ବାରିପଦା ଅଫିସ,୧୮ା୮-ମୟୂରଭଞ୍ଜ ଜିଲା ଦେଇ ଯାଇଥିବା ୪୯ନଂ. ଜାତୀୟ ରାଜପଥର ବାଙ୍ଗରିପୋଷିସ୍ଥିତ ଦ୍ୱାରଶୁଣୀ ଘାଟି ସାଜିଛି ମରଣଯନ୍ତା। ରାସ୍ତା ପ୍ରଶସ୍ତୀକରଣ ପାଇଁ ବନବିଭାଗ ଓ ଜାତୀୟ ରାଜପଥ କର୍ତ୍ତୃପକ୍ଷ ପଦକ୍ଷେପ ନେଉ ନ ଥିବାରୁ ଅଣଓସାରିଆ ରାସ୍ତାରେ ଦୁର୍ଘଟଣା ବଢ଼ି ଚାଲିଛି। ଏହି ରାସ୍ତାରେ ଚଳପ୍ରଚଳ କରୁଥିବା ବସ୍ ଯାତ୍ରୀମାନେ ନିଜକୁ ଅସୁରକ୍ଷିତ ମଣୁଛନ୍ତି। ଘାଟିରେ ଅନେକ ଜୀବନ ବଳି ପଡ଼ୁଥିବା ବେଳେ ଦୁର୍ଘଟଣା ରୋକିବା କ୍ଷେତ୍ରରେ ପ୍ରଶାସନର ଖାମଖିଆଲି ମନୋଭାବ ଅସନ୍ତୋଷର କାରଣ ପାଲଟିଛି।
ଜାତୀୟ ରାଜପଥର ବାଙ୍ଗରିପୋଷିଠାରୁ ୮କି.ମି. ରାସ୍ତା ଶିମିଳିପାଳ ଅଭୟାରଣ୍ୟ ମଧ୍ୟରେ ରହିଛି। କୋଲକାତାରୁ ମୁମ୍ବାଇକୁ ଲମ୍ବିଥିବା ଏହି ରାସ୍ତାରେ ପ୍ରତିଦିନ ହଜାର ହଜାର ଭାରୀଯାନ ଚଳପ୍ରଚଳ କରିଥାଏ। ଘାଟି ଚଢ଼ିବା ସମୟରେ ଚାଳକଙ୍କ ସୂଚନା ନିମନ୍ତେ ଲାଲି ଅକ୍ଷରରେ ଲେଖା ହୋଇଛି ‘ସାବଧାନ ଏହା ଦୁର୍ଘଟଣା ପ୍ରବଣ ଇଲାକା’। ଘାଟି ରାସ୍ତାର ଉଭୟ ପାର୍ଶ୍ୱରେ ପଡ଼ି ରହିଛି ଖଣ୍ଡବିଖଣ୍ଡିତ ଯାନବାହାନ। ଘାଟିର ଉପର ଓ ତଳ ମୁଣ୍ଡରେ ରାସ୍ତା ଚଉଡ଼ା ହୋଇସାରିଥିବା ବେଳେ ଅଙ୍କାବଙ୍କା ପାହାଡ଼ି ରାସ୍ତା ନିର୍ମାଣ କାର୍ଯ୍ୟ ହୋଇପାରୁ ନାହିଁ। ଫଳରେ ବିଗତ ୭ବର୍ଷ ମଧ୍ୟରେ ୫୨ଜଣଙ୍କର ପ୍ରାଣହାନୀ ଘଟିଥିବା ବେଳେ ୧୨୮ଜଣ ଗୁରୁତର ହୋଇଛନ୍ତି। ରାସ୍ତା ପ୍ରଶସ୍ତୀକରଣ ପାଇଁ ପ୍ରଶାସନିକ ଓ ରାଜନୈତିକସ୍ତରରେ ବାରମ୍ବାର ବୈଠକ ଆଲୋଚନା ହେଉଛି। ମାତ୍ର ଉଚିତ୍ ପଦକ୍ଷେପ ଗ୍ରହଣ କରାଯାଉ ନ ଥିବାରୁ ଅଞ୍ଚଳବାସୀ ଆନ୍ଦୋଳନାତ୍ମକ ପନ୍ଥା ଅବଲମ୍ବନ କରିବା ସହ ରାସ୍ତାରୋକ କରୁଛନ୍ତି। ଜଙ୍ଗଲ ବିଭାଗ ପକ୍ଷରୁ ଆବଶ୍ୟକ ସ୍ଥାନ ଜାତୀୟ ରାଜପଥ ବିଭାଗକୁ ହସ୍ତାନ୍ତର କରାଯାଉ ନ ଥିବାରୁ ରାସ୍ତା ପ୍ରଶସ୍ତୀକରଣ କାର୍ଯ୍ୟ ଆଗେଇ ପାରୁ ନାହିଁ ବୋଲି ଏନଏଚ୍ଏଆଇର ଅଧିକାରୀମାନେ ପ୍ରକାଶ କରିଛନ୍ତି। ବିଭାଗ ପକ୍ଷରୁ ଉକ୍ତ ରାସ୍ତା ବାବଦରେ ଚିଠିନଂ. ୫୭୬୬/୧୫ ଡିସେମ୍ବର ୨୦୨୦ରେ ଜଙ୍ଗଲ ଓ ପରିବେଶ ମନ୍ତ୍ରଣାଳୟକୁ କ୍ଲିୟରାନ୍ସ ପ୍ରଦାନ କରିବାକୁ ଚିଠି କରାଯାଇଛି। ପ୍ରଥମ ପର୍ଯ୍ୟାୟରେ ଫରେଷ୍ଟ କ୍ଲିୟରାନ୍ସ୍ସ ଓ ଜଙ୍ଗଲ ପରିବେଶ ମନ୍ତ୍ରଣାଳୟ ପକ୍ଷରୁ ମଞ୍ଜୁରୀ ମିଳିଥିବା ଥିବା ବେଳେ ଦ୍ୱିତୀୟ ପର୍ଯ୍ୟାୟରେ ସବୁଜ ସଙ୍କେତ ଆସିଲେ ପ୍ରଶସ୍ତୀକରଣ କାର୍ଯ୍ୟ ତ୍ୱରାନ୍ବିତ ହେବ ବୋଲି ଏନ୍ଏଚଏଆଇର ରାଜସ୍ବ ଅଧିକାରୀ କମଲ କୁମାର ପରମାଣିକ ପ୍ରକାଶ କରିଛନ୍ତି। ସଡ଼କ ସୁରକ୍ଷା ପାଇଁ ବିଭାଗ ପକ୍ଷରୁ ବ୍ୟାପକ ସଚେତନତା କରାଯାଉଥିଲେ ମଧ୍ୟ ଦୁର୍ଘଟଣା ଜନିତ ସମସ୍ୟାର ସମାଧାନ କରାଯାଉ ନାହିଁ ବୋଲି ଡ୍ରାଇଭର ଦୀପକ କୁମାର ପାଣ୍ଡେ, ରାକେଶ ପାଲ କହିଛନ୍ତି ା ତେବେ ଉକ୍ତ ଅଞ୍ଚଳ ବ୍ୟାଘ୍ର ସଂରକ୍ଷଣ ପ୍ରକଳ୍ପ ଓ ହାତୀ କରିଡର ସ୍ଥାନ ହୋଇଥିବାରୁ ବିଭାଗ ପକ୍ଷରୁ ମଞ୍ଜୁରୀ ମିଳିବାରେ ବିଳମ୍ବ ହେଉଛି ବୋଲି ଅଞ୍ଚଳବାସୀ ସତ୍ୟପ୍ରକାଶ ମହାନ୍ତି, ରାକେଶ ହଁାସଦା ପ୍ରକାଶ କରିଛନ୍ତି। ବନ୍ୟଜନ୍ତୁଙ୍କ ପାଇଁ ଆବଶ୍ୟକ ପଦକ୍ଷେପ ଗ୍ରହଣ କରାଯାଇ ରାଜପଥର ପ୍ରଶସ୍ତୀକରଣ କରିବାକୁ ଅଞ୍ଚଳବାସୀ ଦାବି କରୁଛନ୍ତି।