ଲୋଇସିଂହା,୨୩ା୮(ସୁଶାନ୍ତ ବାରିକ): ବଲାଙ୍ଗୀର ସଦର ଥାନା ତଥା ଲୋଇସିଂହା ବ୍ଲକ କୁଶଙ୍ଗ ପଞ୍ଚାୟତ ବଞ୍ଜାରି ଗ୍ରାମର ଟଙ୍କରାମ ପାଣ୍ଡେ ହତ୍ୟା ମାମଲାର ବଲାଙ୍ଗୀର ସେସନ କୋର୍ଟ ବିଚାର ପତି ଡ. ପବିତ୍ରମୋହନ ସାମଲ ଗୁରୁବାର ଶୁଣାଣି କରି ୩ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଦଣ୍ଡିତ ଅଭିଯୁକ୍ତମାନେ ହେଲେ ୩ ବାପପୁଅ। ସେମାନେ ହେଲେ ମାୟାଧର ପୋଢ଼, ଦୁଇପୁଅ ସୁରୁ ଏବଂ ସାଗର। ଏହାବ୍ୟତୀତ ଅଭିଯୁକ୍ତମାନଙ୍କୁ ୧୦ ହଜାର ଟଙ୍କା ଜରିମାନା ଦେବାକୁ ନିର୍ଦ୍ଦେଶ ହୋଇଛି। ଜରିମାନା ଅନାଦେୟ ହେଲେ ଅତିରିକ୍ତ ଗୋଟିଏ ବର୍ଷ ସଜା କାଟିବାକୁ କୁହାଯାଇଛି। ଅପରପକ୍ଷେ ଏହି ମାମଲା ସାକ୍ଷୀ ଓ ପ୍ରମାଣ ଅଭାବରୁ ଶୁକବତୀ ପୋଢ଼ କୋର୍ଟ ନିର୍ଦ୍ଦୋଷରେ ଖଲାସ କରିଛନ୍ତି।
ମାମଲାରୁ ପ୍ରକାଶ ଯେ,୧୦ ମାର୍ଚ୍ଚ ୨୦୧୮ରେ ଉପରୋକ୍ତ ଅଭିଯୁକ୍ତମାନେ ରାତି ୯ଟା ବେଳେ ଲାଠି ଓ ପଥରରେ ଟଙ୍କରାମଙ୍କୁ ତାଙ୍କ ଘର ଆଗରେ ଅତି ନିର୍ମମ ଭାବେ ଆକ୍ରମଣ କରିଥିଲେ। ଏଥିରେ ଟଙ୍କରାମ ଗୁରୁତର ହୋଇପଡ଼ିବାରୁ ପରିବାର ଲୋକେ ଉଦ୍ଧାର କରି ବଲାଙ୍ଗୀର ଭୀମ ଭୋଇ ମେଡିକାଲ କଲେଜରେ ଭର୍ତ୍ତି କରିଥିଲେ। ଅବସ୍ଥା ସଙ୍କଟାପନ୍ନ ହେବାରୁ ପରେ ତାଙ୍କୁ ବୁର୍ଲା ସ୍ଥାନାନ୍ତର କରାଯାଇଥିଲା। ମାର୍ଚ୍ଚ ୧୧ରେ ବୁର୍ଲାରେ ଚିକିତ୍ସାଧୀନ ଥିବାବେଳେ ତାଙ୍କ ମୃତ୍ୟୁ ଘଟିଥିଲା। ଏନେଇ ଟଙ୍କରାମଙ୍କ ପୁଅ କରୁଣାକର ପାଣ୍ଡେ ମାଗୁର ବେଡ଼ା ଫାଣ୍ଡିରେ ଲିଖିତ ଅଭିଯୋଗ କରିଥିଲେ। ଏସ୍ଆଇ କମଳଲୋଚନ ମାଝି ଏହି ମାମଲାର ତଦନ୍ତ କରି କୋର୍ଟରେ ଚାର୍ଜଶିଟ୍ ଦାଖଲ କରିଥିଲେ। ସରକାରୀ ଓକିଲ ସୁବାସ ଚନ୍ଦ୍ର ମହନ୍ତ ଏହି ମାମଲା ପରିଚାଳନା କରୁଥିଲେ।