ମହାକାଳପଡ଼ା,୧୩ା୭(ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ବଉଳକଣି ପଞ୍ଚାୟତର ପନ୍ଦରମାଇଲି ଆଦିବାସୀପଡ଼ାରେ ୧୦ରୁ ଊର୍ଦ୍ଧ୍ୱ ପରିବାରଙ୍କୁ ଏପର୍ଯ୍ୟନ୍ତ ବିଦ୍ୟୁତ୍ ସେବା ମିଳିପାରିନାହିଁ। ବାପ ଅଜା ଅମଳରୁ ସେମାନେ ଅନ୍ଧାରରେ ଦିନ କାଟୁଛନ୍ତି। ସ୍ବାଧୀନତାର ଏତେବର୍ଷ ବିିତିଯାଇଥିଲେ ମଧ୍ୟ ବିଦ୍ୟୁତ୍ ସେବା ଭଳି ମୌଳିକ ସେବାରୁ ବଞ୍ଚତ୍ତ ଥିବାରୁ ସେମାନେ ଅସନ୍ତୋଷ ପ୍ରକାଶ କରିଛନ୍ତି।
ଏନେଇ ସେମାନେ ବାରମ୍ବାର ବିଭାଗୀୟ ଅଧିକାରୀଙ୍କ ନିକଟରେ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳୁ ନ ଥିବା କହିଛନ୍ତି। ବିଦ୍ୟୁତ୍ ନ ଥିବା ଯୋଗୁ ଗ୍ରାମର ବହୁ ମେଧାବୀ ଛାତ୍ରୀଛାତ୍ର ଡିବିରି ଆଲୁଅରେ ପାଠ ପଢ଼ିବାକୁ ବାଧ୍ୟ ହେଉଛନ୍ତି। ଏହି ଗ୍ରାମର ଛାତ୍ରୀ ଜୟନ୍ତୀ ସୋରେନ୍, ରଶ୍ମିତା ସୋରେନ୍, ଗୁରୁଚରଣ ସୋରେନ୍ ଏବଂ ଅଞ୍ଜଳି ସୋରେନ୍ଙ୍କ କହିବାନୁସାରେ,ବିଦ୍ୟୁତ୍ ନ ଥିବାରୁ ଆମର ପାଠପଢ଼ା ବାଧାପାପ୍ତ ହେଉଛି। ଡିବିରି ଆଲୁଅରେ ଆଖି ଉପରେ ପ୍ରଭାବ ପଡ଼ୁଥିବାରୁ ସବୁବେଳେ ପାଠପଢ଼ିବା ସମ୍ଭବ ହେଉନାହିଁ। ସେହିପରି ବିଦ୍ୟୁତ୍ ସେବା ମିଳୁ ନ ଥିବାରୁ ଲୋକେ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଛନ୍ତି ବୋଲି ଗ୍ରାମର ରତ୍ନାକର ସୋରେନ୍, ଲଗେନ ସୋରେନ, ସୁର ସୋରେନ୍ ଓ ସିଂରାଇ ସୋରେନ ପ୍ରମୁଖ କହିଛନ୍ତି। ଘରେ ବିଦ୍ୟୁତ୍ ନ ଥିବାରୁ ଲାଇଟ୍ ଓ ଫ୍ୟାନ ଆଦି ନ ଥିବା ବେଳେ ରାସ୍ତାରେ ବିଦ୍ୟୁତ୍ ନ ଥିବାରୁ ଯାତାୟାତରେ ସମସ୍ୟା ହେଉଛି। ବର୍ଷା ଦିନେ ଏଠାରେ ପାଣି ଜମୁଥିବାରୁ ଘରେ ସରୀସୃପ ପଶିବାର ଆଶଙ୍କା ରହିଛି ବୋଲି ସେମାନେ କହିଛନ୍ତି। ଏନେଇ ସରକାର ତୁରନ୍ତ ପଦକ୍ଷେପ ନେବାକୁ ଗ୍ରାମବାସୀଙ୍କ ପକ୍ଷରୁ ଦାବି ହୋଇଛି।
ଏ ସମ୍ପର୍କରେ ମାର୍ଶାଘାଇ ବିଦ୍ୟୁତ୍ ଡିଭିଜନ୍ ନିର୍ବାହୀ ଯନ୍ତ୍ରୀ ପ୍ରଦୀପ କୁମାର ଦାଶ କୁହନ୍ତି, ବିଦ୍ୟୁତ୍ ସେବା ଯୋଗାଇ ଦେବା ନିମନ୍ତେ ଏବେ କୌଣସି ସରକାରୀ ଯୋଜନା ଚାଲୁନାହିଁ। ଯୋଜନା ଆସିଲେ ଏସବୁ ପରିବାରକୁ ସେଥିରେ ସାମିଲ କରାଯିବ।