ମହାକାଳପଡ଼ା,୧୫ା୯(ପ୍ରତାପ ଚନ୍ଦ୍ର ସ୍ବାଇଁ): କୁମ୍ଭୀରମାନେ ଦୈନିକ ୧୦କେଜିରୁ ଅଧିକ ଖାଦ୍ୟ ଖାଇଥାଆନ୍ତି। ଏବେ ନଦୀ ନାଳରେ ମାଛ କଙ୍କଡ଼ା ଭଳି ଜଳଚରଜୀବ ଆବଶ୍ୟକ ପରିମାଣର ମିଳୁ ନ ଥିବାରୁ କୁମ୍ଭୀରମାନେ ମଣିଷ ସମେତ ଛେଳି, ମେଣ୍ଢା, ବତକମାନଙ୍କୁ ଆକ୍ରମଣ କରୁଥିବା ନଜିର ରହିଛି। ସେଥିପାଇଁ ନଦୀକୂଳିଆ ଲୋକଙ୍କ ମଧ୍ୟରେ ଆତଙ୍କ ପ୍ରକାଶ ପାଇଛି। ଅନ୍ୟପକ୍ଷେ ନଦୀ ନାଳରେ ଏବେ କୁମ୍ଭୀରଙ୍କ ସଂଖ୍ୟା ବି ବଢ଼ି ଚାଲିଛି। ଏଥି ପାଇଁ କୌଣସି ରୋକ୍ ଲାଗୁ ନ ଥିବାରୁ ଚିନ୍ତା ବଢ଼ିଛି। ଏହି ପରିପ୍ରେକ୍ଷୀରେ କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଖରିନାସୀ ଗ୍ରାମର ୨ ମହିଳା କୁମ୍ଭୀର ମୁହଁରୁ ବଞ୍ଚତ୍ବା ଘଟଣା ଏବେ ବି ଜୀବନ୍ତ ହୋଇ ରହିଛି। ଏ ସଂକ୍ରାନ୍ତରେ ଖରିନାସୀ ଗ୍ରାମର ଆଖିଳା ଗାୟନ(୭୦) କୁହନ୍ତି, ୨୦୧୫ ମସିହା କଥା। ମୁଁ ମହାନଦୀ ଶାଖା ଖରିନାଶୀ-ଟୁବି ଗଳିଆ ନଦୀର ଜିରୋ ପଏଣ୍ଟରେ ମାଛ ଧରୁଥିଲି। ଏହି ସମୟରେ କୁମ୍ଭୀରଟି ଆସି ମୋ ହାତ ଓ ଅଣ୍ଟାକୁ ମୁହଁରେ ଧରି ଟାଣି ଟାଣି ପାଣି ଭିତରକୁ ନେଇଯାଉଥିଲା। କୌଣସି ଉପାୟ ନ ପାଇ ମୁଁ ନିଜ ଆଙ୍ଗୁଠିକୁ ଜୋରରେ କୁମ୍ଭୀର ଆଖିକୁ ଖେଞ୍ଚି ଦେବାରୁ ସେ ମୋତେ ଛାଡି ପଳାଇ ଯାଇଥିଲା ହେଲେ ମୋ ଦେହରେ ଯେଉଁ କ୍ଷତ ସୃଷ୍ଟି ହୋଇଥିଲା ସେଥିପାଇଁ ଡାକ୍ତରଖାନାରେ ୬୪ଟି ଷ୍ଟିଚ୍ ପଡ଼ିଥିଲା। ସେହିପରି ଖରିନାସୀ ଟୁବି ଘାଟ ନିକଟ ଘର ପାଖ ନଦୀ କୂଳରେ ମାଛ ଧୋଇବା ସମୟରେ ଗୀତା ଦାସ(୬୮)ଙ୍କ ହାତର କହୁଣି ପର୍ଯ୍ୟନ୍ତ କୁମ୍ଭୀର ପାଟିରେ ପଶି ଯାଇଥିଲା। ଏହାପରେ କୁମ୍ଭୀରଟି ତାଙ୍କୁ ଟାଣି ନେଉଥିଲା। ହେଲେ ତାଙ୍କ ଆଙ୍ଗୁଠି ନଖ କୁମ୍ଭୀର ତଣ୍ଟିରେ ଗେଞ୍ଚି ହୋଇଯିବାରୁ ସେ ଛାଡ଼ି ଦେଇଥିଲା। ଏହାପରେ ସେ ନଦୀ ଭିତରୁ ତର ତର ହୋଇ କୂଳକୁ ଚାଲି ଆସିଥିଲେ। ହେଲେ ପୁନର୍ବାର କୁମ୍ଭୀରଟି ତାଙ୍କୁ ପାଣି ଭିତରକୁ ଟାଣି ନେଉଥିଲା। ହେଲେ ପାଖରେ ଥିବା କେତେଜଣ ଲୋକ ମୋ ପାଟି ଶୁଣି ମୋତେ ଉଦ୍ଧାର କରି ପ୍ରଥମେ ରାମନଗର ପ୍ରାଥମିକ ସାସ୍ଥ୍ୟକେନ୍ଦ୍ର ଓ ପରେ କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ ବୋଲି କହିଛନ୍ତି। ହେଲେ ଏହି ୨ ମହିଳା ଆଜି ପର୍ଯ୍ୟନ୍ତ ସରକାରୀ ସହାୟତା ପାଇ ନାହାନ୍ତି ବୋଲି ଅଭିଯୋଗ କରିଛନ୍ତି।
ଏ ସଂକ୍ରାନ୍ତରେ ରାଜନଗର ବନଖଣ୍ଡ ଅଧିକାରୀ ସୁଦର୍ଶନ ଗୋପୀନାଥ ଯାଦବ କହିଛନ୍ତି, ନଦୀକୂଳିଆ ଲୋକମାନଙ୍କୁ ନଦୀନାଳରେ ପ୍ରବେଶ ନ କରିବା ପାଇଁ ବିଭାଗ ପକ୍ଷରୁ ସଚେତନତା ସୃଷ୍ଟି କରାଯାଉଛି। ବର୍ତ୍ତମାନ କୁମ୍ଭୀରମାନଙ୍କ ପ୍ରଜନନ ଋତୁ। ଏହି ସମୟରେ ସେମାନେ ଅଧିକ ହିଂସ୍ର ହୋଇଥାଆନ୍ତି। ସହାୟତା ରାଶି ପ୍ରସଙ୍ଗରେ ସେ କହିଛନ୍ତି, ଅଭିଯୋଗ ମିଳିଲେ ତଦନ୍ତ କରାଯାଇ ପଦକ୍ଷେପ ଗ୍ରହଣ କରାଯିବ।
ଅଖିଳାଙ୍କୁ କୁମ୍ଭୀର ମୁହଁରୁ ଉଦ୍ଧାର କରିଥିବା ସେହି ଗ୍ରାମର ସୁବାସ ବିଶ୍ୱାସ କହିଛନ୍ତି, ବନ ବିଭାଗ ଠିକ୍ ଢ଼ଙ୍ଗରେ ସଚେତନ କରୁ ନ ଥିବାରୁ ଅନେକ ଲୋକ କୁମ୍ଭୀର ଆକ୍ରମଣରେ ଶିକାର ହେଉଛନ୍ତି। ସାମାଜିକ କର୍ମୀ ସମୀର ମିସ୍ତ୍ରୀ କହିଛନ୍ତି, ଗରିବ ଲୋକମାନେ ମାଛ କଙ୍କଡ଼ା ଧରି ପରିବାର ପ୍ରତି ପୋଷଣ କରନ୍ତି। କୁମ୍ଭୀରମାନଙ୍କ ସଂଖ୍ୟା ବୃଦ୍ଧି ପାଇବା ଯୋଗୁ ସ୍ଥାନୀୟ ବାସିନ୍ଦା ଜୀବିକା ହରାଉଛନ୍ତି। ଭୟରେ ଲୋକମାନେ ନଦୀନାଳକୁ ପଶୁ ନାହାଁନ୍ତି। ଏଥିପାଇଁ ସରକାର ପଦକ୍ଷେପ ନେବା ଉଚିତ୍।