ଆସିକା,୩୦।୧୧(ଡି.ଏନ.ଏ.): ଗଞ୍ଜାମ ଜିଲା ଆସିକା ଅତିରିକ୍ତ ଜିଲାଜଜ୍ ଚୌଧୁରୀ ପ୍ରବୀର କୁମାର ବୁଧବାର ଏକ ହତ୍ୟା ମାମଲାର ବିଚାର କରି ଅଭିଯୁକ୍ତଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଏଥିସହ ୫ ହଜାର ଟଙ୍କା ଜରିମାନା ଆଦେଶ ଦେଇଛନ୍ତି। ଜରିମାନା ଅନାଦେୟ ୬ମାସ ସଶ୍ରମ କାରାଦଣ୍ଡ ଭୋଗିବାକୁ ରାୟରେ ଉଲ୍ଲେଖ କରିଛନ୍ତି ଅଭିଯୁକ୍ତ ଜଣଙ୍କ ହେଲେ ଆସିକା ଥାନା ଅନ୍ତର୍ଗତ ହରିଡ଼ାପଦର ଗ୍ରାମର ମୋଚିରାମ ନାହାକ।
ସୂଚନାଯୋଗ୍ୟ, ୨୦୨୦ ଅଗଷ୍ଟ ୧୬ରେ ମୋଚିରାମ ତାଙ୍କ ସାନଭାଇ ସୁଦାମ ନାୟକଙ୍କ ସ୍ତ୍ରୀ ରଞ୍ଜି ନାହାକଙ୍କୁ ହତ୍ୟା କରିଥିଲେ। ରଞ୍ଜି ଭେଙ୍କଟରାଇପଲ୍ଲୀ ଶିବ ମନ୍ଦିରରୁ ଫେରୁଥିବା ବେଳେ ପାରିବାରିକ ସମ୍ପତ୍ତିକୁ ନେଇ ବଡ଼ଭାଇ ମୋଚିରାମ ତାଙ୍କୁ ଛଡରେ ପିଟି ହତ୍ୟା କରିଥିଲେ ବୋଲି ସୁଦାମ ଥାନାରେ ଅଭିଯୋଗ କରିଥିଲେ। ପୋଲିସ ନଂ.୪୧୩/୨୦ରେ ମାମଲା ରୁଜୁ କରିଥିଲା। ଥାନାଧିକାରୀ ପ୍ରଶାନ୍ତ କୁମାର ସାହୁ ଏହି ମାମଲାର ତଦନ୍ତ କରି ଅଭିଯୁକ୍ତଙ୍କ ବିରୋଧରେ ଅଭିଯୋଗ ଫର୍ଦ୍ଦ ଅଦାଲତରେ ଦାଖଲ କରିଥିଲେ। ଏହି ମାମଲାରେ ୧୪ଜଣଙ୍କର ସାକ୍ଷ୍ୟ ଗ୍ରହଣ କରାଯାଇଥିଲା। ସରକାରଙ୍କ ପକ୍ଷରୁ ସରକାରୀ ଓକିଲ ସୁଧାଂଶୁ କୁମାର ପଣ୍ଡା ଓ ସୂର୍ଯ୍ୟପ୍ରକାଶ ରାଓ ମାମଲା ଲଢୁଥିଲେ।