କେନ୍ଦୁଝର, ୨୯ା୭ (ସ୍ବ.ପ୍ର.)-ଦାରିଦ୍ର୍ୟ ସୀମାରେଖା ତଳେ ରହିଥିବା ଗରିବ ପରିବାରଙ୍କୁ ପ୍ରଧାନ ମନ୍ତ୍ରୀ ଆବାସ ଓ ବିଜୁ ପକ୍କା ଘର ଆଦି ଯୋଜନାରେ ବାସଗୃହ ଯୋଗାଇ ଦେବାପାଇଁ ସରକାରୀ ବ୍ୟବସ୍ଥା ଥିଲେ ହେଁ କେନ୍ଦୁଝର ଜିଲାରେ ଅନେକ ଗରିବ ପରିବାର ସରକାରଙ୍କ ଏହି ଯୋଜନାର ସୁଫଳ ପାଇପାରୁ ନାହାନ୍ତି। ଫଳରେ ଏବେ ମଧ୍ୟ ଝାଟିମାଟି ଘରେ ଆଦି ଦୟନୀୟ ଅସହାୟ ଅବସ୍ଥାରେ ପଡି ରହିଛନ୍ତି। ଘର ଖଣ୍ଡେ ନେଇ ବହୁବାର ଅଭିଯୋଗ କରିଆସୁଥିଲେ ହେଁ ନ ପାଇ ଆଶା ଭରସା ଛାଡିଦେଇ ଭାଗ୍ୟକୁ ଆଦରି ପଡିରହିଛନ୍ତି ା
ଏଭଳି ଏକ ଦୃଶ୍ୟ କେନ୍ଦୁଝର ଜିଲା ହରିଚନ୍ଦନପୁର ବ୍ଲକ ଜାମୁଜୋଡି ପଞ୍ଚାୟତର ଆଟପୁର ଗ୍ରାମରେ ଦେଖିବାକୁ ମିଳିଛି। ଏହି ଗ୍ରାମର ଶେଷ ମୁଣ୍ଡରେ ଝାଟିମାଟି ଘରେ ଅତି ଦୟନୀୟ ଅବସ୍ଥାରେ ରହୁଛନ୍ତି ନାଏକ ମୁଣ୍ଡାଙ୍କ ପରିବାର। ପରିବାର କହିଲେ ସ୍ତ୍ରୀ ଓ ୩ ସନ୍ତାନ। ସରକାରୀ ସହାୟତା କହିଲେ କେବଳ ରାଶନ କାର୍ଡ କିନ୍ତୁ ସେଥିରେ ଜଣକର ନାମ କାର୍ଡରୁ କଟିଯାଇଥିବାରୁ କମ ଚାଉଳ ପାଉଥିବା କହିଛନ୍ତି। ଘର ନ ଥିବାରୁ ଝାଟିମାଟି କୁଡ଼ିଆ ଘରେ ରହୁଛନ୍ତି। ମୂଲ କଲେ ଚୂଲି ଜଳେ ଦେହ ଅସୁସ୍ଥ ହେଲେ କାମ ବନ୍ଦ ହୋଇଗଲେ ପଡୋଶୀଙ୍କ ଠାରୁ ମାଗି ଚଳିଥାନ୍ତି ନଚେତ ଉପାସରେ ରହିଥାନ୍ତି ବୋଲି କୁହନ୍ତି। ଘର ନ ଥିବା କାରଣରୁ ଦୀର୍ଘ ୧୦ବର୍ଷରୁ ଊର୍ଦ୍ଧ୍ୱ ହେବ ଝାଟିମାଟି ଭଙ୍ଗାଦଦରା ଘରେ ଖରା ବର୍ଷା ଶୀତ ବହୁ କଷ୍ଟରେ ରହୁଛନ୍ତି ା ବର୍ଷାରେ ପାଣି ଗଳୁଛି ା ମୁଣ୍ଡ ଗୁଞ୍ଜିବାକୁ ଘରଟିଏ ପାଇଁ ପଞ୍ଚାୟତଠାରୁ ବ୍ଲକ ଅଫିସ ପର୍ଯ୍ୟନ୍ତ ସବୁଠି ଗୁହାରି କରି ନୟାନ୍ତ ହୋଇ ସାରିଲେଣି କିନ୍ତୁ ଆମକଥା ଶୁଣୁ ନ ଥିବା କହିଛନ୍ତି ନାଏକ ମୁଣ୍ଡା। ମାଟିଝାଟି ଘର ହୋଇଥିବାରୁ ସାପ, ହାତୀ ଆଦି ସରୀସୃପ ତଥା ବନ୍ୟଜନ୍ତୁ ଭୟ ଲାଗି ରହୁଥିବାରୁ ରାତିରେ ପିଲାମାନଙ୍କୁ ଶୁଆଇ ସ୍ବାମୀସ୍ତ୍ରୀ ପାଳି କରି ଅନିଦ୍ରା ରହି ଜଗନ୍ତି ବୋଲି ତାଙ୍କ ସ୍ତ୍ରୀ ବାସନ୍ତୀ ମୁଣ୍ଡା କହିଛନ୍ତି। ଏସମ୍ପର୍କରେ ସରପଞ୍ଚ ଜଗତାନାନ୍ଦ ମୁଣ୍ଡାଙ୍କୁ ପଚାରିବାରୁ ଜମି ପଟ୍ଟା ନ ଥିବାରୁ ଘର ମିଳି ନ ଥିବା କହିଛନ୍ତି। ତେବେ ସରକାର ଭୂମିହୀନ ମାନଙ୍କୁ ଜମି ସହିତ ଘର ଦେବା ବ୍ୟବସ୍ଥା ରହିଥିବାରୁ ତୁରନ୍ତ ଜମି ପଟ୍ଟା ସହିତ ଘର ଯୋଗାଇ ଦିଆଯିବ ବୋଲି ସେମାନଙ୍କୁ କହିଛନ୍ତି ା