କାବୁଲ, ୧୭ା୮: ଆଫଗାନିସ୍ତାନ ଏବେ ସମ୍ପୂର୍ଣ୍ଣ ଅସ୍ଥିରତା ଭିତରକୁ ଠେଲି ହୋଇଯାଇଛି। ତାଲିବାନ ରାଜଧାନୀ କାବୁଲ ଅକ୍ତିଆର କରିବା ପରେ ଲୋକେ ଭୟରେ ଏବେ ଦେଶ ଛାଡ଼ିବାକୁ ବ୍ୟାକୁଳ ହୋଇପଡ଼ିଲେଣି। ତାଲିବାନର କଠୋର ଶାସନରୁ ମୁକ୍ତି ପାଇଁ ଦେଶ ଛାଡ଼ି ପଳାୟନ କରିବାକୁ ପ୍ରାଣପ୍ରଣେ ଉଦ୍ୟମ ଚଳାଇଛନ୍ତି। ଏପରି କି ଜୀବନକୁ ବାଜି ଲଗାଇ ସ୍ଥାନୀୟ ଓ ବିଦେଶୀ ନାଗରିକ ସୋମବାର ବିମାନ ଭିତରକୁ ଧସେଇ ପଶିବାକୁ ଉଦ୍ୟମ କରିଛନ୍ତି। ରନ୍ଓ୍ବେରେ ବିମାନ ଚାଲିବାବେଳେ ତା’ଉପରକୁ କିଛି ଲୋକ ଚଢ଼ୁଥିବାରୁ ଦୃଶ୍ୟ ଦେଖିବାକୁ ମିଳୁଛି। ବହୁସଂଖ୍ୟାରେ ଲୋକ ଏକସଙ୍ଗେ ବିମାନରେ ଉଠିବାକୁ ଉଦ୍ୟମ କଲାବେଳେ ବିଶୃଙ୍ଖଳିତ ସ୍ଥିତି ସୃଷ୍ଟି ହେବାରୁ ସୁରକ୍ଷା କର୍ମୀଙ୍କ ଗୁଳିମାଡ଼ ଓ ଦଳାଚକଟାରେ ୫ ଜଣଙ୍କ ମୃତ୍ୟୁ ଘଟିଥିବାବେଳେ ବିମାନରୁ ଖସିପଡ଼ି ୩ ଜଣଙ୍କ ଜୀବନ ଯାଇଛି।
ଦେଶ ଛାଡ଼ିବା ପାଇଁ କାବୁଲ୍ର ହମିଦ କାର୍ଜାଇ ଅନ୍ତର୍ଜାତୀୟ ବିମାନ ବନ୍ଦରରେ ବସ୍ଷ୍ଟାଣ୍ଡ ଓ ରେଳଷ୍ଟେଶନ ଭଳି ଭିଡ଼ ସ୍ଥିତି ଦେଖିବାକୁ ମିଳିଥିଲା। କାବୁଲରେ ଅବସ୍ଥାପିତ ଆମେରିକା ଦୂତାବାସର କର୍ମଚାରୀ ଓ ଅଧିକାରୀଙ୍କୁ ସ୍ବଦେଶ ନେବା ପାଇଁ ଆସିଥିବା ବାୟୁସେନା ବିମାନରେ ଶହଶହ ଲୋକ ଏକାବେଳେ ଉଠିବା ପାଇଁ ଚେଷ୍ଟା କରିଥିଲେ। ଭିଡ଼ ହଟାଇବା ପାଇଁ ଆମେରିକା ସୈନ୍ୟ ଫାଙ୍କା ଗୁଳି ଚାଳନା କରିଥିଲେ। ଗୁଳି ଚାଳନା ସତ୍ତ୍ୱେ ଲୋକେ ଏହାକୁ ଭ୍ରୂକ୍ଷେପ ନ କରି ବିମାନ ଚାରିପାର୍ଶ୍ୱରେ ଚଢ଼ିବାକୁ ଲାଗିଥିଲେ। ସାମ୍ପ୍ରତିକ ସ୍ଥିତିକୁ ଦେଖି ବ୍ୟବସାୟିକ ବିମାନ ଚଳାଚଳ ବନ୍ଦ ରହିଥିବାବେଳେ ଯେକୌଣସି ପ୍ରକାରେ କାବୁଲ ବାହାରକୁ ଯିବା ପାଇଁ ଲୋକେ ସାମରିକ ବିମାନରେ ଚଢ଼ିବା ଲାଗି ଉଦ୍ୟମ କରିଥିଲେ। ଆମେରିକା, ବ୍ରିଟେନ ଓ ଅନ୍ୟ ଦେଶର ସାମରିକ ବିମାନ ସେମାନଙ୍କ ନାଗରିକଙ୍କୁ ନେବା ପାଇଁ ଆସିଥିବାବେଳେ ସେଥିରେ ଚଢ଼ିବା ପାଇଁ ଲୋକେ ଭିଡ଼ ଜମାଇଥିଲେ। ଆମେରିକା ବାୟୁସେନା ବିମାନ ଉଡ଼ାଣ ପାଇଁ ରନ୍ଓ୍ବେରେ ଗଡୁଥିବାବେଳେ ଶହ ଶହ ଲୋକ ଏହାର ଦୁଇପାର୍ଶ୍ୱ ଏବଂ ଆଗରେ ଦୌଡ଼ୁଥିବା ଭିଡିଓ ଚିତ୍ରରୁ ଦେଖିବାକୁ ମିଳିଛି। ଏପରିକି ତିନିଜଣ ଏକ ସାମରିକ ବିମାନ ଚକାକୁ ଜାବୁଡ଼ି ଧରି ଦେଶ ବାହାରକୁ ପଳାଇବା ପାଇଁ ଉଦ୍ୟମ କରିଥିଲେ। ବିମାନଟି ଉଡ଼ିବା ମାତ୍ରେ ସେମାନେ ଖସିପଡ଼ି ପ୍ରାଣ ହରାଇଥିଲେ। ଉଡ଼ନ୍ତା ବିମାନରୁ ଲୋକେ ଖସିପଡ଼ୁଥିବାରୁ ଦୃଶ୍ୟ ସୋସିଆଲ ମିଡିଆରେ ଭାଇରାଲ ହୋଇଛି। ଆତଙ୍କିତ ଲୋକେ ବିମାନ ଧରିବା ପାଇଁ ଏୟାରବ୍ରିଜ୍ ଚଢ଼ୁଥିବା ଦେଖାଯାଇଛି। ତେବେ ୫ ଜଣଙ୍କର ମୃତ୍ୟୁ
ଗୁଳିମାଡ଼ରେ ହୋଇଛି କି ଦଳାଚକଟାରେ, ତାହା ସ୍ପଷ୍ଟ ହୋଇନାହିଁ। ସୂଚନା ଯୋଗ୍ୟ, ୨ଦଶନ୍ଧି ଧରି ଆମେରିକା ସେନାର ଉପସ୍ଥିତି ସତ୍ତ୍ୱେ ଆଫଗାନିସ୍ତାନ ଭାଗ୍ୟ ବଦଳିପାରିଲାନି। ରବିବାର କାବୁଲକୁ ସମ୍ପୂର୍ଣ୍ଣ ଅକ୍ତିଆର କରିବା ପରେ ତାଲିବାନ ଆଫଗାନିସ୍ତାନ ଉପରେ ବିଜୟ ଘୋଷଣା କରିଛି। ଖୁବ୍ଶୀଘ୍ର ସେଠାରେ ତାଲିବାନ ସରକାର ଗଠନ ହେବାକୁ ଯାଉଛି। ସେପଟେ ରାଷ୍ଟ୍ରପତି ଅଶ୍ରଫ ଘନି ନିଜ ପଦରୁ ଇସ୍ତଫା ଦେବା ପରେ ଦେଶ ଛାଡ଼ି ପଳାଇ ଯାଇଛନ୍ତି। ତାଜିକ୍ସ୍ତାନରେ ତାଙ୍କୁ ବିମାନରୁ ଓହ୍ଲାଇବାକୁ ଅନୁମତି ନ ମିଳିବାରୁ ସେ ଓମାନ୍ରେ ରହିଛନ୍ତି। ସେଠାରୁ ଖୁବ୍ଶୀଘ୍ର ସେ ଆମେରିକା ଯିବାକୁ ଉଦ୍ୟମ କରଉଛନ୍ତି। ତାଲିବାନ କବଳରେ ଦେଶ ଥିବାବେଳେ ଘନି ଜନସାଧାରଣଙ୍କୁ ଅସହାୟ ଭାବେ ଛାଡ଼ି ପଳାଇବାକୁ ପୂର୍ବତନ ରାଷ୍ଟ୍ରପତି ହମିଦ୍ କରଜାଇ କଡ଼ା ସମାଲୋଚନା କରିଛନ୍ତି। ଏଥିସହ ଶାନ୍ତିପୂର୍ଣ୍ଣ ଉପାୟରେ ତାଲିବାନ କ୍ଷମତାକୁ ଆସିବା ନିମନ୍ତେ ସେ ଏହି ସଙ୍ଗଠନ ସହ ଆଲୋଚନା କରିବେ ବୋଲି କର୍ଜାଇ କହିଛନ୍ତି।