ଖଣ୍ଡପଡ଼ା,୧ା୪: ସାମାନ୍ୟ ଅସାବଧାନତା ଯୋଗୁ ବସ୍ ଚକ ତଳେ ଚାପି ହୋଇ ଜଣେ ଯୁବକଙ୍କ ମୃତ୍ୟୁ ଘଟିଛି। ଗୁରୁବାର ଖଣ୍ଡପଡା-ଖଳିସାହି ରାସ୍ତାର ପେଟ୍ରୋଲ ପମ୍ପ ନିକଟରେ ଏହି ଦୁଃଖଦ ଘଟଣା ଘଟିଛି। ମୃତକ ହେଲେ ଖଣ୍ଡପଡ଼ା ଥାନା ଅଧୀନ ବୋଦସା ନୂଆସାହି ଗ୍ରାମର ଅରୁଣ କୁମାର ନାୟକ(୩୩)। ପୋଲିସ ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି । ସୂଚନା ଅନୁଯାୟୀ, ଭୁବନେଶ୍ୱରରୁ ଖଣ୍ଡପଡ଼ା ଦେଇ ଦଶପଲ୍ଲା ଅଭିମୁଖେ ଏକ ଘରୋଇ ଯାତ୍ରୀବାହୀ ବସ ଯାଉଥିଲା । ସେହି ସମୟରେ ଏକ ବାଇକ୍ରେ ଖଣ୍ଡପଡ଼ାରୁ ବୋଦସା ଯାଉଥିବା ଅରୁଣ ସାମାନ୍ୟ ଅସାବଧାନତା ଯୋଗୁ ବସର ପଛ ବାମପଟ ଚକ ତଳେ ଖସି ପଡିଥିଲେ। ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା। ପୋଲିସ ବସ୍ ଓ ବାଇକ୍କୁ ଜବତ କରିଛି । ଚାଳକ ଓ ହେଲପର ଫେରାର ଅଛନ୍ତି।