କେନ୍ଦୁଝର,୧୭।୫(ସ୍ବ.ପ୍ର.): ଜଣେ ବୃଦ୍ଧା ହତ୍ୟା ମାମଲାର ବୁଧବାର ରାୟ ପ୍ରକାଶ ପାଇଛି। କେନ୍ଦୁଝର ଦୌରାଜଜ୍ ଚିତ୍ତରଞ୍ଜନ ମହାପାତ୍ର ଅଭିଯୁକ୍ତ ଦେବାନନ୍ଦ ନାଏକଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଏପରିକି ଅଭିଯୁକ୍ତଙ୍କୁ ୫୦ ହଜାର ଟଙ୍କା ଜରିମାନା ନିର୍ଦ୍ଦେଶ ଦେଇଛନ୍ତି। ଜରିମାନା ଅନାଦେୟ ଅଧିକ ୧ ବର୍ଷ ଅଧିକ ଜେଲ ଦଣ୍ଡ ଭୋଗିବାକୁ ରାୟ ପ୍ରକାଶ କରିଛନ୍ତି।
ପ୍ରକାଶଯୋଗ୍ୟ, ତୁରୁମୁଙ୍ଗା ଥାନା ଖୁଣ୍ଡିଆପଡ଼ା ପଞ୍ଜାୟତ ଜାମୁନାଳିଆ ଗ୍ରାମର ଜମ୍ବିରା ବେୱା(୭୦)ଙ୍କୁ ଦେବାନନ୍ଦ ବିଭିନ୍ନ ସମୟରେ ଧମକ ଦେଇ ତାଙ୍କଠାରୁ କୁକୁଡା, ଚାଉଳ ଆଣି ଖାଉଥିଲେ। ଏନେଇ ଜମ୍ବିରା ପଞ୍ଚାୟତକୁ ଜଣାଇଥିଲେ। ପରେ ଗାଁରେ ଏକ ବୈଠକ କରି ଦେବାନନ୍ଦଙ୍କୁ ତାଗିଦ କରାଯାଇଥିଲା। ପ୍ରତିଶୋଧ ନେବାକୁ ସୁଯୋଗ ଅପେକ୍ଷାରେ ଥିବା ବେଳେ ୨୦୧୩ ସେପ୍ଟେମ୍ବର ୮ ତାରିଖ ରାତି ପ୍ରାୟ ୧୦ଟାରେ ଜମ୍ବିରା ପୁରୁଣା ଘରୁ ନୂଆ ଘରକୁ ଏକୁଟିଆ ଯାଉଥିବା ବେଳେ ପୂର୍ବରୁ ଲୁଚି ରହିଥିବା ଦେବାନନ୍ଦ ଭୂଜାଲିରେ ଜମ୍ବିରାଙ୍କୁ ଆକ୍ରମଣ କରିଥିଲେ। ପରେ ଏକ କୂଅରେ ପକାଇ ଦେଇଥିଲେ। ଏହି ଘଟଣାରେ ପ୍ରତ୍ୟକ୍ଷ ଦର୍ଶୀ ଜମ୍ବିରାଙ୍କ ଝିଆରୀ କୌତୁକୀ ନାଏକ ଏବଂ ମୀନତି ନାଏକ ପରିବାର ଲୋକଙ୍କୁ ଜଣାଇଥିଲେ। ଏନେଇ ଜମ୍ବିରାଙ୍କ ପୁଅ ନାରାୟଣ ନାଏକ ତୁରୁମୁଙ୍ଗା ଥାନାରେ ଏତଲା ଦେଇଥିଲେ। ପୋଲିସ ଏକ ମାମଲା(ନଂ.୧୨୩/୨୦୨୩) ରୁଜୁ କରି ଅଭିଯୁକ୍ତ ଦେବାନନ୍ଦଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ସେହି ଦିନଠାରୁ ସେ ବିଚାରଧୀନ ବନ୍ଦୀ ଭାବେ କେନ୍ଦୁଝର ଜିଲା କାରାଗାରରେ ଥିଲେ। ୧୦ଜଣ ସାକ୍ଷୀଙ୍କ ବୟାନ ସହ ସମସ୍ତ ତଥ୍ୟ ଆଧାରକୁ ଭତ୍ତି କରି ଦୌରାଜଜ୍ ଏହି ଦଣ୍ଡାଦେଶ ଶୁଣାଇଛନ୍ତି। ସରକାରଙ୍କ ପକ୍ଷରୁ ସ୍ବତନ୍ତ୍ର ପବ୍ଲିକ ପ୍ରୋସିକ୍ୟୁଟର ପ୍ରଦୀପ ଦାସ ମାମଲା ପରିଚାଳନା କରୁଥିଲେ।