ଭବାନୀପାଟଣା,୭।୮(ଉତ୍ତମ କୁମାର ଦାଶ): ୫ ବର୍ଷ ଧରି ସେ କଳାହାଣ୍ଡି ପୋଲିସରେ ଗୃହରକ୍ଷୀ (ହୋମଗାର୍ଡ) ଭାବେ କାର୍ଯ୍ୟ କରିଥିଲେ। ପରବର୍ତ୍ତୀ ସମୟରେ ବାପାଙ୍କ ମୃତ୍ୟୁ ଓ ଦେହ ଅସୁସ୍ଥତା ଯୋଗୁ ଗୃହରକ୍ଷୀ ଚାକରି ଛାଡି ଦେଇଥିଲେ। ପରେ ତାଙ୍କ ୨ ଛୋଟ ପୁଅଝିଅ ମଧ୍ୟ ଅଜଣା ରୋଗରେ ଆଖି ବୁଝିଥିଲେ। ବର୍ତ୍ତମାନ ବୃଦ୍ଧବସ୍ଥାରେ ଅସହାୟ ଭାବେ ସ୍ତ୍ରୀଙ୍କୁ ଧରି ପଲିଥିନ ତଳେ ଜୀବନ ବିତାଉଛନ୍ତି। ଏଭଳି ଏକ ଦୁଖଃଦ ଚିତ୍ର ଦେଖିବାକୁ ମିଳିଛି କଳାହାଣ୍ଡି ଜିଲା ସଦରମହକୁମା ଭବାନୀପାଟଣା ସହରର ପୁରୁଣାପଡାରେ। ତାଙ୍କ ଘରଠୁୁ ଜିଲାପାଳଙ୍କ କାର୍ଯ୍ୟାଳୟ ପ୍ରାୟ ୧ କି.ମି. ମଧ୍ୟରେ ରହିଥିବାବେଳେ ଏହି ଘଟଣା ପ୍ରତି ଜିଲା ପ୍ରଶାସନର ନଜର ନ ପଡିବା ସାଧାରଣରେ ଆଶ୍ଚର୍ଯର ବିଷୟ। ଭବାନୀପାଟଣା ପୁରୁଣାପଡାରେ ରହନ୍ତି ବୃଦ୍ଧ ଆନନ୍ଦ ଜାଲ (୬୪) ଓ ତାଙ୍କ ସ୍ତ୍ରୀ ସାବିତ୍ରୀ (୬୨)। ପୈତୃକ ଅମଳରୁ ସେ ପୁରୁଣାପଡାରେ ରହୁଥିବାବେଳେ ୨୦୦୭ରେ ତାଙ୍କ ମାଟି ଘର ଭାଙ୍ଗିଯାଇଥିଲା। ଘର ପାଇଁ ସେ ସ୍ଥାନୀୟ ପ୍ରଶାସନ ସମେତ ଜିଲା ପ୍ରଶାସନ ପାଖରେ ଅନେକ ଥର ଗୁହାରି କରିଥିଲେ ମଧ୍ୟ ତାଙ୍କ କେହି ଶୁଣି ନ ଥିବା ଅଭିଯୋଗ କରିଛନ୍ତି। ଏକ ପଲିଥିନ ଘର ତିଆରି କରି ସେତେବେଳେଠୁ ଉଭୟ ସେଠାରେ ଅତି କଷ୍ଠରେ ରହିଆସୁଛନ୍ତି। ଦମ୍ପତି କୁଲି ମଜୁରୀ କରି ଚଳୁଥିବାବେଳେ ପ୍ରଶାସନ ପକ୍ଷରୁ ଉଭୟଙ୍କୁ ଭତ୍ତା ଓ ୩୫ କେଜି ଚାଉଳ ପ୍ରଦାନ କରାଯାଉଛି। ଗତ ୧ ତାରିଖଠୁ ୩ ପର୍ଯ୍ୟନ୍ତ ହୋଇଥିବା ଲଗାଣ ବର୍ଷାରେ ସେମାନେ ନାହଁି ନ ଥିବା ଅସୁବିଧାର ସମ୍ମୁଖୀନ ହୋଇଥିଲେ। ଖବର ପାଇଁ ସ୍ଥାନୀୟ ପୌରାଞ୍ଚଳ ପକ୍ଷରୁ ସେତେବେଳଠାରୁ ଦିନକୁ ୨ ଓଳି ରନ୍ଧାଖାଦ୍ୟ ଦିଆଯାଉଥିବା ପ୍ରକାଶ କରିଛନ୍ତି। ହେଲେ ମୁଣ୍ଡ ଗୁଞ୍ଜିବା ପାଇଁ ଘରଟିଏ ପ୍ରଶାସନ ପକ୍ଷରୁ ଏ ଯାବତ ମିଳି ପାରି ନ ଥିବାରୁ ଦମ୍ପତି ଅସନ୍ତୋଷ ବ୍ୟକ୍ତ କରିଛନ୍ତି। ଏ ନେଇ ଭବାନୀପାଟଣା ପୌରାଞ୍ଚଳ କାର୍ଯ୍ୟନିର୍ବାହୀ ଅଧିକାରୀ ଚିନ୍ମୟ ନାୟକଙ୍କୁ ପଚବାରିବାରୁ ସେମାନଙ୍କୁ ସରକାରୀସ୍ତରରେ କେମିତି ଘରଟିଏ ମିଳିବ ସେ ନେଇଁ ଚେଷ୍ଟା କରିବି ବୋଲି କହିଥିଲେ।