ଲେକ୍ସିଂଟନ(ୟୁଏସ), ୧୪।୮(ଏପି)-
ଆମେରିକାର ଟିନ୍ଏଜ ଖେଳାଳି କୋକୋ ଗୌଫ ଦ୍ୱିତୀୟ ସିଡ୍ ଆରିନା ସାବାଲେନ୍କାଙ୍କୁ ୭-୬(୨), ୪-୬, ୬-୪ ସେଟ୍ରେ ହରାଇ ଲେକ୍ସିଂଟନ ଓପନ ଟେନିସ ଟୁର୍ନାମେଣ୍ଟର କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ୧୬ ବର୍ଷୀୟ ଗୌଫ ୧୦ ଥର ଡବଲ୍ଫଲ୍ଟ କରିଥିବାବେଳେ ପ୍ରତିପକ୍ଷ ଖେଳାଳିଙ୍କୁ ୭ ଥର ଏପରି କରିବାକୁ ବାଧ୍ୟ କରି ଦେଇଥିଲେ। କରୋନା ଭାଇରସ ସଂକ୍ରମଣ ପରେ ଆମେରିକାରେ ଏହା ପ୍ରଥମ ପ୍ରଫେଶନାଲ ଟେନିସ ଇଭେଣ୍ଟ। ସାବାଲେନ୍କା ଏବେ ବିଶ୍ୱ ର଼୍ୟାଙ୍କିଙ୍ଗ୍ର ୧୧ତମ ସ୍ଥାନରେ ଥିବାବେଳେ ଗୌଫ ୫୩ତମ ସ୍ଥାନରେ ଅଛନ୍ତି। ଏବେ ସେ ଟପ୍-୫୦ ମଧ୍ୟକୁ ଆସିବା ନିଶ୍ଚିତ ହୋଇଛି। କ୍ୱାର୍ଟର ଫାଇନାଲରେ ଗୌଫ ଶୁକ୍ରବାର ୮ମ ସିଡ୍ ଓନ୍ସ ଜାବେଉରଙ୍କୁ ଭେଟିବେ। ଜାବେଉର ୧୦ଟି ଏସ୍ ମାରିବା ସହ ଓଲ୍ଗା ଗୋଭୋର୍ତ୍ସୋଭାଙ୍କୁ ୩-୬, ୬-୨, ୬-୪ ସେଟ୍ରେ ପରାସ୍ତ କରିଥିଲେ। ଅନ୍ୟ ଏକ କ୍ୱାର୍ଟର ଫାଇନାଲ ମାରି ବୌଜକୋଭା ଓ ଜେନିଫର ବାର୍ଡିଙ୍କ ମଧ୍ୟରେ ହେବ। ବାର୍ଡି ୬ଷ୍ଠ ସିଡ୍ ମାଗଦା ଲିନେଟଙ୍କୁ ୬-୨, ୬-୩ ସେଟ୍ରେ ହରାଇଥିବାବେଳେ ପ୍ରଥମ ରାଉଣ୍ଡରେ ଜୋହାନ କୋଣ୍ଟାଙ୍କୁ ହରାଇ ବିପର୍ଯ୍ୟୟ ସୃଷ୍ଟି କରିଥିବା ବୌଜକୋଭା ବୁଧବାର ଆନ୍ନା ବିନ୍କୋଭାଙ୍କୁ ୬-୪, ୬-୨ ସେଟ୍ରେ ପରାସ୍ତ କରିଥିଲେ।