର୍ଟ ଦାଖଲ କରିବା ସହ ଏନ୍ଓସି ପାଇଁ ଆବେଦନ କରିବା ଲାଗି ପରାମର୍ଶ ଦେଇଥିଲେ। ଏହିକ୍ରମରେ ଏହି ଚିଠି ରାଜ୍ୟ ସରକାରଙ୍କ ମାଧ୍ୟମରେ ଏନ୍ଏମ୍ଏକୁ ପଠାଯାଇଥିବା ଉନ୍ନୟନ ପ୍ରଶାସନ ଅଜୟ କୁମାର ଜେନା ସୂଚନା ଦେଇଛନ୍ତି।
ଶ୍ରୀମନ୍ଦିର ପ୍ରଶାସନିକ କୋଠାର ଉଚ୍ଚତା ଏବଂ ବିନା ଅନୁମୋଦନରେ ନିର୍ମାଣ କାର୍ଯ୍ୟ ନେଇ ବିବାଦ ଉପୁଜିଥିଲା। ଫଳରେ ରଥଯାତ୍ରା ପରଠାରୁ କାର୍ଯ୍ୟ ବନ୍ଦ ରହିଛି। ନିୟନ୍ତ୍ରିତ ଅଞ୍ଚଳ(ରେଗୁଲେଟରି ଜୋନ୍) ମଧ୍ୟରେ ୭.୫୦ରୁ ଉଚ୍ଚ କୋଠା ନିର୍ମାଣ ପାଇଁ ଅନୁମତି ମିଳିବା ଆଶା କ୍ଷୀଣ ହୋଇଥିବା ବେଳେ ଶ୍ରୀମନ୍ଦିର ପ୍ରଶାସନ କୋଠାର ଉଚ୍ଚତା ବଢ଼ାଇବା ପାଇଁ ଅଡ଼ି ବସିଛି। ମୁଖ୍ୟତଃ ପୁରୁଣା ପ୍ରଶାସନିକ କୋଠାଠାରୁ କମ୍ ଉଚ୍ଚତା ବିଶିଷ୍ଟ କୋଠା ସମସ୍ୟା ବଢ଼ାଇବ ବୋଲି ପ୍ରଶାସନିକ ଅଧିକାରୀମାନେ କହୁଛନ୍ତି। ସେହିଭଳି ଓବିସିସିର ଜଣେ ଅଧିକାରୀଙ୍କ କହିବା କଥା ଯେ, ଶ୍ରୀମନ୍ଦିର ପ୍ରଶାସନିକ କୋଠା ପାଇଁ ହୋଇଥିବା କାର୍ଯ୍ୟ ଜି+୨(ଗ୍ରାଉଣ୍ଡ ସହ ୨ ମହଲା) ମଡେଲ୍ରେ ନିର୍ମାଣ କରାଯାଇଛି। ଏବେ ଏହାକୁ ପୁଣିଥରେ କମାଇବା ସମ୍ଭବ ନୁହେଁ।