ନୂଆଦିଲ୍ଲୀ,୧୭।୨: ଭାରତୀୟ ଜୀବନ ବୀମା ନିଗମ (ଲାଇଫ ଇନ୍ସ୍ୟୁରାନ୍ସ କର୍ପୋରେଶନ ଅଫ୍ ଇଣ୍ଡିଆ ବା ଏଲ୍ଆଇସି)ର ନୂତନ ଯୋଜନା ‘ଅମ୍ରିତ୍ବଳ’(ପ୍ଲାନ୍ ୮୭୪)ର ସର୍ବଭାରତୀୟ ଉନ୍ମୋଚନ ନିକଟରେ ହୋଇଯାଇଛି। ଏହି ପରିପ୍ରେକ୍ଷୀରେ ଏଲ୍ଆଇସିର ମୁମ୍ବାଇ କାର୍ଯ୍ୟାଳୟଠାରେ ଏକ ସ୍ବତନ୍ତ୍ର ଶୁଭାରମ୍ଭ କାର୍ଯ୍ୟକ୍ରମର ଆୟୋଜନ କରାଯାଇଥିଲା। ଏହି ଅବସରରେ ଅର୍ଥ ମନ୍ତ୍ରଣାଳୟର ସଚିବ (ଫାଇନାନ୍ସିଆଲ ସର୍ଭିସ୍) ଡ. ବିବେକ ଜୋଷୀ ସମ୍ମାନିତ ଅତିଥି ଭାବେ ଯୋଗଦେଇ ଏହାର ଉନ୍ମୋଚନ (ଶୁଭାରମ୍ଭ) ସହ ବଜାର ପ୍ରବେଶ କରାଇଥିଲେ। ଅନ୍ୟମାନଙ୍କ ମଧ୍ୟରେ ଏଲ୍ଆଇସିର ଚେୟାରମ୍ୟାନ ସିଦ୍ଧାର୍ଥ ମହାନ୍ତିଙ୍କ ସମେତ ବହୁ ବରିଷ୍ଠ ଅଧିକାରୀ ଓ ଅନ୍ୟମାନେ ଉପସ୍ଥିତ ଥିଲେ।
ଉଲ୍ଲେଖଯୋଗ୍ୟ,ଏଲ୍ଆଇସିର ଏହି ନୂତନ ଯୋଜନା ଅମ୍ରିତ୍ବଳ(ପ୍ଲାନ ୮୭୪) ଏକ ଅଭିନବ ବୀମା ଯୋଜନା ହୋଇଥିବାବେଳେ ଏହା ବିଶେଷକରି ଶିଶୁର ଉଚ୍ଚ ଶିକ୍ଷା ଓ ଅନ୍ୟାନ୍ୟ ଆବଶ୍ୟକତା ପାଇଁ ବେଶ୍ ସହାୟକ ହେବ। ସେହିଭଳି ଏହା ଏକ ବ୍ୟକ୍ତିଗତ, ସେଭିଂ ଜୀବନ ବୀମା ଯୋଜନା ହୋଇଥିବାବେଳେ ବିଶେଷ ସୁବିଧାର ବ୍ୟାପକ ସମ୍ଭାର ଅନ୍ତର୍ଭୁକ୍ତ ରହିଛି।
ଏ ସମ୍ପର୍କରେ ଏଲ୍ଆଇସିର ଚେୟାରମ୍ୟାନ ମହାନ୍ତି କହିଥିଲେ, ନିଗମର ଏହି ନୂତନ ଯୋଜନାକୁ ଉନ୍ମୋଚନ ସହ ବଜାର ପ୍ରବେଶ କରାଇ ଆମେ ବେଶ୍ ଉତ୍ସାହିତ ଅଛୁ। ଏହି ଯୋଜନା ୨୦୨୪ ଫେବୃଆରୀ ୧୭ରୁ ସାରା ଦେଶରେ ଉପଲବ୍ଧ ହେବ।