ଫୁଲବାଣୀ ଅଫିସ, ୩୧।୫: କନ୍ଧମାଳ ଜିଲା ଫୁଲବାଣୀ ବ୍ଲକ ଆଲାମୀ ପଞ୍ଚାୟତ ପିଟବାରୀ ଗ୍ରାମରେ ସୋମବାର ଏକ ଅଭାବନୀୟ ଘଟଣା ଘଟିଛି। ନିର୍ମାଣାଧୀନ ପାଇଖାନା ଟାଙ୍କିରେ ପଶି କାଠ କାଢ଼ୁଥିବା ବେଳେ ଶ୍ୱାସରୁଦ୍ଧ ହୋଇ ୨ ଜଣଙ୍କ ମୃତ୍ୟୁ ଘଟିଛି। ସେମାନେ ହେଲେ ଘର ମାଲିକ ତଥା ଅବସରପ୍ରାପ୍ତ ସେନା କର୍ମଚାରୀ ସଞ୍ଜୟ ପ୍ରଧାନ ଓ ଶ୍ରମିକ ସନ୍ତୋଷ କହଁର ।
ସଞ୍ଜୟଙ୍କ ନୂଆ ଘର ନିର୍ମାଣ ଚାଲିଛି । କିଛି ଦିନ ହେଲା ପାଇଖାନା ଟାଙ୍କିର ଛାତ ପଡିଥିଲା। ଛାତ ତଳେ ଦିଆଯାଇଥିବା କାଠ କାଢ଼ିବାକୁ ସନ୍ତୋଷ ପ୍ରଥମେ ଟାଙ୍କିରେ ପଶିଥିଲେ। ସେ ବାହାରିବାରେ ବିଳମ୍ବ ହେବାରୁ ଘର ମାଲିକ ସଞ୍ଜୟ ମଧ୍ୟ ଭିତରକୁ ଯାଇଥିଲେ। ସେ ମଧ୍ୟ ନ ବାହାରିବାରୁ ସେଠାରେ କାମ କରୁଥିବା ଅନ୍ୟମାନେ ଟାଙ୍କିକୁ ଯାଇ ଉଭୟେ ଅଚେତ ହୋଇପଡିଥିବା ଦେଖିଥିଲେ। ଏ ସମ୍ପର୍କରେ ତୁରନ୍ତ ଅଗ୍ନିଶମ କର୍ମଚାରୀଙ୍କୁ ଖବର ଦିଆଯାଇଥିଲା। ଅଗ୍ନିଶମ କର୍ମଚାରୀ ପହଞ୍ଚି ସନ୍ତୋଷ ଓ ସଞ୍ଜୟଙ୍କୁ ଉଦ୍ଧାର କରି ଫୁଲବାଣୀ ମେଡିକାଲକୁ ଆଣିଥିଲେ। ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ।